باتىس قازاقستان وبلىسىنا قاراستى شىڭعىرلاۋ اۋدانىنىنىڭ  تەمىرجولشىلار مەملەكەت باسشىسى قاسىم-جومارت توقايەۆقا وزدەرىنىڭ جۇمىسسىز قالۋى مۇمكىن ەكەنىن ايتىپ، كومەك سۇرادى، – دەپ حابارلايدى «موي گورود» گازەتى.

– بىزدەر 2017 جىلدان بەرى تەمىرجول وتكىلدەرىن كۇزەتۋ ىسىمەن اينالىسىپ كەلەمىز. ءبىز كۇزەتەتىن اۋماقپەن «نۇر-سۇلتان – ورال» باعىتىنداعى جۇردەك پويىز وتەدى. باسشىلىق 13 مامىردان باستاپ جول بويىندا كۇزەت ۇستاۋ شىعىندى اقتامايتىنىن ايتىپ، كۇزىت قىزمەتىن قىسقارتۋدى جوسپارلاپ وتىر. ءبىزدىڭ جۇمىسىمىز جىلدار بويى ادامداردىڭ ءومىرىن ساقتاپ كەلدى. كۇن سايىن تەمىرجول وتكەلدەرىمەن اۆتوكولىك پەن مال ايداعان حالىق وتەدى. ءبىز ولاردىڭ قاۋىپسىزدىگىن قامتاماسىز ەتىپ كەلدىك. مۇنى باسشىلىق ءتۇسىنىپ وتىرعان جوق. قۇرمەتتى پرەزيدەنت مىرزا، وسى ىسكە ارالاسىپ، ءبىزدىڭ جۇمىس ورنىمىزدى ساقتاپ قالۋعا كومەك كورسەتۋىڭىزدى سۇرايمىز، – دەپ بقو تەمىرجولشىلارى ءوز ءوتىنىشىن جەتكىزدى.

توقايەۆقا باعىتتالعان ۆيدەو ۇندەۋ 1 مامىر كۇنى جازىلعان. 2 مامىر كۇنى شىڭعىرلاۋ اۋدانى اكىمنىڭ ورىنباسارى ازامات بيسەمبايەۆ وسى ماسەلە بويىنشا كەڭەس وتكىزىپ، تۇيتكىلدى شەشۋگە كۇش سالىپ جاتقانىن جەتكىزدى.

ولار الداعى ۋاقىتتا قتج باسشىلىعىمەن دە كوزدەسپەكشى ەكەن. اكىم ورىنباسارى بۇل ماسەلە اكىمدىكتىڭ باقىلاۋىندا ەكەنىن العا تارتقان.