"قازاقستان بۋكمەكەرلەر قاۋىمداستىعى" سالانى مونوپوليالاندىرۋ جانە وعان وكم ۇلگىسى بويىنشا "تەسپەي سوراتىن" قۇرىلىم قۇرۋ يدەياسىن ۇسىنعان دەپۋتاتتى سوتقا بەرەدى. سويتسەك ول تۋريزم جانە سپورت مينيسترلىگىمەن اۋىز جالاسىپ، مەيرامحاناسىن جارنامالاۋعا بيۋدجەت اقشاسىن تولەيتىن دەپۋتات بولىپ شىقتى، - دەپ حابارلايدى Dalanews.kz.
ءماجىلىس دەپۋتاتتارى 5 ماۋسىمدا ەكىنشى وقىلىمدا "ويىن بيزنەسى، لوتەرەيا جانە لوتەرەيا قىزمەتى ماسەلەلەرى بويىنشا" زاڭ جوباسىن قابىلدادى. ءاۋ باستا ماجىلىسمەندەر كەز كەلگەن قۇرىلىمعا ۇزىلدى-كەسىلدى قارسى شىقتى. قۇمار ويىن جونىندەگى جۇمىس توبىنىڭ جەتەكشىسى ەلنۇر بەيسەنبايەۆ ستاۆكالاردى ەسەپكە الۋ ورتالىعىن "ەسكى قازاقستاننان" ىقپالدى لوببيستەرىنىڭ ايلا-امالى دەپ مىنبەردەن مالىمدەگەن.
الايدا پلەنارلىق وتىرىس الدىندا "حالىق قالاۋلىلارى" وزگەرىپ سالا بەردى. زاڭ جوباسىنىڭ قۇجاتتاماسىنا ستاۆكالاردى ەسەپكە الۋ ورتالىعىنىڭ ورنىنا رەتتەۋشىلىك اسەردى تالداۋ سىندى ءتيىستى راسىمدەردەن وتپەگەن ەسەپكە الۋدىڭ ءبىرىڭعاي جۇيەسى تۋرالى نورما كەلىپ ءتۇستى. ال دەپۋتاتتار بار جاۋاپكەرشىلىكتى ۇكىمەتكە ارتا سالدى. ەسەپكە الۋدىڭ ءبىرىڭعاي جۇيەسى جاي عانا ستاۆكالاردى ەسەپكە الۋ ورتالىعىنىڭ اتاۋىن وزگەرتۋ ەمەس، قازاقستاننىڭ زاڭى مەن كودەكسىنە قايشى كەلسە دە، بىردەن بىرنەشە سالانىڭ جۇگىپ ارقالاپ، نارىق ويىنشىلارىن رەتتەيتىن قىزمەتتى يەمدەنۋدى بىلدىرەدى. تۋريزم جانە سپورت مينيسترلىگى بۋكمەكەرلىك كەڭسەلەردىڭ فۋنكسياسىن اتقارىپ قانا قويماي، قارجى نارىعىندا مونوپوليالاۋعا بەت بۇردى. بۇل رەتتە، ۇلتتىق بانك ەشتەڭە سۇراعان جوق.
بۋكمەكەرلىك قاۋىمداستىقتىڭ پىكىرىنشە، زاڭ جوباسىندا لۋدومانداردىڭ سانى، شاڭىراقتىڭ شايقالۋى، قۇمار ويىنشىنىڭ ورتاشا قارىزى جانە قۇمار ويىن كەسىرىنەن جاسالعان قىلمىس تۋرالى اقپارات باستاپقىدا جاڭساق مالىمەتتەرگە نەگىزدەلگەن. ال مۇنى پارلامەنت تورىندە رۋسلان بەردەنوۆ ءبىر جىل بۇرىن ايتقان ەدى. بۇل دەرەكتەردىڭ قاتە ەكەنىنە وسىنداي ستاتيستيكا جۇرگىزۋگە جاۋاپتى مينيسترلىكتەر مەن ۆەدومستۆولاردىڭ رەسمي جاۋاپتارى دالەل. بۋكمەكەرلەردىڭ ايتۋىنشا، مۇنداي ستاتيستيكا جوق، ونى باس پروكۋراتۋرا دا، ۇلتتىق بانك تە، ءتىپتى ادىلەت مينيسترلىگى دە جۇرگىزبەيدى.
بۇعان دەيىن قازاقستان بۋكمەكەرلەر قاۋىمداستىعى دەپۋتات بەردەنوۆتىڭ ۇستىنەن شاعىم ءتۇسىرىپ، ءتىپتى بۇۇ باس اسسامبلەياسىنىڭ ادام قۇقىقتارى جونىندەگى جالپىعا بىردەي دەكلاراسياسىنىڭ 19-بابىندا كورسەتىلگەندەي جاۋاپ الىپ ۇلگەردى: "ءار ادام نانىم-سەنىم بوستاندىعىنا جانە ءوز كوزقاراسىن ەركىن بىلدىرۋىنە قۇقىعى بار؛ بۇل قۇقىق ءوز نانىم-سەنىمىن كەدەرگىسىز ۇستانۋ ەركىندىگىن جانە مەملەكەتتىك شەكارالار تارتىبىنە تاۋەلدى بولىپ قالماي، اقپاراتتار مەن يدەيالاردى ەركىن ىزدەپ، كەز كەلگەن قۇرالدار ارقىلى تاراتۋ بوستاندىعىن دا قامتيدى".
ءقازىر بەردەنوۆتىڭ ۇستىنەن سوتقا شاعىم ءتۇستى، ەندى ونىڭ كىمنىڭ مۇددەسى ءۇشىن وسىنداي مالىمدەمە جاساعانىن ايتۋىنا تۋرا كەلەدى. ءماجىلىس دەپۋتاتتارى ەكىنشى وقىلىمدا پروسەستىك بۇزۋشىلىقتارمەن قابىلداعان زاڭ جوباسى ەندى سەناتقا بارادى. وسى ورايدا، سەناتورلار ءبىرقاتار قىزىقتى فاكتىنى ەسكەرۋى كەرەك.
ستاۆكالاردى ەسەپكە الۋ ورتالىعىن زاڭنان الىپ تاستاۋدان باسقا ءىستى قايتا قاراۋ پرەمەر-مينيستر ولجاس بەكتەنوۆتىڭ رەسەيلىك سپورتتىق بولجامدى ءبىرىڭعاي رەتتەۋشىنى تانىستىرعانعا دەيىن بولعان. مۇنىڭ استارىندا رەيدەرلىكپەن لوتەرەيا نارىعىن مونوپوليالاعان، بۋكمەكەرلىك كەڭسەلەردەن ۇلەس العان، سودان كەيىن بۇكىل قالانى ۋىسىندا ۇستاعان (پروتۆينو مەن پۋششينو عىلىمي قالالارى تىكەلەي رەسەيدىڭ بيۋدجەتىنەن قارجىلاندىرىلادى) رەسەيلىك الدەبىر تۇلعانىڭ ەسىمىمەن بايلانىستى كۇماندى وقيعا جاتىر.
ەستەرىڭىزدە بولسا، ءبىر اي بۇرىن استاناعا حالىقارالىق بوكس فەدەراسياسىنىڭ (IBA) پرەزيدەنتى، سونداي-اق ستاۆكالاردى ەسەپكە الۋ ورتالىعىنىڭ رەسەيلىك نۇسقاسى – "ەدينىي سۋپيس" كومپانياسىنىڭ تەڭ يەسى ۋمار كرەمليەۆ كەلگەن ەدى. سول كەزدە قازاقستانعا رەسەيلىك ۇلگىمەن ستاۆكالاردى ەسەپتكە الۋ ورتالىعىن/سپورتتىق بولجامدى ءبىرىڭعاي رەتتەۋشى ەنگىزۋ تۋرالى ۇسىنىس پايدا بولدى.
كرەمليەۆتىڭ بۋكمەكەرلىك جانە لوتەرەيا قىزمەتىمەن بايلانىسى بارىن كوزى قاراقتى جۇرت بىلەدى، ءتۇرلى اقپارات كوزىندە تاراعان. ول رەسەيدىڭ پرەمەر-مينيسترى ميحايل ميشۋستينگە بۋكمەكەرلىك كەڭسەلەردى باقىلاۋدى ءبىرىڭعاي رەتتەۋشىگە تاپسىرۋدى ۇسىنعان ۇندەۋدىڭ اۆتورى. سوتتىلىعى دا بار، بوپسالاۋ مەن ۇرىپ-سوققانى ءۇشىن ەكى رەت ءىستى بولعان. سونىمەن قاتار، حالىقارالىق بوكس قاۋىمداستىعىنا ءوزى تۋرالى قاتە اقپارات بەردى دەپ تە ايىپتالعان. شىن مانىندە، كرەمليەۆ مىرزانىڭ زاڭعا قاتىستى بار ماسەلەسى ءوزىنىڭ بۇرىنعى تەگى الي-لۋتفۋللويەۆ بولعاندىعىمەن بايلانىستى.
ەگەر ستاۆكالاردى ەسەپكە الۋ ورتالىعىن (جانە ونىڭ كەز كەلگەن بالاماسىن) ىسكە قوسۋعا قاتىستى بارلىق فاكتىنى بىرىكتىرسەك، وندا مۇنىڭ تولىقتاي جوسپارلانعانىن جانە بىرنەشە جىلدان بەرى جالعاسىپ كەلە جاتقانىن اڭعارۋعا بولادى. بالكىم، اڭگىمەنىڭ ءبىر ۇشىعى متس، بەردەنوۆ، كرەمل سىندى "رەتتەۋشىلەردە" جاتسا كەرەك.
كەشە عانا قازاقستان پرەزيدەنتىنىڭ كەڭەسشىسى لاۋازىمىنا تاعايىندالعان قۋانىشبەك ەسەكەيەۆتىڭ بۇعان قانداي قاتىسى بارىن، سونداي-اق ونىڭ تۋىستارىنىڭ رەسەيلىك رەيدەرمەن قانداي ىسكەرلىك بايلانىسى بار ەكەنى ءدال ءقازىر بەيمالىم. ازىرگە، بۋكمەكەرلىك كەڭسە وكىلدەرىنىڭ ەسەكەيەۆپەن ستاۆكالاردى ەسەپكە الۋ ورتالىعىن قوسۋدى تالقىلاۋ ءۇشىن كەزدەسۋگە شاقىرىلعانى بەلگىلى.
