Астанада белгілі кәсіпкер, Parmigiano Group иесі Алмас Әбдіғаппаровтың әйелі ұсталды. Ольга Әбдіғаппарова ұсталғаны туралы ақпаратты Алматы полиция департаменті растады, - хабарлайды Dalanews.kz.
Полицияның мәліметінше, ол аса ірі мөлшердегі алаяқтық туралы іс бойынша күдікті деп танылған.
"Алматы қаласы ПД тергеу басқармасы тұрғын үй кешендерінің бірінің үлескерлерінің ұжымдық өтініші бойынша аса ірі мөлшердегі алаяқтық дерегі бойынша қылмыстық істі тергеп жатыр. Азамат Ә.күдікті деп танылды. Ол Астана қаласында ұсталды",-делінген ведомствоның баспасөз қызметінің хабарламасында.
Күдікті ҚР ҚІЖК-нің 128-бабының тәртібімен Астана ПД уақытша ұстау изоляторына қамалды. Сотқа дейінгі тергеу жалғасып жатыр.
Алмас Әбдіғапаровтың өзі 2022 жылғы жазда Алматыда сотталған болатын. Ол сеніп тапсырылған мүлікті аса ірі мөлшерде ұрлағаны үшін кінәлі деп танылды және қаржы ұйымдарында бес жыл мерзімге басшылық лауазымдарды атқару құқығынан айырыла отырып, жеті жылға бас бостандығынан айырылды.
Алматы қаласы №2 Медеу аудандық соты элиталық Esentai City Тұрғын үй кешенінде жылжымайтын мүлікті сатып алушыға тиесілі 418 640 000 теңгені меншіктеп алу ісі бойынша үкім шығарды.
"Алмас Әбдіғаппаров сеніп тапсырылған бөтен мүлікті иемденіп алу немесе талан-таражға салғаны үшін айыпты деп танылды. Ол жазасын жалпы режимдегі колонияда 7 жыл өтейді. Сондай-ақ оған қаржылық ұйымдарда 5 жыл бойы басшылық қызметтер атқаруға тыйым салынады", деп хабарлады сот бұған дейін.
Айта кетейік, Parmigiano Group компаниясының директоры Алмас Әбдіғаппаров 2021 жылы шілдеде қамауға алынған болатын.
