قازاقستاندىق تانىمال رەپەر Qurt-تىڭ (شىن اتى – دامير قويشىبايەۆ) ايەلى ارۋجان قويشىبايەۆا الەۋمەتتىك جەلى ارقىلى كۇيەۋىن تۇرمىستىق زورلىق-زومبىلىق جاسادى ايىپتادى، دەپ حابارلايدى Dalanews.kz.

ارۋجان Instagram پاراقشاسىندا دەنەسىندەگى كوگەرگەن جەرلەردى كورسەتەتىن سۋرەتتەردى جاريالاپ، 27 ماۋسىمدا تاڭعى ساعات 10 شاماسىندا كۇيەۋى بەلبەۋمەن ءبىر ساعات بويى سوققىعا جىققانىن جازدى. ونىڭ ايتۋىنشا، ءبىرىنشى بەلبەۋ سىنىپ قالعاننان كەيىن ول باسقا بەلبەۋمەن ۇرۋىن جالعاستىرعان.

"پاتەردەن شىعا المادىم. سودان كەيىن ايعايلاپ، كومەك سۇراي باستادىم. "كومەكتەسىڭىزدەر، قۇتقارىڭىزدار، ولتىرگەلى جاتىر" دەپ ايقايلاعانىمدى كورشىلەر ەستىپ، مەنى قۇتقاردى"، – دەدى ول.

ارۋجان بۇعان دەيىن بولعان جاعدايلاردى جاريالاماعانىن، سەبەبى كۇيەۋىنە سەزىمى بولعانىن ايتتى. الايدا، ونىڭ ايتۋىنشا، دامير ىستەگەن ىسىنە وكىنىش بىلدىرمەگەن.

ول بارلىق دالەلدى قۇجاتتاپ، پوليسياعا رەسمي ارىز جازۋدى جوسپارلاپ وتىرعانىن جەتكىزدى. الايدا Qurt پەن دوستارى وعان قىسىم كورسەتىپ، شاعىمنان باس تارتۋعا ماجبۇرلەگەنىن دە جاسىرمادى.

"ول دوستارىمەن كەلىپ، مەنى ۆيدەوعا ءتۇسىرىپ، ەشقانداي شاعىمىم جوق دەپ ايتقىزدى. ءقازىر كەيبىرەۋلەرى مەنى قورقىتىپ جاتىر. ادۆوكات جالداۋ ءۇشىن كومەك كەرەك"، – دەدى ول.

سونىمەن قاتار، ارۋجان ءوزىنىڭ جۇكتى ەكەنىن دە ايتتى.

استانا قالالىق پوليسيا دەپارتامەنتىنىڭ حابارلاۋىنشا، وقيعا 27 ماۋسىمدا تىركەلىپ، قۇقىقبۇزۋشى ۋاقىتشا ۇستاۋ بولمەسىنە قامالعان. وعان قاتىستى قورعانىس ۇيعارىمى شىعارىلىپ، اكىمشىلىك ءىس سوتقا جىبەرىلگەن.

الايدا سوتتا تاراپتار تاتۋلاسقان. پوليسيا بۇل ءىس بويىنشا قوسىمشا تەكسەرىس جۇرگىزىلىپ جاتقانىن جانە قاجەت بولعان جاعدايدا قىلمىستىق ءىس قوزعالاتىنىن حابارلادى.

ايتا كەتەيىك، 24 جاستاعى دامير قويشىبايەۆ Qurt لاقاپاتىمەن تانىمال. ول سكريپتونيت، Truwer جانە 104 سەكىلدى بەلگىلى رەپەرلەرمەن بىرگە جۇمىس ىستەپ، تىڭدارماندار اراسىندا تانىمالدىلىققا يە بولعان.