Ǵylym jáne joǵary bilim ministri Saiasat Nurbek “Bolashaq” halyqaralyq baǵdarlamasy aiasynda biýdjet qarajatyn qaitarý tetigine qatysty depýtattyq saýalǵa jaýap berdi, dep habarlaidy Dalanews.kz.
Ministrdiń aitýynsha, baǵdarlama 1993 jyly talantty jastardy sheteldiń jetekshi oqý oryndarynda oqytý arqyly bilikti mamandar daiarlaý jáne eldiń kadrlyq áleýetin kúsheitý maqsatynda iske qosylǵan.
Buǵan deiin, iaǵni 2010 jylǵa deiin, oqý shyǵyndaryn qaitarmaǵan jaǵdaida salynatyn aiyppul kólemi naqty jumsalǵan qarajattyń 25 paiyzyn quraǵan. Alaida bul talaptarǵa bailanysty qatysýshylar tarapynan shaǵymdar kóbeigen soń, aiyppul 10 paiyzǵa deiin tómendetilgen.
Ministrlik málimetinshe, bul tetik tiimdiligin kórsetken. 2013 jyldan beri biýdjetke 14,5 mlrd teńge qaitarylǵan. Onyń ishinde 2024 jyly – 2,49 mlrd teńge, 2025 jyly – 2,29 mlrd teńge, al 2026 jyldyń alǵashqy toqsanynda 378,5 mln teńge óndirilgen.
“Qoldanystaǵy quqyqtyq retteý biýdjet qarajatynyń qaitarylýyn qamtamasyz etetin jetkilikti ári tiimdi quraldardy qamtidy”, – dedi Saiasat Nurbek.
Sonymen qatar ol aiyppuldy ulǵaitý máselesine de toqtaldy.
“Turaqsyzdyq aiybynyń kólemin arttyrý qarjylyq jaýapkershilik tetikterin odan ári jetildirý turǵysynan oryndy. Alaida bul bastamany iske asyrý úshin memlekettik organdar men múddeli uiymdardy tarta otyryp, jan-jaqty taldaý júrgizý qajet”, – dep atap ótti ministr.
