Bireý kelip quldyq qamytty moınymyzdan alyp tastaıdy. Biz qaıtadan baryp soǵan basymyzdy tyǵa beredi ekenbiz. Óıtkeni, moınymyz qamytqa ábden úırengen.
Qoǵamnyń basy tabytqa jetkenshe qalmaıtyn netken berik qamyt bul?
«Soqyr taýyq kórgeninen jazbaıdy» degen bar. Bizdiń de bar kórgenimiz KSRO, kóksegenimiz de KSRO. Basqany kinálap keregi joq. Bar pále ózimizde. Dálel izdep alysqa barýdyń qajeti shamaly.
27 qazan kúni Atyraýdaǵy «Munaıshy» stadıonynda KSRO fýtbol quramasynyń ardagerleri men munaıly óńirdegi ardager-fýtbolshylardyń joldastyq kezdesýi ótti.
Birinshi taımda orys oıynshylary bes dop saldy. Atyraý baspasózi «kezinde álemdik dop dodasynda Odaqtyń namysyn qorǵaǵan sheberlerge qarsy turý atyraýlyq ardager-fýtbolshylarǵa ońaıǵa túsken joq», dep jazdy. Aqyry 6:2 esebimen KSRO-nyń ardager-fýtbolshylary jeńiske jetti.
«KSRO-nyń ardager-fýtbolshylarynyń quramynda qaqpashy Rınat Dasaev, Oleg Romansev, Igor Belanov, Vagız Hıdıatýllın, Iýrıı Kovtýn, Valerıı Kechınov, Iýrıı Gavrılov, Valerıı Shmarov syndy álemge áıgili sheberler oınady», degen aqparatty oqyp otyryp oıǵa qalasyz. Qartaısa da qatardan qalmaıtyn netken myqtylar bular?
«Álemge áıgili» dep dabyraıtatyn biz ǵana.
Kez kelgen sheteldikten surap kórińizshi, osy atalǵan fýtbolshynyń bireýin de bilmeıdi.
Osy fýtbol ardagerleri dep áspettep otyrǵan adamdar birese Atyraýda, birese Almatyda, endi birde Astanada joldastyq kezdesýler ótkizip jatady. Ne úshin? Qandaı qarjyǵa?
«Sol kezdegi fýtboldy saǵynǵanymyz» úshin be? Joq,
bizdiń qazaqtar fýtboldy emes, KSRO-ny saǵynady.
Úıinde jatqan reseılik zeınetkerler aqshasyn tólep, astyna taı, aldyna maı tosyp, bireýler óbektep jatsa nesi ketedi? Keledi. İshedi. Jeıdi. Ketedi. Al solardan ne úırendik? Qazaqstan fýtboly KSRO deńgeıine qarap ósetin bolsa, jetisken ekenbiz. Nege álemge áıgili Pele kelip, bizben fýtbol oınamaıdy? Óıtkeni, ol munyń uıat ekenin biledi.
Tek fýtbol emes, qazirgi tańda Qazaqstan arnalaryn da KSRO elesi kezip júr. ORT arnasy sonyń aıqyn dáleli. Reseıdiń «merzimi ótken» juldyzdary Qazaqstan aspanyn «jaýlap alýǵa» asyǵady. Jaıylyp jastyq, ıilip tósek bolatyn mundaı eldi olar álemniń basqa jerinen ıtpen izdese de taba alar ma eken?
Bolat pen balǵadan jasalǵan KSRO kóılegi kónermeıdi eken. Eshbir el ol kóılekti qaıta kıgisi kelmeıdi. Siresip júrgisi kelmeıdi. Tek bizdiń el ǵana óz erkimen KSRO kóılegin ústinen tastaǵysy kelmeıdi.
«Erkimen» degendi sál artyq aıtqan sıaqtymyz. Qulda erik bolmaıdy eken ǵoı!
Nurtóre Júsip
Feısbýktegi paraqshasynan
