بىرەۋ كەلىپ قۇلدىق قامىتتى موينىمىزدان الىپ تاستايدى. ءبىز قايتادان بارىپ سوعان باسىمىزدى تىعا بەرەدى ەكەنبىز. ويتكەنى، موينىمىز قامىتقا ابدەن ۇيرەنگەن.
قوعامنىڭ باسى تابىتقا جەتكەنشە قالمايتىن نەتكەن بەرىك قامىت بۇل؟
«سوقىر تاۋىق كورگەنىنەن جازبايدى» دەگەن بار. ءبىزدىڭ دە بار كورگەنىمىز كسرو، كوكسەگەنىمىز دە كسرو. باسقانى كىنالاپ كەرەگى جوق. بار پالە وزىمىزدە. دالەل ىزدەپ الىسقا بارۋدىڭ قاجەتى شامالى.
27 قازان كۇنى اتىراۋداعى «مۇنايشى» ستاديونىندا كسرو فۋتبول قۇراماسىنىڭ ارداگەرلەرى مەن مۇنايلى وڭىردەگى ارداگەر-فۋتبولشىلاردىڭ جولداستىق كەزدەسۋى ءوتتى.
ءبىرىنشى تايمدا ورىس ويىنشىلارى بەس دوپ سالدى. اتىراۋ ءباسپاسوزى «كەزىندە الەمدىك دوپ دوداسىندا وداقتىڭ نامىسىن قورعاعان شەبەرلەرگە قارسى تۇرۋ اتىراۋلىق ارداگەر-فۋتبولشىلارعا وڭايعا تۇسكەن جوق»، دەپ جازدى. اقىرى 6:2 ەسەبىمەن كسرو-نىڭ ارداگەر-فۋتبولشىلارى جەڭىسكە جەتتى.
«كسرو-نىڭ ارداگەر-فۋتبولشىلارىنىڭ قۇرامىندا قاقپاشى رينات داسايەۆ، ولەگ رومانسيەۆ، يگور بەلانوۆ، ۆاگيز حيدياتۋللين، يۋريي كوۆتۋن، ۆالەريي كەچينوۆ، يۋريي گاۆريلوۆ، ۆالەريي شماروۆ سىندى الەمگە ايگىلى شەبەرلەر وينادى»، دەگەن اقپاراتتى وقىپ وتىرىپ ويعا قالاسىز. قارتايسا دا قاتاردان قالمايتىن نەتكەن مىقتىلار بۇلار؟
«الەمگە ايگىلى» دەپ دابىرايتاتىن ءبىز عانا.
كەز كەلگەن شەتەلدىكتەن سۇراپ كورىڭىزشى، وسى اتالعان فۋتبولشىنىڭ بىرەۋىن دە بىلمەيدى.
وسى فۋتبول ارداگەرلەرى دەپ اسپەتتەپ وتىرعان ادامدار بىرەسە اتىراۋدا، بىرەسە الماتىدا، ەندى بىردە استانادا جولداستىق كەزدەسۋلەر وتكىزىپ جاتادى. نە ءۇشىن؟ قانداي قارجىعا؟
«سول كەزدەگى فۋتبولدى ساعىنعانىمىز» ءۇشىن بە؟ جوق،
ءبىزدىڭ قازاقتار فۋتبولدى ەمەس، كسرو-نى ساعىنادى.
ۇيىندە جاتقان رەسەيلىك زەينەتكەرلەر اقشاسىن تولەپ، استىنا تاي، الدىنا ماي توسىپ، بىرەۋلەر وبەكتەپ جاتسا نەسى كەتەدى؟ كەلەدى. ىشەدى. جەيدى. كەتەدى. ال سولاردان نە ۇيرەندىك؟ قازاقستان فۋتبولى كسرو دەڭگەيىنە قاراپ وسەتىن بولسا، جەتىسكەن ەكەنبىز. نەگە الەمگە ايگىلى پەلە كەلىپ، بىزبەن فۋتبول وينامايدى؟ ويتكەنى، ول مۇنىڭ ۇيات ەكەنىن بىلەدى.
تەك فۋتبول ەمەس، قازىرگى تاڭدا قازاقستان ارنالارىن دا كسرو ەلەسى كەزىپ ءجۇر. ورت ارناسى سونىڭ ايقىن دالەلى. رەسەيدىڭ «مەرزىمى وتكەن» جۇلدىزدارى قازاقستان اسپانىن «جاۋلاپ الۋعا» اسىعادى. جايىلىپ جاستىق، ءيىلىپ توسەك بولاتىن مۇنداي ەلدى ولار الەمنىڭ باسقا جەرىنەن يتپەن ىزدەسە دە تابا الار ما ەكەن؟
بولات پەن بالعادان جاسالعان كسرو كويلەگى كونەرمەيدى ەكەن. ەشبىر ەل ول كويلەكتى قايتا كيگىسى كەلمەيدى. سىرەسىپ جۇرگىسى كەلمەيدى. تەك ءبىزدىڭ ەل عانا ءوز ەركىمەن كسرو كويلەگىن ۇستىنەن تاستاعىسى كەلمەيدى.
«ەركىمەن» دەگەندى ءسال ارتىق ايتقان سياقتىمىز. قۇلدا ەرىك بولمايدى ەكەن عوي!
نۇرتورە ءجۇسىپ
فەيسبۋكتەگى پاراقشاسىنان
