استانادا بەلگىلى كاسىپكەر، Parmigiano Group يەسى الماس ءابدىعاپپاروۆتىڭ ايەلى ۇستالدى. ولگا ءابدىعاپپاروۆا ۇستالعانى تۋرالى اقپاراتتى الماتى پوليسيا دەپارتامەنتى راستادى، - حابارلايدى Dalanews.kz.
پوليسيانىڭ مالىمەتىنشە، ول اسا ءىرى مولشەردەگى الاياقتىق تۋرالى ءىس بويىنشا كۇدىكتى دەپ تانىلعان.
"الماتى قالاسى پد تەرگەۋ باسقارماسى تۇرعىن ءۇي كەشەندەرىنىڭ ءبىرىنىڭ ۇلەسكەرلەرىنىڭ ۇجىمدىق ءوتىنىشى بويىنشا اسا ءىرى مولشەردەگى الاياقتىق دەرەگى بويىنشا قىلمىستىق ءىستى تەرگەپ جاتىر. ازامات ءا.كۇدىكتى دەپ تانىلدى. ول استانا قالاسىندا ۇستالدى"،-دەلىنگەن ۆەدومستۆونىڭ باسپا ءسوز قىزمەتىنىڭ حابارلاماسىندا.
كۇدىكتى ق ر قىجك-نىڭ 128-بابىنىڭ تارتىبىمەن استانا پد ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جالعاسىپ جاتىر.
الماس ءابدىعاپاروۆتىڭ ءوزى 2022 جىلعى جازدا الماتىدا سوتتالعان بولاتىن. ول سەنىپ تاپسىرىلعان مۇلىكتى اسا ءىرى مولشەردە ۇرلاعانى ءۇشىن كىنالى دەپ تانىلدى جانە قارجى ۇيىمدارىندا بەس جىل مەرزىمگە باسشىلىق لاۋازىمداردى اتقارۋ قۇقىعىنان ايىرىلا وتىرىپ، جەتى جىلعا باس بوستاندىعىنان ايىرىلدى.
الماتى قالاسى №2 مەدەۋ اۋداندىق سوتى ەليتالىق Esentai City تۇرعىن ءۇي كەشەنىندە جىلجىمايتىن مۇلىكتى ساتىپ الۋشىعا تيەسىلى 418 640 000 تەڭگەنى مەنشىكتەپ الۋ ءىسى بويىنشا ۇكىم شىعاردى.
"الماس ءابدىعاپپاروۆ سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالعانى ءۇشىن ايىپتى دەپ تانىلدى. ول جازاسىن جالپى رەجيمدەگى كولونيادا 7 جىل وتەيدى. سونداي-اق وعان قارجىلىق ۇيىمداردا 5 جىل بويى باسشىلىق قىزمەتتەر اتقارۋعا تىيىم سالىنادى"، دەپ حابارلادى سوت بۇعان دەيىن.
ايتا كەتەيىك، Parmigiano Group كومپانياسىنىڭ ديرەكتورى الماس ءابدىعاپپاروۆ 2021 جىلى شىلدەدە قاماۋعا الىنعان بولاتىن.
