«قازاقستان حالقى» قوعامدىق قورىن ءۇش جىل بويى باسقارعان بولات جامىشيەۆ قىزمەتىنەن كەتتى. ول بۇل قىزمەتكە 2022 جىلدىڭ قاڭتارىندا تاعايىندالعان بولاتىن، دەپ حابارلايدى Dalanews.kz.
باسقارما ءتوراعاسى بولىپ سايلانعان وكىلەتتىك مەرزىمىنىڭ اياقتالۋىنا بايلانىستى بولات جامىشيەۆ قورداعى جۇمىسىن اياقتاۋ تۋرالى شەشىم قابىلدادى.
"باسشىلىق جاساعان كەزىندە بولات جامىشيەۆ قوردىڭ قالىپتاسۋى مەن دامۋىنا زور ۇلەس قوستى. قور 104 قايىرىمدىلىق باعدارلاماسى مەن جوباسىنا باستاماشى بولىپ، ونىڭ 62ء-سىن ىسكە اسىردى. 29 قاڭتاردا ق ر پرەزيدەنتى جانىنداعى ورتالىق كوممۋنيكاسيالار قىزمەتى الاڭىندا قور باسقارماسىنىڭ مۇشەلەرىنىڭ قاتىسۋىمەن وتكەن بريفينگتە «قازاقستان حالقىنا» قورىنىڭ جۇمىس ناتيجەلەرى تۋرالى باياندادى"، دەيدى قور وكىلدەرى.
جامىشيەۆ قىزمەتىنەن كەتۋىنە قاتىستى پىكىر ءبىلدىردى.
«قوردا جۇمىس ىستەۋ مەن ءۇشىن ۇلكەن مارتەبە جانە جاۋاپكەرشىلىكتى ءىس بولدى. قور قىزمەتىندە ءبىزدىڭ باستامالارىمىزدى قولداعانداردىڭ بارلىعىنا شىن جۇرەكتەن العىس ايتامىن. ءبىز بىرىگىپ ايتارلىقتاي ناتيجەلەرگە قول جەتكىزدىك جانە قوردىڭ جاڭا باسشىلىقپەن ءوز دامۋىن جالعاستىرا بەرەتىنىنە سەنىمىم مول. بارلىق سەرىكتەستەرگە، دونورلارعا جانە قىزمەتكەرلەرگە ورتاق يگى ىسىمىزگە قوسقان ۇلەسى ءۇشىن العىس ايتامىن»، - دەپ، بولات جامىشيەۆ ءوز شەشىمىنە تۇسىنىك بەردى.
«قازاقستان حالقىنا» قوعامدىق قورى قامقورشىلىق كەڭەسىنىڭ شەشىمىمەن 2025 جىلدىڭ 1 اقپانىنان باستاپ «قازاقستان حالقىنا» قق باسقارما ءتورايىمى لاۋازىمىنا قوعام قايراتكەرى، قايىرىمدىلىق جانە قازاقستانداعى ۇەۇ-نىڭ ينستيتۋسيونالدىق دامۋى مەن الەۋمەتتىك جوبالاردى باسقارۋ سالاسىنداعى ساراپشى لاززات شىڭعىسبايەۆا سايلاندى.
ول بۇعان دەيىن «قازاقستان حالقىنا» قورى باسقارما ءتوراعاسىنىڭ ورىنباسارى قىزمەتىن اتقارىپ، مەملەكەتتىك ناگرادا – «ەرەن ەڭبەگى ءۇشىن» مەدالىمەن، «اتامەكەن» ۇكپ قۇرمەتتى قىزمەتكەرى» مەدالىمەن ماراپاتتالعان.
سونداي-اق، قامقورشىلىق كەڭەس قور قىزمەتكەرلەرى سوفيا ايساعالييەۆانى باسقارما ءتوراعاسىنىڭ ورىنباسارى، سەرىكبەك ەلشىبەكوۆتى «قازاقستان حالقىنا» قق باسقارما مۇشەسى ەتىپ سايلادى.
