عىلىم جانە جوعارى ءبىلىم ءمينيسترى ساياسات نۇربەك “بولاشاق” حالىقارالىق باعدارلاماسى اياسىندا بيۋدجەت قاراجاتىن قايتارۋ تەتىگىنە قاتىستى دەپۋتاتتىق ساۋالعا جاۋاپ بەردى، دەپ حابارلايدى Dalanews.kz.
ءمينيستردىڭ ايتۋىنشا، باعدارلاما 1993 جىلى تالانتتى جاستاردى شەتەلدىڭ جەتەكشى وقۋ ورىندارىندا وقىتۋ ارقىلى بىلىكتى ماماندار دايارلاۋ جانە ەلدىڭ كادرلىق الەۋەتىن كۇشەيتۋ ماقساتىندا ىسكە قوسىلعان.
بۇعان دەيىن، ياعني 2010 جىلعا دەيىن، وقۋ شىعىندارىن قايتارماعان جاعدايدا سالىناتىن ايىپپۇل كولەمى ناقتى جۇمسالعان قاراجاتتىڭ 25 پايىزىن قۇراعان. الايدا بۇل تالاپتارعا بايلانىستى قاتىسۋشىلار تاراپىنان شاعىمدار كوبەيگەن سوڭ، ايىپپۇل 10 پايىزعا دەيىن تومەندەتىلگەن.
مينيسترلىك مالىمەتىنشە، بۇل تەتىك تيىمدىلىگىن كورسەتكەن. 2013 جىلدان بەرى بيۋدجەتكە 14،5 ملرد تەڭگە قايتارىلعان. ونىڭ ىشىندە 2024 جىلى – 2،49 ملرد تەڭگە، 2025 جىلى – 2،29 ملرد تەڭگە، ال 2026 جىلدىڭ العاشقى توقسانىندا 378،5 ملن تەڭگە وندىرىلگەن.
“قولدانىستاعى قۇقىقتىق رەتتەۋ بيۋدجەت قاراجاتىنىڭ قايتارىلۋىن قامتاماسىز ەتەتىن جەتكىلىكتى ءارى ءتيىمدى قۇرالداردى قامتيدى”، – دەدى ساياسات نۇربەك.
سونىمەن قاتار ول ايىپپۇلدى ۇلعايتۋ ماسەلەسىنە دە توقتالدى.
“تۇراقسىزدىق ايىبىنىڭ كولەمىن ارتتىرۋ قارجىلىق جاۋاپكەرشىلىك تەتىكتەرىن ودان ءارى جەتىلدىرۋ تۇرعىسىنان ورىندى. الايدا بۇل باستامانى ىسكە اسىرۋ ءۇشىن مەملەكەتتىك ورگاندار مەن مۇددەلى ۇيىمداردى تارتا وتىرىپ، جان-جاقتى تالداۋ جۇرگىزۋ قاجەت”، – دەپ اتاپ ءوتتى مينيستر.
