قالالىق اكىمدىكتە وتكەن جيىنعا مەملەكەتتىك ورگانداردىڭ باسشىلارى عانا ەمەس، كوممۋنالشىلار مەن قوعامدىق ۇيىمداردىڭ وكىلدەرى دە قاتىستى. قالا اكىمى قايرات نۇكەنوۆتىڭ ايتۋى بويىنشا بيىلعى جىلى 36 قالا كوشەسىنە اسفالت توسەلەتىن بولادى. بۇل جۇمىستارعا 1،2 ميلليارد تەڭگە قاراستىرىلدى.
سونىمەن قاتار، امانگەلدى جانە ديميتروۆ كوشەلەرىن كەڭەيتۋ جوسپارلانىپ وتىر. امانگەلدى كوشەسى 1 ماي كوشەسىنەن نازاربايەۆ داڭعىلىنا دەيىن، ديميتروۆ كوشەسى قامزين كوشەسىنەن پاۆلوۆ كوشەسى ارالىعىندا كەڭەيەتىن بولادى. ۇلى ويشىل اباي قۇنانباي ۇلىنىڭ 175-جىلدىعىنا وراي پاۆلوداردا اقىننىڭ اتى بەرىلگەن كوشەنى اباتتاندىرۋ جوسپارلانىپ وتىر.
– بۇل جۇمىس ءۇشىن ءسىز جەكە جاۋاپ بەرەسىز، – دەدى قالا اكىمىنە ايماق باسشىسى بولات باقاۋوۆ. – كوشەنى عانا كورىكتەندىرىپ قويماي، مۇندا ورنالاسقان ۇيلەردىڭ سىرتقى كەلبەتىنە دە ءمان بەرۋ كەرەك. ول ءۇشىن ءار ءۇي يەسىمەن جەكە سويلەسىپ، وسى ماسەلەنى تالقىلاۋ قاجەت. تۇرعىندار ءوز ۇيلەرىنىڭ قاقپاسى، قورشاۋى، شاتىرلارىن جوندەۋلەرى قاجەت. ءبىر ايدىڭ ىشىندە اباي كوشەسىن كورىكتەندىرۋ جۇمىستارى بويىنشا ناقتى كونسەپسيا قۇرىلۋى قاجەت.
سونىمەن بىرگە، پاۆلودار وبلىسىنىڭ اكىمى قالانى جارىقتاندىرۋ ماسەلەسىن شەشۋدى جۇكتەدى. ول وسى ماقساتتارعا قاجەتتى قاراجاتتى تاۋىپ بەرۋگە ۋادە بەردى. الدىن الا ەسەپتۋلەر بويىنشا قالا كوشەلەرىنە جارىق شامدارىن ورناتۋعا ءبىر ميللياردتان استام قارجى كەرەك.
– وكىنىشكە قاراي، وبلىس ورتالىعىن اباتتاندىرۋ تەك بيۋدجەت پەن دەمەۋشىلەر قارجىسىنىڭ ەسەبىنەن جۇرگىزىلىپ وتىر، – دەدى بولات باقاۋوۆ. – كاسىپكەرلەر بۇل جۇمىستارعا مۇلدەم قاتىسپايدى. ءار بيزنەسمەن ءوز كاسىبىن اشقان اۋماقتا، مەيلى ول، جانار-جاعارماي ستانسياسى، دۇكەن نەمەسە جەكە اۋلاسى بولسا دا، ول جەردى كورىكتەندىرۋگە ات سالىسۋى كەرەك. وسى ماسەلە بويىنشا ءار كاسىپكەرمەن جەكە سويلەسۋ قاجەت.
وبلىس اكىمى تەمىرجول بەكەتى مەن ۆوكزال ماڭىنداعى الاڭنىڭ جاعدايىنا نازار اۋداردى. ونىڭ ايتۋى بويىنشا، «قالا قاقپاسىن» ءتيىستى قالىپقا كەلتىرۋ قاجەت.
– وبلىس ورتالىعىن كورىكتەندىرۋ جۇمىستارى تۋرالى جينالىستاردى اي سايىن وتكىزىپ تۇرامىن، – دەدى ول. – پاۆلودار – ءبىزدىڭ ورتاق ءۇيىمىز، ونى كورىكتەندىرۋ جۇمىستارىنا بيلىك تە، قوعام وكىلدەرى دە، كاسىپكەرلەر مەن تۇرعىندار دا بىردەي ات سالىسۋلارى قاجەت.
پاۆلودار وبلىسى اكىمىنىڭ باسپا ءسوز قىزمەتى
سۋرەتتەردى تۇسىرگەن ۆالەريي بۋگايەۆ
