باتىس قازاقستان وبلىسى، بايتەرەك اۋدانىنا قاراستى پەتروۆو اۋىلىنىڭ تۇرعىندارى باسقا ەلدىمەكەنگە كوشىرىلەدى،- دەپ حابارلايدى Dalanews.kz "موي گورود" باسىلىمىنا سىلتەمە جاساپ.

پەتروۆو اۋىلى مۇناي مەن گاز وندىرىلەتىن روجكوۆسكوە كەن ورنىنا جاقىن ورنالاسقان. جەرگىلىكتى حالىق كەن ورنىنىڭ قورشاعان ورتاعا كەرى اسەرى بار ەكەنىن ايتىپ، كوشىرۋدى وزدەرى سۇراعان.

اۋدان اكىمى مارات توعجانوۆتىڭ ايتۋىنشا، اۋىل سانيتارلىق قورعاۋ ايماعىنا كىرمەسە دە، تۇرعىنداردىڭ ءوتىنىشى ەسكەرىلىپ، كوشىرۋ تۋرالى شەشىم قابىلدانعان. ءقازىر قونىس اۋدارۋ ءۇشىن قاجەتتى قاراجات پەن قۇرىلىس ماسەلەسى قارالىپ جاتىر.

– پەتروۆودا 16 وتباسى تۇرادى. ولاردىڭ ءبىرى – كوپبالالى وتباسى. بارلىعىن يانۆارسيەۆو اۋىلىنا كوشىرۋ جوسپارلانىپ وتىر. بۇل ءۇشىن سول اۋىلدا جاڭا تۇرعىن ۇيلەر سالىنادى. ءقازىر قۇرىلىس نەدەن باستالاتىنى تالقىلانۋدا. جوبانى جۇزەگە اسىرۋعا شامامەن 300-350 ميلليون تەڭگە قاجەت، – دەدى اۋدان باسشىسى.

مارات توعجانوۆ وبلىس اكىمدىگىنەن قارجىلاي قولداۋ سۇرالاتىنىن اتاپ ءوتتى. ايتا كەتەيىك، پەتروۆو اۋىلىندا قازىرگى تاڭدا باستاۋىش مەكتەپ جۇمىس ىستەيدى.