قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ سيرەك جانە جەردە سيرەك كەزدەسەتىن مەتالدار سالاسىن دامىتۋ ماسەلەلەرى جونىندە كەڭەس وتكىزدى. بۇل مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن اتالعان سالاعا وزىق تەحنولوگيالار مەن ينۆەستيسيا تارتۋ جونىندەگى تاپسىرماسىن ورىنداۋ شەڭبەرىندە جۇزەگە استى، دەپ حابارلايدى Dalanews.kz.
جيىنعا پرەزيدەنتتىڭ ەكونوميكالىق ماسەلەلەر جونىندەگى كومەكشىسى قانات شارلاپايەۆ، ونەركاسىپ جانە قۇرىلىس ءمينيسترى ەرسايىن ناعاسپايەۆ، "سامۇرىق-قازىنا" ءۇاق" ۇلتتىق ءال-اۋقات قورى باسقارماسىنىڭ ءتوراعاسى نۇرلان جاقىپوۆ، "قازاتومونەركاسىپ" ۇاك" اق باسقارما ءتوراعاسىنىڭ مىندەتىن اتقارۋشى مارات تولەبايەۆ قاتىستى.
پرەمەر-مينيستر جۇمىس ىستەپ تۇرعان ءوندىرىس ورىندارى مەن ينفراقۇرىلىمدى جاڭعىرتۋ، گەولوگيالىق بارلاۋ جۇمىستارىن كەڭەيتۋ، زاماناۋي وڭدەۋ تەحنولوگيالارىن ەنگىزۋ جانە عىلىمي-زەرتتەۋ بازاسىن دامىتۋ قاجەتتىگىن اتاپ ءوتتى.
ونەركاسىپ جانە قۇرىلىس مينيسترلىگىنىڭ دەرەكتەرى بويىنشا، قازاقستاننىڭ مەتاللۋرگيا قۇرىلىمىندا سيرەك جانە جەردە سيرەك كەزدەسەتىن مەتالدار ءوندىرۋ 2،4%-دى قۇرايدى. 2018 جىلدان بەرى سالانى مەملەكەتتىك قارجىلاندىرۋ 67 ملرد تەڭگەنى قۇراپ وتىر.
كەڭ اۋقىمدى گەولوگيالىق بارلاۋ جۇمىستارى جۇرگىزىلۋدە: جالپى اۋدانى 100 مىڭ شارشى شاقىرىم 1:50 000 ماسشتابتاعى 25 ۋچاسكە زەرتتەلۋدە. 2024 جىلى قاتتى پايدالى قازبالاردىڭ كەلەشەگى زور 38 ۋچاسكەسى اشىلدى. ەلىمىزدەگى گەولوگيالىق-گەوفيزيكالىق بارلاۋ جۇمىستارى 2025 جىلى 2 ملن 038 مىڭ شارشى شاقىرىمدى قۇراسا، 2026 جىلعا قاراي 2،2 ملن شارشى شاقىرىمعا جەتەدى.
قازىرگى ۋاقىتتا قازاقستاندا بەريلليي، تانتال، نيوبيي، سكانديي، تيتان، رەنيي، وسميي وندىرىلسە، جول بويىندا ۆيسمۋت، سۋرما، سەلەن جانە تەللۋر الىنادى. سونىمەن قاتار گالليي مەن ينديي الۋ تەحنولوگيالارى بار.
سالانىڭ بولاشاعى زور باعىتتارىنا باتارەيا ماتەريالدارىن، ىستىققا ءتوزىمدى قورىتپالاردى ءوندىرۋ جانە قايتا وڭدەۋ، جارتىلاي وتكىزگىش ماتەريالدار ءوندىرىسى جانە تۇراقتى ماگنيتتەردى قايتا وڭدەۋ جاتادى.
جالپى، ۇكىمەت اتالعان سالانى ودان ءارى دامىتۋ ءۇشىن شارالار قابىلداۋدا. 2024-2028 جىلدارعا ارنالعان كەشەندى جوسپار جۇزەگە اسىرىلۋدا. "جەزقازعانرەدمەت" رمك سيرەك مەتالدار سەحىن جاڭعىرتۋعا قاراجات ءبولىندى. ينۆەستورلاردى تارتۋ ءۇشىن گەولوگيالىق اقپاراتقا، ونىڭ ىشىندە سيرەك جانە جەردە سيرەك كەزدەسەتىن مەتالدار بويىنشا قولجەتىمدىلىك قامتاماسىز ەتىلدى.
جيىن قورىتىندىسى بويىنشا پرەمەر-مينيستر كۇش-جىگەردى جەر قويناۋىن تەرەڭدەتىپ زەرتتەۋگە، تەحنوگەندىك مينەرالدىق تۇزىلىمدەردى ەسەپكە الۋ مەن مەملەكەتتىك تەڭگەرىمگە قويۋدى جەدەلدەتۋگە، اككۋمۋلياتورلار مەن ولاردى قايتا وڭدەۋگە ارنالعان ماتەريالدار ءوندىرىسىن دامىتۋعا، سونداي-اق ىستىققا ءتوزىمدى نيكەل قورىتپالارىن بەلسەندى وندىرۋگە جۇمىلدىرۋدى تاپسىردى. بۇدان بولەك، "ۇلتتىق تەحنولوگيالىق بولجاۋ ورتالىعى" رمك بازاسىندا سيرەك جانە جەردە سيرەك كەزدەسەتىن مەتالدار بويىنشا وڭىرلىك زەرتتەۋ ورتالىعىن قۇرۋ جونىندەگى جۇمىسقا نازار اۋدارىلدى.
ايتا كەتسەك، قازىرگى زامانعى ونەركاسىپ ءۇشىن سيرەك جانە جەردە سيرەك كەزدەسەتىن مەتالدار ءوندىرىسىن دامىتۋ وتە ماڭىزدى. 2024 جىلدىڭ دەرەكتەرى بويىنشا شيكىزاتتىڭ وسى ءتۇرىنىڭ الەمدىك نارىعى 1،6 ملن توننانى قۇرادى. بۇل رەتتە 2023-2024 جىلدارى سۇرانىستىڭ ورتاشا جىلدىق ءوسۋى 30%-عا جەتتى.
بۇعان دەيىن قازاقستاندا 38 جاڭا كەن ورىنى تابىلعانىن جازعانبىز. سونداي-اق سايتىمىزدا "اقش-تىڭ ورتالىق ازيانىڭ سيرەك كەزدەسەتىن مەتالدارىنا كوزى ءتۇسىپ وتىر - ب ا ق" دەگەن ماقالا جاريالانعان بولاتىن.
