"قالا مەن دالا" گازەتىنىڭ تىلشىلەرى بايدىبەك اۋدانى بورالداي اۋىل اكىمدىگىندەگى «ابەردين-انگۋس» تۇقىمدى ءىرى قارا مال شارۋاشىلىعىنا بارىپ، ءوز قارجىسىنا ءىس باستاعان جەكە كاسىپكەر ماقسات نازاربايەۆتىڭ جۇمىسىمەن تانىسىپ قايتتى.

تارقاتىپ ايتار بولساق، «ابەردين-انگۋس» تۇقىمدى ءىرى قارا مال شارۋاشىلىعى 2015 جىلى قۇرىلعان. اۆستراليالىق ابەردين-انگۋس اسىل تۇقىمدى تۇرىنەن 90 باس قۇناجىن مەن اسىل تۇقىمدى ءۇش بۇقا ساتىپ العان كاسىپكەر  بۇل ەتتى سيىرلاردىڭ جەرسىنۋى قيىنعا سوقپاعانىن  ايتادى.  قازىرگى تاڭدا 82 باس اسىل تۇقىمدى ءىرى قارادان 68 باس ءتول الىنىپ،  ءىرى قارا سانى ارتىپ كەلەدى.

«راس، كەيبىرەۋلەر سيىرلارىنا جىلدام سالماق قوسۋ ءۇشىن دارى-دارمەك پايدالاناتىنىن ەستىپ جاتامىز، ال ابەردين-انگۋستەرگە ونىڭ قاجەتى جوق. مالدىڭ بۇل ءتولى تابيعي تۇردە جىلدام سالماق قوسۋ مۇمكىندىگىنە يە. جەرگىلىكتى بۇقالار كۇنىنە 400-500 گرامم سالماق قوسسا، بۇلار كۇنىنە 1،5-2،5 كەلى ارالىعىندا سالماعىن ۇلعايتا الادى. گەنەتيكاسى جاقسى»،-دەيدى ماقسات كەڭەس ۇلى.

ابەردين-انگۋس اسىل تۇقىمدى سيىرلارىنىڭ تاعى ءبىر ەرەكشەلىگى - بۇزاۋلارى اناسىنان كىشكەنتاي بولىپ تۋىلىپ، تەز وسەدى. قاقاعان اياز بەن اپتاپ ىستىققا شىدامدى، ءارى اۋرۋعا ءتوزىمدى بولىپ كەلەدى. وگىزشەلەردى كوبەيتىپ، ەلدەگى مال باسىن اسىلداندىرۋدى باستى ۇستانىمى سانايتىن فەرمەر 4 ادامدى جۇمىسپەن قامتىپ، ولارعا ورتاشا 80 مىڭ تەڭگە ايلىق جالاقى بەرىپ وتىر.  الداعى ۋاقىتتا مال باسىن 2-3 مىڭ باسقا جەتكىزۋ جوسپارىندا بار. مۇنداي جاعدايدا مالشىلار سانى تاعى دا ارتاتىن بولادى.

شارۋاشىلىقتىڭ جەر كولەمى – 2500 گەكتاردى قۇرايدى. ءارقايسىسى 1 توننادان استام ەت بەرەتىن اسىل تۇقىمدى بۇقالار ەرەكشە كۇتىمگە الىنعان. ءتىپتى جەم-شوبىنە جۇمىرتقا مەن ءسابىز جانە قىرىققاباتقا دەيىن قوسىپ بەرىلەدى.

ايتا كەتەيىك، جالپى بايدىبەك اۋدانىنداعى اسىل تۇقىمدى 4 ءىرى قارا مال شارۋاشىلىعىندا 366 باس ءىرى قارا، 3 قوي شارۋاشىلىعىندا 5999 باس قوي وسىرىلۋدە. الداعى ۋاقىتتا تاعى دا 500 باس «ابەردين-انگۋس» باعىتىندا ءىرى قارا مال ساتىپ الۋ جوسپارلانىپ وتىر.