رەسەيلىك تەلەارنادا قازاقستان جايلى ەكى سەريالى فيلم شىقتى. فيلمدە قازاقستاندا «رۋسوفوبيا» بارى، ەل بيلىگى باتىستىڭ ماريونەتكاسى ەكەنى ايتىلادى، - دەپ حابارلايدى Dalanews.kz.
فيلم اۆتورى - رەسەيدىڭ مەملەكەتتىك دۋماسىنىڭ دەپۋتاتى اندرەي لۋگوۆوي. ول كرەمل تاپسىرماسى بويىنشا 2006 جىلى رەسەيلىك ساياسي ەميگرانت الەكساندر ليتۆينەنكونى ۋلاعانىمەن بەلگىلى.
فيلم مازمۇنى بويىنشا، رەسەيدىڭ ۋكرايناعا قارسى ايتىلعان تەزيستەرى قولدانىلعان: قازاقستاندا فاشيزم جانە «رۋسوفوبيا» بارى، ەل بيلىگى باتىستىڭ ماريونەتكاسى ەكەنى جانە رەسەيگە قارسى قاستاندىقتىڭ اينالاسىندا جۇرگەنى ايتىلادى.
22 مينۋتقا سوزىلعان فيلمدە قازاقستان باتىستىڭ شيكىزات كولونياسىنا اينالىپ بارا جاتىر دەگەن وي ايتىلادى. ءتىپتى قازاقستاندىق بلوگەر اناستاسيا احمەتوۆادان پىكىر العان. بلوگەر قازاقستان بيلىگى – باتىستىڭ اگەنتتەرى دەپ ايتادى. ونىڭ سوزىنشە، قازاقستاننىڭ ماقساتى – ەلدەگى بار بايلىقتى ساتىپ، ەلدى افريكاعا اينالدىرۋ.
«ءبىز باتىس ءۇشىن – جاڭا افريكاعا اينالىپ بارا جاتىرمىز. باتىستىڭ ناعىز اگەنتتەرى مينيستر، سەنات، ءماجىلىس، پرەزيدەنت اپپاراتىندا وتىر. ولاردىڭ كىم ەكەنىن ايتپاي-اق قويايىن. ءبىراق سول ادامداردىڭ ارقاسىندا كەيبىر ساراپشىلار قازاقستان بيلىگىن ۇلگىلى كومپرادورلىق وتارشىلدىق اكىمشىلىك دەپ سانايدى»، - دەيدى فيلمدە قازاقستاندىق بلوگەر.
رەسەيلىك جۋرناليست دەنيس كازانسكييدىڭ سوزىنشە، ۋكراينادا دا 2022 جىلعا دەيىن وسىنداي پىكىر تاراتاتىن بلوگەرلەر، ەشكىم تانىمايتىن ساراپشىلار مەن ساياساتكەرلەر بولعان. ولار رەسەيدىڭ اگەنتى رەتىندە ءبىر نارسەنى قايتالاي بەرگەن: ولار ۋكراينادا ىشكى باسقارۋ ەكەنىن، بيلىكتە وتىرعان ادامدار بايلىقتىڭ ءبارىن ساتىپ تاستايتىن باتىستىڭ ادامدارى ەكەنىن ءجيى ايتقان.
«سوندىقتان قازاقستاندىقتارعا ايتار ءبىر كەڭەسىم: مۇنىڭ الدىن الۋ كەرەك. سەبەبى ول ادامداردىڭ كوزدەگەنى نە ەكەنى بەلگىلى. ءقازىر قازاقستان – رەسەيدىڭ دۇشپانى دەگەن پروپاگاندا قاتتى ءجۇرىپ جاتىر. ياعني سول جايلى فيلمدەر ءتۇسىرىلىپ، جۇيەلى جۇمىستار ءجۇرىپ جاتىر. بلوگەرسىماقتار رەسەيگە دۇشپاندىق ويدى قالىپتاستىرۋ ءۇشىن كومەكتەسىپ جاتىر»، - دەيدى جۋرناليست.
سونىمەن قاتار، فيلمدە باتىستىڭ كوممەرسيالىق ەمەس ۇيىمدارى قازاقستانداعى «رۋسوفوبتاردى» قارجىلاندىرىپ وتىرعان دەپ ايتىلادى. بۇل تۋرالى فيلمدە حالىقارالىق جۋرناليست ەدۆارد چەسنوكوۆ ايتقان.
«1992 جىلدان بەرى UCAID قازاقستانعا 700 ميلليون دوللار ينۆەستيسيالاعان»، - دەيدى چەسنوكوۆ.
جۋرناليست دەنيس كازانسكيي قازاقستاندىقتار رەسەيلىك پروپاگانداعا بەي-جاي قاراماۋى كەرەگىن ايتادى.
«ءبىز دە (ۋكراينا) وسى سەكىلدى پروپاگانداعا بەي-جاي قاراپ، ءمان بەرمەدىك. ءتىپتى وعان كۇلىپ، رەسەيلىكتەر ەسىنەن اۋىسقان دەپ ويلايتىنبىز. ءبىراق مۇنىڭ ءبارى بەكەر جاسالىپ وتىرعان جوق. وسىلايشا بيلىك رەسەيلىكتەردى قازاقستان – دۇشپان ەل ەكەنىنە، ول جەردە دۇشپاندار تۇراتىنىنا، ولاردى جازالاۋ كەرەك دەپ ەتىن ۇيرەتە باستايدى. بۇل بەكەر ەمەس.
مۇنداي فيلمدەر بەكەر شىقپايدى. ءبارى الدىن الا دايىندالادى. رەسەي قازاقستانعا قارسى اگرەسسياعا دايىندالىپ جاتىر. قازاقستاندىقتار دا بۇعان دايىن بولۋى كەرەك. جان-جاقتان ونىڭ الدىن الۋ كەرەك. ەڭ دۇرىسى – ۋكرايناعا كومەكتەسۋ. سەبەبى رەسەي ۋكرايناداعى سوعىستا جەڭىسكە جەتسە، پۋتين مۇنىمەن توقتاپ قالمايدى. كەلەسى ماقسات – قازاقستان»، - دەيدى دەنيس كازانسكيي.
