شۋ اۋدانىنىڭ ورتالىعىندا «ورتا ازيا» موتوشەرۋىنىڭ ءبىرىنشى ماۋسىمىنىڭ جابىلۋ سالتاناتى ءوتتى. موتوشەرۋ كورشىلەس رەسەي، تاجىكستان، وزبەكستان جانە قىرعىز رەسپۋبليكاسىنىڭ موتوكلۋب مۇشەلەرىنەن قۇرالعان. اتاپ وتەرلىگى، موتوشەرۋ قۇرامىندا «ليبەرتي شۋ» موتوكلۋبىنىڭ ەكى مۇشەسى بولدى. قوس دوڭگەلەكتى تەمىر تۇلپار مىنگەسكەن بايكەرلەر اعىمداعى جىلدىڭ ناۋرىز ايىندا ساپارلارىن قىرعىز جەرىنەن باستاۋ الىپ، الماتى، تاراز، شىمكەنت، تاشكەنت، بۇحارا، دۋشانبە، وش قالالارىن كەسىپ ءوتىپ، ودان ىستىق كولدى اينالىپ، وسىدان ەكى اپتا بۇرىن قايتادان الماتىعا جەتكەن. شەرۋ جالپى 8600 كم قامتىدى. ورتاازيالىق موتو اسسوسياسيانىڭ شەشىمى بويىنشا «ورتا ازيا» موتوشەرۋىنىڭ جابىلۋى شۋ جەرىندە ءوتۋى – اۋداندا تۋريزم سالاسىنىڭ دامىعاندىعىن دالەلدەي الاتىن بىردەن-بىر كورسەتكىش.

موتوشەرۋدىڭ سالتاناتتى جابىلۋ ساتىندە اۋدان اكىمىنىڭ ورىنباسارى كلارا قوجاعاپپانوۆا اۋدان باسشىسىنىڭ اتىنان قۇتتىقتاۋ ءسوزىن سويلەپ، ىزگى تىلەگىن جەتكىزدى. سونداي-اق، «ليبەرتي شۋ» موتوكلۋبىنىڭ باس بايكەرى قانات ادىلبەكوۆ ۇستىمىزدەگى جىلدىڭ ناۋرىزىندا «جىبەك جولى-2018» موتوشەرۋ ماۋسىمىنىڭ اشىلۋى جانە وسى جولعى «ورتا ازيا» موتوشەرۋىنىڭ ءبىرىنشى ماۋسىمىنىڭ جابىلۋ سالتاناتى شۋ اۋدانىندا وتكىزىلىپ جاتقانى ۇلكەن مارتەبە ەكەندىگىن زور ماقتانىشپەن اتاپ ءوتتى. راسىمەن دە، وبلىس ورتالىعىنان شالعاي ورنالاسقان بۇل اۋدانعا بىرنەشە مەملەكەتتىڭ وكىلدەرىنەن قۇرالعان بايكەرلەردىڭ باس قوسۋى ۇلكەن قۋانىش. بۇل ءبىر جاعىنان اۋداننىڭ ابىرويىن اسقاقتاتسا، ەكىنشى جاعىنان مۇنداعى تۇرعىنداردى ءبىر سەرپىلتىپ تاستاعانى جاسىرىن ەمەس.

جاستاردى ناشاقورلىققا قارسى كۇرەسكە شاقىرۋ، سپورتقا باۋلۋ جانە ءتۋريزمدى دامىتۋ ماقساتىندا ۇيىمداستىرىلعان موتوشەرۋگە قاتىسۋشىلار اۋدان ورتالىعىندا كوپشىلىك الدىندا موتوقويىلىمدار قويىپ، قىزىقتى ويىندار ۇيىمداستىردى. ال شارا سوڭىندا جاستاردىڭ تەمىر تۇلپارلارعا وتىرىپ كورۋلەرىنە مۇمكىندىك سىيلادى. ايتا كەتۋىمىز كەرەك، ءدال وسى ءىس-شارا شۋ اۋدانىندا ءبىرىنشى مارتە وتكىزىلىپ وتىرعان جوق. دالىرەك ايتار بولساق، ءبىرقاتار ەلدىڭ بايكەرلەرى جىل سايىن كيەلى شۋ جەرىندە باس قوسىپ، اۋدان تۇرعىندارىنا ۇلكەن اسەر سىيلايتىنداي قويىلىمدارىن قويۋدى داستۇرگە اينالدىرعان. بىلۋىمىزشە، بۇل شارا جىلداعى داستۇرگە ساي، كەلەسى جىلى دا شۋ اۋدانىندا جالعاسىن تاپپاق.

جامبىل وبلىسى

شۋ اۋدانى