ەكس-سۋديا سۆەتلانا جولمانوۆاعا قاتىستى سوت وتىرىسىندا پروكۋرور راۋشان ابدۋللا ايىپتاۋ اكتىسىن وقىدى،- دەپ حابارلايدى Dalanews.kz.
تەرگەۋ مالىمەتىنشە، ايىپتالۋشى 2021 جىلدان بەرى الداۋ جانە سەنىمگە كىرۋ ارقىلى جىلجىمايتىن مۇلىكتى ساتىپ الۋعا جانە تەندەرلىك جوبالارعا قاتىسۋعا كومەكتەسەمىن دەگەن جەلەۋمەن ميلليونداعان تەڭگەنى يەمدەنگەن.
"بارلىق جابىرلەنۋشىگە ول جانار ەسىمدى قۇربىسىن ءجيى ايتقان. ونىڭ سوزىنشە، ول - سول كەزدەگى الماتى قالاسىنىڭ اكىمى بولعان باۋىرجان بايبەكتىڭ ايەلى، - دەپ جازىلعان ايىپتاۋ اكتىسىندە.
تەرگەۋ بارىسىندا قىلمىستىق ارەكەتتىڭ 48 ەپيزودى انىقتالىپ، ولار ءبىر ىسكە بىرىكتىرىلگەن. بۇگىنگى سوت وتىرىسىندا پروكۋرور ونىڭ 16-سىن عانا وقىپ ۇلگەرگەن. كەلەسى وتىرىستار 21، 22، 23 جانە 24 ساۋىرگە جوسپارلانعان.
ايتا كەتەيىك، 2021 جىلدىڭ 28 ساۋىرىندە الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆا الاياقتىق جاسادى دەگەن كۇدىككە ءىلىندى.
ءتىنتۋ كەزىندە سۋديانىڭ كابينەتىنەن 10 مىڭ دوللار تاركىلەنگەن. ول سوت شەشىمدەرىن بەلگىلى ءبىر ادامداردىڭ پايداسىنا شىعارۋعا كومەكتەسكەن دەگەن كۇدىككە ءىلىندى.
29 ساۋىردە جوعارعى سوت ءتوراعاسىنىڭ وكىمىمەن سۆەتلانا جولمانوۆانىڭ وكىلەتتىگى توقتاتىلدى.
