2025 جىلدىڭ 25 ساۋىرىندە اباي ۋنيۆەرسيتەتىندە مانساپ ورتالىعىنىڭ ۇيىمداستىرۋىمەن ءداستۇرلى «بوس ورىندار جارمەڭكەسى – 2025» ءىس-شاراسى ءوتتى،– دەپ حابارلايدى Dalanews.kz
جارمەڭكەنىڭ ماقساتى – جۇمىس بەرۋشىلەر مەن ءبىتىرۋشى تۇلەكتەر اراسىندا تىكەلەي بايلانىس ورناتىپ، ەڭبەك نارىعىندا سۇرانىسقا يە ماماندىقتاردى ايقىنداۋ. وسى ارقىلى ءبىلىم بەرۋ مازمۇنىن ەڭبەك نارىعىنىڭ تالاپتارىنا ساي بەيىمدەۋ كوزدەلگەن.
ءىس-شارا بارىسىندا اكادەميالىق ماسەلەلەر جونىندەگى دەپارتامەنت ديرەكتورى حايرۋللا جانبەكوۆ قاتىسۋشىلاردى قۇتتىقتاپ، جۇمىس بەرۋشىلەرگە ريزاشىلىعىن ءبىلدىردى. ول سونىمەن قاتار تۇلەكتەردى جۇمىسپەن قامتۋعا باعىتتالعان جوبالار تۋرالى ايتتى. مانساپ ورتالىعىنىڭ تۇراقتى تۇردە تۇلەكتەردى جۇمىسپەن قامتۋعا باعىتتالعان ءبىرقاتار باستامالارى بار. ولاردىڭ قاتارىندا «جۇمىس بەرۋشىلەر ايلىعى – 2025»، «سۇقبات: جۇمىس بەرۋشىگە ءوزىڭدى دالەلدە» جانە «ديپلوممەن اۋىلعا» باعدارلاماسى اياسىنداعى «بىلىكتى مامان تۋعان جەرىندە» سياقتى جوبالار تۇلەكتەردىڭ كاسىبي داعدىلارىن دامىتۋعا باعىتتالعان.
«بوس ورىندار جارمەڭكەسى – 2025» – تۇلەكتەر مەن جۇمىس بەرۋشىلەر اراسىنداعى تىكەلەي بايلانىستى قامتاماسىز ەتەتىن ماڭىزدى الاڭ. جارمەڭكە ارقىلى ءبىلىم الۋشىلارىمىز بولاشاق جۇمىس ورنىن تابۋعا، ال جۇمىس بەرۋشىلەر بىلىكتى مامانداردى ىرىكتەۋگە ناقتى مۇمكىندىك الادى. بۇل شارا تەك جۇمىس ىزدەۋ الاڭى عانا ەمەس، ەڭبەك نارىعىنىڭ سۇرانىسىن تەرەڭ تۇسىنۋگە جول اشاتىن ورتا. الداعى ۋاقىتتا دا وسىنداي ءىس-شارالاردى كەڭەيتىپ، تۇلەكتەردىڭ كاسىبي الەۋەتىن ارتتىرۋدى جالعاستىرامىز، – دەدى مانساپ ورتالىعىنىڭ جەتەكشىسى، PhD راقىمبەردى جەتىباي.
بيىلعى جارمەڭكەگە 130-دان استام ۇيىم قاتىسىپ، 881 بوس جۇمىس ورنىن ۇسىندى. الدىن الا جۇرگىزىلگەن جۇمىستاردىڭ ناتيجەسىندە ەلىمىزدىڭ ءتۇرلى ايماقتارىنان اباي ۋنيۆەرسيتەتىنىڭ تۇلەكتەرىنە ارنالعان 4112 بوس جۇمىس ورنى تۋرالى سۇرانىس تۇسكەن.
ءىس-شاراعا قاتىسقان قازاق ءتىلى مەن ادەبيەتى ماماندىعىنىڭ 4 كۋرس ءبىلىم الۋشىسى ارۋجان ابيدەنوۆا جارمەڭكەنىڭ بەرەرى مول ەكەنىن ايتتى7
«ءبىز ءۇشىن ءدال وسىنداي كەزدەسۋلەر وتە قاجەت. جۇمىس بەرۋشىلەرمەن بەتپە-بەت سويلەسىپ، ناقتى تالاپتارىن ەستىپ، وزىمىزگە لايىق ۇسىنىستاردى قاراستىرۋ – ۇلكەن تاجىريبە. بۇل جارمەڭكە بولاشاق ماماندىعىمىزدى سەنىمدى باستاۋعا جاقسى مۇمكىندىك بەردى»، – دەدى ول.
«بيىلعى جارمەڭكەگە قاتىسۋ ارقىلى ءبىز جاس ماماندارمەن تىكەلەي تانىسىپ، ولاردىڭ الەۋەتىن باعالاۋ مۇمكىندىگىنە يە بولدىق. اباي ۋنيۆەرسيتەتىنىڭ تۇلەكتەرى زاماناۋي بىلىممەن قارۋلانعان، ەڭبەك نارىعىنا بەيىمدەلگەن ماماندار ەكەنىن بايقادىق»، – دەدى الماتى قالاسى ءبىلىم باسقارماسىنا قاراستى ناۋرىزباي اۋداندىق ءبىلىم ءبولىمىنىڭ باسشىسى سالتانات كۋساينوۆا.
جارمەڭكە ءبىتىرۋشى تۇلەكتەر مەن جۇمىس بەرۋشىلەر اراسىندا اشىق ديالوگ جۇرگىزۋگە مۇمكىندىك بەرىپ، ولاردىڭ تىكەلەي جۇمىسقا ورنالاسۋىنا سەپتىگىن تيگىزدى. مۇنداي فورماتتاعى ءىس-شارالار تۇلەكتەردىڭ ەڭبەك نارىعىنا بەيىمدەلۋىنە، كاسىبي باعىت-باعدارىن ناقتى ايقىنداۋىنا جانە بولاشاق مانسابىن سانالى تۇردە جوسپارلاۋىنا ىقپال ەتەدى. اباي ۋنيۆەرسيتەتى الداعى ۋاقىتتا دا ستۋدەنتتەردىڭ تابىستى جۇمىسقا ورنالاسۋىنا قولداۋ كورسەتەتىن ءتيىمدى الاڭدار ۇسىنۋدى جالعاستىرا بەرمەك.
