– ءيا، لۋكاشەنكو كەڭەس وكىمەتىنەن كەزىندەگى ءبىرقاتار ءوندىرىس ورىندارىن ساقتاپ قالدى. ءقازىر «ماز» بەن بەلورۋس تراكتور زاۋىتى سەكىلدى ءوندىرىس ورىندارىنا مەملەكەتتىڭ بولگەن ازداعان قارجىسىنا ءومىر سۇرۋدە.
ەلىمىز نارىقتىق ەكونوميكاعا كوشەندە جۇك كولىكتەرىن شىعاراتىن «ماز» زاۋىتىنا شۆەسيانىڭ ايگىلى Volvo كومپانياسى قوماقتى ينۆەستيسيا سالۋعا ىقىلاس تانىتتى. ءبىراق باتكا شيەۆدتەرمەن جۇمىس ىستەۋگە ۇزىلدى-كەسىلدى قارسى بولدى. سول سياقتى بەلورۋس تراكتور زاۋىتىنا شەتەلدىك ينۆەستورلار قىزىعۋشىلىق تانىتقاندا دا، لۋاكشەنكو ولاردان دا تەرىس اينالدى.
باتىستى قۇبىجىق ەتىپ كورسەتىپ تاستاعان كەڭەس وكىمەتىنىڭ شەڭگەلىنەن ەندى عانا بوساعان بىزدەر لۋكاشەنكونىڭ بۇل ارەكەتىن وتاندىق ءوندىرىستى «قورعاۋ» دەپ ويلادىق. وكىنىشكە وراي، بۇل ويىمىزدىڭ قاتە ەكەنىن كەيىن تۇسىندىك.
مىنە، سودان بەرى 26 جىل ءوتتى. «ماز» بەن بەلورۋس تاركتور زاۋىتى دامىپ، الەمدىك نارىقتاعى ءىرى ويىنشىعا اينالعان جوق. بۇگىندە بەلورۋستا شىققان كولىكتەر مەن تراكتورلاردى باتىس ەلدەرى ساتىپ المايدى. تەك بۇرىنعى پوستكەڭەستىك ەلدەرگە زورلاعانداي قىلىپ وتكىزەمىز.
كەيبىر ەلدەردىڭ ازاماتتارى لۋكاشەنكو كولحوزدار مەن زاۋىتتاردى ساقتاپ قالدى دەپ بىزگە قىزىعا قارايتىنىن بىلەمىن. ەگەر جاعدايدىڭ استارىنا ۇڭىلسەڭىز قىزىعاتىنداي دانەڭە دە جوق. لۋكاشەنكو ەلدەگى ءوندىرىس وشاقتارىنىڭ نارىق تالابىنا ساي جۇمىس ىستەۋىنە مۇمكىندىك بەرمەدى. بىزدە جەكەشەلەندىرۋ، زامان اعىمىنا ساي دامۋ دەگەن بولعان ەمەس.
بۇگىندە «مازعا» جىل سايىن مەملەكەت تاراپىنان از-ماز قارجى بولىنەدى. سونىڭ ارقاسىندا كاسىپورىن ءۇزىلىپ-سوزىلىپ، ولمەستىڭ كۇنىن كەشۋدە. وسىلايشا لۋكاشەنكو كاسىپورىن مەن ونداعى جۇزدەگەن جۇمىسشىلاردى اشسا القانىندا، جۇمسا جۇدىرىعىندا ۇستاپ كەلدى.
ەگەر وسى كاسىپورىندارعا شەتەلدىك ينۆەستورلاردى كىرگىزسە، زاۋىتتارىمىز دامىپ، ونداعى جۇمىسشىلار لۋكاشەنكونىڭ اۋزىنا قاراماس ەدى. بۇگىندە زاۋىتتارداعى جۇمىسشىلار وسى جايتتى ءتۇسىنىپ، ەرەۋىلگە شىعىپ جاتىر، – دەيدى قوعام بەلسەندىسى.
