الماتىدا اۆتوبۋستا بىرنەشە تۇرعىن شەتەلدىك ازاماتتى سوققىعا جىققان، دەپ حابارلايدى Dalanews.kz.
الەۋمەتتىك جەلىلەردە تارالعان، الماتى قالاسىنداعى قوعامدىق كولىكتەردىڭ بىرىندە بۇزاقىلىق سيپاتىنداعى ارەكەت بەينەلەنگەن بەينەجازباعا بايلانىستى پوليسيا تاراپىنان جەدەل تۇردە تەكسەرۋ جانە ىزدەستىرۋ شارالارى باستالدى.
وقيعا 18 جەلتوقساندا بولعان. بۇل دەرەك بويىنشا پوليسيا ورگاندارىنا رەسمي ارىز-شاعىم نەمەسە حابارلاما تۇسپەگەن. قوعامدىق كولىك جۇرگىزۋشىسى جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا دەر كەزىندە شارا قولدانىپ، ءتارتىپ بۇزۋشىنى اۆتوبۋستان تۇسىرگەن.
سونىمەن قاتار، اتالعان بۇزاقىلىق فاكتىسى بويىنشا قىلمىستىق ءىس قوزعالدى. قازىرگى ۋاقىتتا كۇدىكتىنى انىقتاۋ جانە ۇستاۋعا باعىتتالعان جەدەل-ىزدەستىرۋ ءىس-شارالارى جۇرگىزىلۋدە. سونداي-اق اۆتوبۋستا بولعان شەتەل ازاماتىنىڭ جانە وزگە دە تۇلعالاردىڭ جەكە باسى انىقتالۋدا.
پوليسيا قوعامدىق ءتارتىپتى ورەسكەل بۇزاتىن، قوعامعا اشىق تۇردە قۇرمەتسىزدىك تانىتاتىن، جالپىعا ورتاق مىنەز-قۇلىق نورمالارىنا قايشى كەلەتىن دورەكى ءارى ارسىز ارەكەتتەر ءۇشىن زاڭنامادا اكىمشىلىك تە، قىلمىستىق تا جاۋاپكەرشىلىك كوزدەلگەنىن ەسكە سالادى.
