26 جاستاعى قازاقستاندىق اسەم ەسىمدى قىز 6 ناۋرىز كۇنى ۆەتنامنىڭ حوشيمين قالاسىندا بايلانىسقا شىعۋىن توقتاتقان. بۇل تۋرالى قىزدىڭ اپكەسى الەۋمەتتىك جەلىدە جازبا جاريالاپ، كومەك سۇرادى، دەپ حابارلايدى Dalanews.kz

تۋىستارىنىڭ ايتۋىنشا، اسەم سول كۇنى حانوي قالاسىنا ۇشىپ بارىپ، قازاقستان كونسۋلىمەن كەزدەسۋدى جوسپارلاعان. الايدا اۋەجايعا شامامەن 20 شاقىرىم قالعاندا ول بايلانىسقا شىقپاي قالعان.

جاقىندارىنىڭ سوزىنشە، جوعالار الدىندا قىز قاتتى قورقىپ جۇرگەنىن جانە ءوزىن بىرەۋلەر اڭدىپ جۇرگەنىن ايتقان.

قازىرگى ۋاقىتتا اسەمنىڭ وتباسى ۆەتنامدا نەمەسە كورشىلەس ەلدەردە جۇرگەن ازاماتتاردان كومەك سۇراپ وتىر. سونداي-اق ولار تۋريستىك جانە جەرگىلىكتى WhatsApp، Telegram توپتاردا اقپارات تاراتۋعا شاقىردى.

«ەگەر ۆەتنامدا تۇراتىن تانىستارىڭىز نەمەسە تۋىستارىڭىز بولسا، بىزبەن حابارلاسۋلارىڭىزدى سۇرايمىز. مۇمكىندىك بولسا، پوليسيا مەن اۋرۋحانالارعا دا حابارلاسىپ كورۋگە كومەكتەسىڭىزدەر»، – دەدى جوعالعان قىزدىڭ اپكەسى.

قىزدىڭ تۋىستارى ونى ىزدەستىرۋگە قاتىستى كەز كەلگەن اقپارات ماڭىزدى ەكەنىن ەسكەرتتى.