وسى ماقساتتا تالدىقورعان قالاسىندا "بەرەكە" كوتتەدجدى قالاشىعى پايدا بولاتىنى حابارلانعان. كۇنى كەشە وسى اۋداندا ىرگەتاسى قالانعان 100 كوتتەدجدىڭ قۇرىلىسى اياقتالىپ، قولدانىسقا بەرىلدى.
الماتى وبلىستىق باسپا ءسوز قىزمەتىنىڭ حابارلاعانىنداي كوتتەدجدەردىڭ كىلتىن تاپسىرۋ ءراسىمى 4 قازان قالا كۇنىمەن تۇسپا-تۇس كەلگەن. ءدال وسى كۇنى كوپ بالالى انالار، اۋعان سوعىسىنىڭ ارداگەرلەرى جانە ءۇي كەزەگىندە تۇرعان وتباسىلار قۇتتى قونىستارىنا كىردى.
باسپانالى بولعان وتباسىلارعا پاتەر كىلتىن وبلىس اكىمى اماندىق باتالوۆ پەن عارىشكەر ايدىن ايىمبەتوۆ تابىستادى.
"بەرەكە" مولتەك اۋدانىندا بوي كوتەرگەن 100 كوتتەدجدىڭ اۋماعى بىردەي، ءىشى - سىرتى اقتالعان، ءاربىر ءۇيدىڭ اۋلاسى شارباقپەن قورشالعان.
قالا كۇنىندە قۋانىشقا بولەنگەن وتباسىلاردى وبلىسى اكىمى اماندىق باتالوۆ قوس مەرەكەمەن قۇتتىقتاپ، تىلەك ايتتى.
- شاڭىراعىڭ بيىك، بوساعاڭ بەرىك بولسىن دەيتىن جاقسى تىلەك بار قازاقتا. بۇگىن سىزدەردىڭ قۋانىشتارىڭىزعا وسىنداي تىلەكتەردى ارناپ ايتقىم كەلەدى.
جاڭا باسپانادا بالا-شاعالارىڭىز ءوسىپ-ونسىن، ءىشى شاتتىق پەن باقىتقا تولسىن!
بۇل كوتتەدجدى قالاشىق ءبىراز جىل بۇرىن قولعا الىنعانىمەن، قۇرىلىسى ءبىراز سايابىرلاپ قالعان ەدى. بيىلعى جىلى قۇرىلىس جۇمىستارىن جانداندىرىپ، سونىڭ 100 ءۇيىن اياقتاپ، كوپ بالالى انالارىمىزعا، باسپاناعا مۇقتاج ازاماتتارعا بەرىپ وتىرمىز.
ەلباسى جۇرگىزگەن، جاڭا پرەزيدەنتىمىز جالعاستىرعان مەملەكەتتىك ساياساتتىڭ ارقاسىندا وسىنداي زور ناتيجەلەرگە قول جەتكىزىپ كەلەمىز. ىنتىماعىمىزدى ساقتاپ، بىرلەسە ەڭبەك ەتسەك، بۇدان دا بيىك بەلەستەرگە جەتەمىز. قاشاندا ەل ىرگەسى تىنىش، ەڭبەگىمىز جەمىستى، ۇرپاقتارىمىزدىڭ بولاشاعى جارقىن بولسىن! – دەدى ا. باتالوۆ.
ارتىنشا عارىشكەر ايدىن ايىمبەتوۆ ءسوز الىپ، جاڭا قونىسقا كوشكەن وتباسىلاردى ءۇيلى بولۋىمەن قۇتتىقتادى.
"بەرەكە" شاعىن اۋدانىندا سالىنعان كوتتەدجدەردىڭ قۇرىلىسىنا وبلىستىڭ كاسىپكەرلەرى قول ۇشىن سوزدى. بيزنەس الەۋمەتتىك جاۋاپكەرشىلىگىن ەسكەرگەن بەلسەندى كاسىپكەرلەردىڭ قاتارىندا «سارقان ماي»، «ادال»، «كازفۋدپروداكس»، «جاركەنت اراسان»، «تابىس دامۋ»، «نۇر-شاپاعات»، «اقسۋ قانت»، «ۆەرشكي» جشس-لارىنىڭ، «ەرنار» شارۋا قوجالىعىنىڭ، جاركەنت كراحمال زاۋىتىنىڭ باسشى ازاماتتارى بار.
كىلت تاپسىرۋ تاپسىرۋ راسىمىندە وسىناۋ كاسىپورىن باسشىلارىنىڭ ءبىرازى ورتاعا شىعىپ، باسپانالى بولعان وتباسىلارداعى قونىس تويىمەن قۇتتىقتادى.
شارادا كوپ بالالى انا زىليحا نۇرسەيىتوۆاعا ءسوز بەرىلىپ، اۋزى دۋالى اقساقال ءالىمعازى رايىمبەكوۆ جينالعان جۇرتقا اق باتاسىن بەردى.
اماندىق باتالوۆ قولدانىسقا بەرىلگەن كوتتەدجەردى ارالاپ كورىپ، كوپ بالالى انا رىسقان اقباكىروۆا مەن زىليحا نۇرسەيىتوۆانىڭ داستارحانىنان ءدام تاتتى.
ايتا كەتەلىك، قولدانىسقا بەرىلگەن 100 كوتتەدج "كوتتەدجدى قالاشىقتاعى" جالپى قۇرىلىستىڭ العاشقى كەزەڭى عانا. جوسپارعا سايكەس بۇل اۋداندا اۋماعى 56 مىڭ شارشى مەتر بولاتىن 606 كوتتەدجدىڭ قابىرعاسى قالانباق.
ءازىر ەكى قاباتتى 155 ءۇيدىڭ قۇرىلىسى جۇردەك ءجۇرىپ جاتىر. قۇرىلىس جۇمىستارىن 5 كومپانيا اتقارۋدا.
اتاپ ايتقاندا كوپبالالى وتباسىلارعا ارناپ "Le Pes» كومپانيا جالپى اۋماعى 10،2 مىڭ شارشى مەترلىك 125 پاتەرلى 2 ءۇي سالۋدا.
«7-20-25» باعدارلاماسى ارقىلى 8ء-شى جانە 9-شى شاعىن اۋدانداردا اۋماعى 23،8 مىڭ شارشى مەتر بولاتىن 5 ءۇيدىڭ قۇرىلىسىن بيىل باستاپ، كەلەر جىلى اياقتاۋ كوزدەلگەن.
سونىمەن بىرگە بيۋدجەت ەسەبىنەن 8 جانە 9 شاعىن اۋدانداردا جالپى اۋدانى 140،5 مىڭ شارشى مەتر 1 553 پاتەرلىك 15 ءۇيدىڭ جوبالىق-سمەتالىق قۇجاتتارى جاسالۋدا.
جىل باسىنان بەرى قالادا "نۇرلى جەر" باعدارلاماسى بويىنشا 100،4 مىڭ شارشى مەتر تۇرعىن ءۇي قولدانىسقا بەرىلگەن، بۇل بىلتىرعى كورسەتكىشتەن 1،8 ەسە جوعارى.
بيىلعى جىلى كوپ بالالى جانە از قامتىلعان وتباسىلاردىڭ تۇرعىن ءۇي ماسەلەسىن شەشۋگە رەسپۋبليكالىق بيۋجدەتتەن 5،6 ملرد. تەڭگە ءبولىندى، ونىڭ 3،4 ميللياردى – 492 پاتەر ساتىپ الۋعا، 2،2 ميلليارد تەڭگەسى 180 پاتەر ساتىپ الۋعا جۇمسالاتىن بولادى.
