«Qazaqstan halqy» Qoǵamdyq qoryn úsh jyl boıy basqarǵan Bolat Jámishev qyzmetinen ketti. Ol bul qyzmetke 2022 jyldyń qańtarynda taǵaıyndalǵan bolatyn, dep habarlaıdy Dalanews.kz.
Basqarma Tóraǵasy bolyp saılanǵan ókilettik merziminiń aıaqtalýyna baılanysty Bolat Jámishev Qordaǵy jumysyn aıaqtaý týraly sheshim qabyldady.
"Basshylyq jasaǵan kezinde Bolat Jámishev Qordyń qalyptasýy men damýyna zor úles qosty. Qor 104 qaıyrymdylyq baǵdarlamasy men jobasyna bastamashy bolyp, onyń 62-sin iske asyrdy. 29 qańtarda QR Prezıdenti janyndaǵy Ortalyq komýnıkasıalar qyzmeti alańynda Qor Basqarmasynyń músheleriniń qatysýymen ótken brıfıńte «Qazaqstan halqyna» qorynyń jumys nátıjeleri týraly baıandady", deıdi qor ókilderi.
Jámishev qyzmetinen ketýine qatysty pikir bildirdi.
«Qorda jumys isteý men úshin úlken mártebe jáne jaýapkershilikti is boldy. Qor qyzmetinde bizdiń bastamalarymyzdy qoldaǵandardyń barlyǵyna shyn júrekten alǵys aıtamyn. Biz birigip aıtarlyqtaı nátıjelerge qol jetkizdik jáne Qordyń jańa basshylyqpen óz damýyn jalǵastyra beretinine senimim mol. Barlyq seriktesterge, donorlarǵa jáne qyzmetkerlerge ortaq ıgi isimizge qosqan úlesi úshin alǵys aıtamyn», - dep, Bolat Jámishev óz sheshimine túsinik berdi.
«Qazaqstan halqyna» Qoǵamdyq qory Qamqorshylyq keńesiniń sheshimimen 2025 jyldyń 1 aqpanynan bastap «Qazaqstan halqyna» QQ Basqarma tóraıymy laýazymyna qoǵam qaıratkeri, qaıyrymdylyq jáne Qazaqstandaǵy ÚEU-nyń ınstıtýsıonaldyq damýy men áleýmettik jobalardy basqarý salasyndaǵy sarapshy Lazzat Shyńǵysbaeva saılandy.
Ol buǵan deıin «Qazaqstan halqyna» qory Basqarma tóraǵasynyń orynbasary qyzmetin atqaryp, memlekettik nagrada – «Eren eńbegi úshin» medalimen, «Atameken» UKP qurmetti qyzmetkeri» medalimen marapattalǵan.
Sondaı-aq, Qamqorshylyq keńes qor qyzmetkerleri Sofıa Aısaǵalıevany Basqarma tóraǵasynyń orynbasary, Serikbek Elshibekovti «Qazaqstan halqyna» QQ Basqarma múshesi etip saılady.
