قازاقستاندىق ايەل BI Group كومپانياسىنىڭ بەيرەسمي ۇجىمدىق شاراعا قاتىسپاعانى ءۇشىن كۇيەۋىنىڭ جالاقىسىنان اقشا ۇستاپ قالعانىنا نارازىلىق ءبىلدىردى. ونىڭ سوزىنشە، كومپانيانىڭ 30 جىلدىعىنا وراي ۇيىمداستىرىلعان مەرەكەلىك جيىنعا بارماعان قىزمەتكەرلەرگە 256 مىڭ تەڭگە كولەمىندە «ايىپپۇل» سالىناتىنى ايتىلعان. ايەل بۇل تالاپتى ادىلەتسىز دەپ ەسەپتەيدى، دەپ حابارلايدى Dalanews.kz.

"قىزمەتكەرلەردىڭ مەرەكەلىك كەشكە قاتىسۋى نەگە مىندەتتى؟"

Threads الەۋمەتتىك جەلىسىندە جاريالانعان جازبادا ايەل ادامنىڭ كۇيەۋى BI Group كومپانياسىندا جۇمىس ىستەيتىنى كورسەتىلگەن.

«قۇرمەتتى BI Group باسشىلىعى، نەگە كورپوراتيۆتىك كەشكە بارماعان قىزمەتكەرلەردىڭ جالاقىسىنان اقشا ۇستايسىزدار؟ 21 ماۋسىمدا بۋرابايدا 30 جىلدىق مەرەيتوي وتكىزىپ جاتىرسىزدار. ەندى سول كەشتىڭ تولىق قۇنىن جۇمىسشىنىڭ جالاقىسىنان الىپ قالماقسىزدار»، – دەپ جازدى قولدانۋشى.

ول مۇنداي شارالارعا قاتىسۋشىلاردى الدىن الا ساۋالناما ارقىلى ناقتىلاۋ كەرەك ەدى دەپ سانايدى. ونىڭ ايتۋىنشا، ءار ادامنىڭ ءوز جوسپارلارى بار، ال سوڭىنان قاتىسپاعانى ءۇشىن جازالاۋ – ادىلەتسىزدىك. سونىمەن قاتار، ايەل كومپانيا قىزمەتكەرلەرىن سەنبىلىككە شىعارىپ، مەكەمە ماڭىن تازالاۋعا ماجبۇرلەيتىنىن دە ايتىپ ءوتتى.

"تازالىققا جۇمىسشىلار ەمەس، ارنايى ماماندار جاۋاپتى بولۋى كەرەك"

"BI Group قىزمەتكەرلەرى مەكتەپ قۇرىلىسى ءجۇرىپ جاتقان جەرلەردە قوقىس جيناۋعا ءماجبۇر. نەگە ارنايى كلينينگ شاقىرمايسىزدار؟ تۇنگى 1-2-گە دەيىن ۇستاپ، باستىق نە اكىم كەلەتىن بولعاندا عانا ءبارىن جاپپاي جۇمىلدىرادى. بۇل ەڭبەك شارتىندا كورسەتىلمەگەن"، – دەيدى جازبا اۆتورى.

كومپانيا نە دەيدى؟

پىكىرگە جاۋاپ رەتىندە كومپانيا قىزمەتكەرلەرى جانە باسپا ءسوز قىزمەتى تۇسىنىكتەمە بەردى. ولاردىڭ ايتۋىنشا، ۇجىمدىق ءىس-شاراعا قاتىسۋ مىندەتتى ەمەس، جانە بۇل تۋرالى الدىن الا ساۋالناما جۇرگىزىلگەن.

"قىزمەتكەرلەر ەشقاشان ماجبۇرلەنبەيدى. «جاناشىرلىق» دەگەن كورپوراتيۆتىك مادەنيەت بار. كەي كەزدە ۇجىم ءوز ەركىمەن بىرىگىپ كومەكتەسەدى. بۇل – ۇجىمدىق رۋحتى نىعايتۋ ءتاسىلى"، – دەپ جازدى قىزمەتكەرلەردىڭ ءبىرى.

BI Group باسپا ءسوز قىزمەتىنىڭ مالىمەتىنشە، ەكى اي بۇرىن قىزمەتكەرلەرگە شاقىرتۋ بەرىلىپ، ولار شاراعا قاتىساتىن-قاتىسپايتىنىن راستاعان. قاتىساتىنىن ايتقاندار ءۇشىن كولىك، جاتىن ورىن جانە قاجەتتى قۇرال-جابدىقتار الدىن الا بروندالعان.

"ەگەر ادام سوڭعى ساتتە بارۋدان باس تارتسا، كومپانيا كەتكەن شىعىندى وتەۋدى سۇراۋى مۇمكىن. ال الدىن الا باس تارتقانداردان ەشقانداي اقشا ۇستالمايدى"، – دەلىنگەن رەسمي تۇسىنىكتەمەدە.

دەر كەزىندە ەسكەرتىلمەگەن جاعداي بار

دەگەنمەن جازبا اۆتورىنىڭ جاعدايىندا كۇيەۋى ءوز كەلىسىمىن بەرمەسە دە تىزىمگە ەنگىزىلىپ كەتكەنى بەلگىلى بولدى. بۇل ماسەلە قارالىپ، ناتيجەسىندە قىزمەتكەردىڭ جالاقىسىنان قاراجات ۇستالمايتىن بولدى.

"باسشىسىمەن ءتۇسىندىرۋ جۇمىسى جۇرگىزىلدى"، – دەپ تولىقتىردى BI Group.