Alaýyzdyqtyń kesirinen jertóleni oqpana tutyp, urpaǵy urshyq-zamannyń iiriminde joǵalyp jatqan, kóziniń nury qashqan áke men sheshe, úmiti kúl-talqan bolǵan urpaq, bosqan kósh, qashqan jurt az ba?
Qolamtany úrlep shoq, ushqyndy úrlep ot qylyp, aýyl-úidiń arasyn arazdastyryp, sholaq atpen shoqyraqtap júrgen saiasi "aqylgóiler" tolyp júr aýlamyzda.
Qolyna janarmai ustaǵan jandaishaptar jeme-jemge kelgende, jeti atań bolsa da sheshýshi sátte otqa "bas-siraǵyn" úitip alyp jalynnyń ortasyna jalǵyz tastap jaiyna ketedi.
Bir týlaq jer úshin arasynan qara mysyq ótken tili uqsas, dini bir elder ai-kúnniń amanynda bir-birine qarý kezenip, bitispes jaýǵa ainaldy. Qudai saqtasyn!
Nietke qasqyr shappasyn…
Týǵan Otannyń irgesi berik, Bairaǵy biik bolǵai! Táýelsizdik — bútin jer, tutas Qazaqstan!
Kezinde QR UQK Shekara qyzmetin basqaryp júrip búkil sarbazdarymen opat bolǵan dańqty qolbasshy Turǵanbek Stambekov baitaq Qazaq Jerin qalai jaiaý-jalpy aralap shyqqanyn, shekaranyń qandai qiiametpen shegendelgenin shet-pushpaqtap aityp edi.
Qazaqstannyń qurlyqtaǵy memlekettik shekarasynyń jalpy uzyndyǵy – 13 380 shaqyrym. Reseimen aradaǵy shekaramyz – 7 myń 591 shaqyrym. Qytaimen shektesetin shekara – 1 myń 782 shaqyrym, ózbektermen – 2 354, túrikmendermen – 426, qyrǵyz aǵaiyndarmen – 1 241 shaqyrym. Teńizdegi shektesý (Kaspii) – 2000 shaqyrym.
"Óz ózińe berik bol, qońsyńdy ury tutpa!" degendi dana atalar nege aitqan deisiz? Eldiń ishi daýdan, syrty jaýdan aman bolǵai!
Azattyq jolynda basy jadyda ketken babalardyń rýhy shat bolsyn! El men jer aman bolsyn, qalǵan dúnie qalpyna keler.
Janarbek ÁShIMJAN,
QR Parlamenti Májilisiniń depýtaty,
