بۇگىن وبلىس اكىمى بەرىك ءۋالي ءوڭىردىڭ زيالى قاۋىم وكىلدەرىمەن كەزدەستى. اتاپ ايتقاندا، بۇعان دەيىن ابايدىڭ بىرنەشە مەرەيتويلارىن ۇيىمداستىرۋعا اتسالىسقان سول كەزدەگى تاجىريبەلى ماماندار، قازىرگى ايماق اقساقالدارىمەن ارنايى كەڭەس وتكىزدى،- دەپ حابارلايدى Dalanews.kz
جۇزدەسۋدىڭ باستى ماقساتى – ەلدىك ماڭىزى بار تويدى حالىقتىڭ وزىمەن كەڭەسە وتىرىپ وتكىزۋ، الدىڭعى بۋىننىڭ اقىل-كەڭەسىنە جۇگىنۋ.
كەزدەسۋدى اشقان ايماق باسشىسى الدىمەن بۇل مەرەيتويدىڭ تەك ءبىر ءوڭىردىڭ ەمەس، تۇتاس ەلدىڭ رۋحاني مەرەيلى مەجەسى ەكەنىن ايتتى.
«اباي – ءبىزدىڭ ۇلتتىق يدەيامىزدىڭ، بىرلىگىمىز بەن بولمىسىمىزدىڭ سيمۆولى. مەملەكەت باسشىسى قاسىم-جومارت كەمەل ۇلى توقايەۆ «ابايدىڭ 180 جىلدىعىن لايىقتى اتاپ ءوتۋىمىز كەرەك» دەگەن بولاتىن. وبلىسىمىز قۇرىلعاننان بەرى العاش رەت ۇلى ابايدىڭ مەرەيتويىن كەڭ كولەمدە اتاپ وتۋگە مۇمكىندىك تۋىپ وتىر. بۇل – تاريحي جاۋاپكەرشىلىك. وسى جاۋاپتى كەزەڭدە سىزدەرمەن ارنايى اقىلداسقىمىز كەلىپ وتىر. سەبەبى، وسىعان دەيىن وتكەن ابايدىڭ مەرەيتويلارىن وزدەرىڭىزدەي اعا بۋىن ابىرويمەن ۇيىمداستىردى. ول تاجىريبەلەرىڭىز بىزگە اسا قاجەت»، - دەدى وبلىس اكىمى.
جيىندا اباي وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحان، اباي اۋدانىنىڭ اكىمى مەيىرجان سماعۇلوۆ، سەمەي قالاسى اكىمىنىڭ ورىنباسارى قۋانىش ابىلدايەۆ مەرەيتويعا ارنالعان ونكۇندىكتىڭ باعدارلاماسىمەن تانىستىردى. 1 تامىز بەن 10 تامىز ارالىعىندا ابايدىڭ 180 جىلدىعىنا وراي 30-دان استام اۋقىمدى ءىس-شارا ۇيىمداستىرۋ جوسپارلانعان. مەرەكەلىك ءىس-شارالار سەمەي قالاسى، اباي اۋدانى جانە ءوڭىردىڭ وزگە دە اۋداندارىندا وتەدى. مەرەيتوي باعدارلاماسىمەن تانىسقان زيالى قاۋىم وكىلدەرى ابايدىڭ 180 جىلدىعىنا ارنالعان ءىس-شارالار جوسپارىنىڭ مازمۇندى ەكەنىن اتاپ ءوتتى.
«باعدارلامانى تولىعىمەن قولدايمىز. بارلىعى پىسىقتالعان، مۇقيات تالقىلانعان. وسى باعدارلامانىڭ 100 پايىز، تولىق ورىندالعانىن قالايمىز»، - دەدى ابايتانۋشى عالىم اراپ ەسپەنبەتوۆ.
«ابايدىڭ 180 جىلدىق مەرەيتويىنىڭ حالقىمىز ءۇشىن، اباي وبلىسىنىڭ تۇرعىندارى ءۇشىن ءمانى زور. بۇگىن تانىستىرىلعان باعدارلاما، ءىس-شارالار جوسپارىنىڭ تاعىلىمدى تۇستارىنىڭ مول ەكەنىن بايقادىق. مەرەيتويدىڭ جوعارى دەڭگەيدە وتۋىنە تىلەكتەسپىز»، – دەدى وبلىستىق ارداگەرلەر كەڭەسىنىڭ ءتوراعاسى مۇرات ءالين.
جيىندا زيالى قاۋىم وكىلدەرى ابايدىڭ 180 جىلدىعىنا بايلانىستى ۇسىنىس-پىكىرلەرىن ورتاعا سالدى. كەزدەسۋدى قورىتىندىلاعان وبلىس اكىمى جيىندا ايتىلعان ۇسىنىس-پىكىرلەردىڭ بارلىعى ەسكەرتىلەتىنىن ايتتى. مەرەيتويعا ارنالعان ونكۇندىكتىڭ باعدارلاماسى الداعى اپتادا باسپا ءسوز ءماسليحاتى ارقىلى تولىق جاريالاناتىن بولادى.
