ءقازىر قالادا كارانتين جالعاسۋدا. جالپى الماتى ەپيدەمياعا قارسى تۇرا الۋدا. مەديسينالىق قىزمەتتىڭ جۇمىسى قاۋىرت. دەسە دە، بوساڭسۋعا بولمايدى. ينفەكسيانى ەڭسەرىپ، قالانىڭ قالىپتى تىرشىلىگىن قالپىنا كەلتىرۋ ءۇشىن كوپ نارسە ىستەۋ كەرەك، – دەدى الماتى قالاسى اكىمى باقىتجان ساعىنتايەۆ ءوزىنىڭ فەيسبۋكتاعى پاراقشاسىندا.

قالا تۇرعىندارى سانيتارلىق نورمالاردى ساقتاپ، ىندەتپەن كۇرەسۋگە شىنداپ كىرىسكەنى قۋانتادى. الەۋمەتتانۋشىلاردىڭ مالىمەتى بويىنشا كوپتەگەن الماتىلىقتار كۆي-دان ساقتانۋدىڭ نەعۇرلىم «جەڭىل» ءتۇرىن قولدانۋدا.

ياعني، ساۋالناماعا قاتىسقان ءاربىر ادام «ۇنەمى قولىن جۋادى نەمەسە انتيسەپتيكتەردى پايدالانادى ەكەن» (95،9%). از، دەسە دە كوپشىلىگى قوعامدىق ورىنداردا ماسكا كيەدى (82،8%).

بۇل رەتتە مەنى، قالانىڭ اكىمى رەتىندە جاستاردىڭ بەيقامدىعى الاڭداتادى. 25-تەن 40 جاسقا دەيىنگى ءاربىر بەسىنشى جاس قالا تۇرعىنى نەمەسە رەسپوندەنتتەردىڭ 25%-ى جۇقتىرۋ ءقاۋپىن سەزىنبەيدى نەمەسە مويىندامايدى.

سوندىقتان جاستارعا جانە ورتا جاستاعى قالا تۇرعىندارىنا ايتارىم، جينالىڭدار! سانيتارلىق ەرەجە بارلىعىنا مىندەتتى. بۇل بەيقامدىق ءبىزدى ورعا جىعادى. جاقىندارىڭىز بەن قالانىڭ قاۋىپسىزدىگىنە ءقاۋىپ توندىرمەڭىزدەر.

مەملەكەت باسشىسى ق. توقايەۆتىڭ ايتۋىنشا، ىندەت – سوعىستىڭ ءبىر ءتۇرى. بۇل ءقاۋىپتى ىندەت بەيقامدىقتى كەشىرمەيدى. ءبىز بىرلەسسەك قانا بۇل دەرتتى جەڭە الامىز. ءبىزدىڭ باستى قارۋىمىز – تەمىردەي ءتارتىپ. ىندەتكە قارسى كۇرەستە ىنتىماعىمىز ۇزىلمەسىن.