بۇگىن اباي وبلىسى اكىمى بەرىك ءۋاليدىڭ توراعالىعىمەن كەڭەيتىلگەن اپپاراتتىق كەڭەس ءوتتى. جيىندا وبلىستاعى زاڭسىز قۇرىلىس نىساندارى بويىنشا جۇرگىزىلىپ جاتقان جۇمىستار، 2025 جىلدىڭ قاڭتار-مامىر ايلارىنداعى ءوڭىردىڭ الەۋمەتتىك-ەكونوميكالىق دامۋى قورىتىندىلارى، 5 ايداعى بيۋدجەتتىڭ يگەرىلۋ ماسەلەسى قارالدى،- دەپ حابارلايدى Dalanews.kz

وبلىستاعى زاڭسىز قۇرىلىس نىساندارى بويىنشا جۇرگىزىلىپ جاتقان جۇمىستار تۋرالى مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى سايلاۋعالى باينازاروۆ، ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى ءانۋار بەيسەنوۆ، سەمەي قالاسى اكىمىنىڭ مىندەتىن اتقارۋشى بەكجان باپىشيەۆ باياندادى.

مەملەكەتتىك ساۋلەت-قۇرىلىس باقىلاۋ باسقارماسىنىڭ مالىمەتىنشە، كامەرالدىق باقىلاۋ بارىسىندا وبلىستا 34 زاڭسىز كوپ قاباتتى تۇرعىن ءۇي تىركەلىپ، ونىڭ 12ء-سى بويىنشا سوت شەشىمى شىققان. 15-ىنە ءتيىستى نۇسقاما بەرىلگەن. بۇل ۇيلەردەن 547 وتباسى باسپانا ساتىپ العان. وبلىس اكىمىنىڭ تاپسىرماسىمەن قۇرىلعان ۆەدومستۆوارالىق كوميسسيانىڭ ناتيجەسىندە 310 وتباسى زاڭدى مارتەبەگە يە بولىپ، باسپانالارىن راسىمدەۋگە مۇمكىندىك الدى.

جيىندا اياگوز، ءۇرجار، بەسقاراعاي جانە ماقانشى اۋداندارىنداعى ساپاسىز سالىنعان تۇرعىن ۇيلەر ماسەلەسى تۋرالى دا ايتىلدى. ايماق باسشىسى اتالعان اۋدانداردىڭ اكىمدەرىنە انىقتالعان كەمشىلىكتەردى جويۋدى، مەملەكەتتىك ساۋلەت-قۇرىلىس باقىلاۋ باسقارماسىنا زاڭسىز سالىنعان تۇرعىن ۇيلەرگە عانا ەمەس، بارلىق قۇرىلىس نىساندارىنا تالداۋ جاساۋدى، سەمەي قالاسى اكىمىنىڭ مىندەتىن اتقارۋشى بەكجان باپىشيەۆقا زاڭسىز سالىنعان تۇرعىن ۇيلەردىڭ تۇرعىندارىمەن ءتۇسىندىرۋ جۇمىستارىن جۇرگىزۋدى، ورىنباسارى سەرىك تولەنبەرگەنوۆقا جەكە باقىلاۋعا الۋدى تاپسىردى.