تالعات قۋانىشيەۆ ForteBankء-تىڭ باسشىسى بولىپ تاعايىندالدى. ول ءوز ەركىمەن قىزمەتىنەن بوساتىلعان بەكجان ءپىرماتوۆتىڭ ورنىن باستى. ال ءپىرماتوۆتىڭ "ۆەرنىي كاپيتال" كومپانيالار توبى قۇرامىنداعى باسقا لاۋازىمدى قىزمەتكە اۋىسقانى بەلگىلى بولدى، دەپ حابارلايدى Dalanews.kz.
تالعات قۋانىشيەۆتىڭ قازاقستاننىڭ قارجى سەكتورىندا 30 جىلدان استام جۇمىس تاجىريبەسى بار. ول "اتفبانك" اق، "بانك Kassa Nova" اق، "اتف ليزينگ" اق جانە "ForteBank"اق سياقتى قارجى ينستيتۋتتارىن تابىستى باسقاردى. ول 2015 جىلى دا ForteBank باسقارماسىنىڭ ءتوراعاسى بولعان.
ايتا كەتسەك، ميللياردەر بولات وتەمۇراتوۆ بانكتىڭ ماجوريتارلى اكسيونەرى بولىپ تابىلادى. ول "ۆەرنىي كاپيتال" ينۆەستيسيالىق توبىنىڭ باسقارۋىنداعى جوبالاردىڭ نەگىزگى ينۆەستورى جانە اتاۋلى قايىرىمدىلىق قورىنىڭ قىزمەتىنە جەتەكشىلىك ەتەدى. سونداي-اق ول قازاقستان تەننيس فەدەراسياسىنىڭ پرەزيدەنتى جانە حالىقارالىق تەننيس فەدەراسياسىنىڭ (International Tennis Federation) ۆيسە-پرەزيدەنتى بولىپ تابىلادى. ونىڭ ەسىمى اتف بانك، تەمىربانك، اليانس بانك، Kassa Nova، ForteBank اتاۋلارىمەن قاتار ءجيى اتالادى.
2023 جىلى Forbes نۇسقاسى بويىنشا ونىڭ داۋلەتى 2،7 ملرد دوللارعا باعالاندى. وتەمۇراتوۆ ForteBank اكسيالارىنىڭ 83،41%-ىنا يە. سونداي-اق KaR-Tel (قازاقستانداعى Beeline وپەراتورى)، التىن ءوندىرۋشى RG Gold كومپانيالارى، استانا مەن ۆەناداعى Ritz-Carlton قوناق ۇيلەرى، ماسكەۋدەگى The Carlton، Rixos Borovoe كومپانياسى اكسيالارىندا دا ونىڭ ۇلەسى بار.
بۇعان دەيىن ءبىز بولات وتەمۇراتوۆقا تيەسىلى مەدياحولدينگ "ادىلدىك جانە وركەندەۋ" قوعامدىق قورىنىڭ قولىنا وتكەنىن جازعان بولاتىنبىز.
