بانكير ەرجان تاتىشيەۆتى ءولتىردى دەپ ايىپتالعان مۇراتحان ءتوقمادي كولونيادا اشىق ەسىك كۇنىن جاساپ، كونسەرت ۇيىمداستىرعان، - دەپ حابارلايدى Dalanews.kz.
بۇل تۋرالى ءتوقماديدىڭ قىزى زەرە شاكەرحان الەۋمەتتىك جەلىدەگى پاراقشاسىندا ايتتى. ونىڭ سوزىنشە، مۇراتحان ءتوقمادي نەمەرەلەرىن العاش رەت كورگەن.
"سەنبى، اكەم ۇيىمداستىرعان اشىق ەسىك كۇنى مەنىڭ بالالارىم اتالارىن العاش رەت كوردى. وتە جىلى كەزدەسۋ بولدى. قازاقستانداعى ەڭ ءىرى ءىشىنى زاۋىتىنىڭ يەسى مەنىڭ اكەم 7 جىلدان بەرى تۇرمەدە جازىقسىز وتىرعانىن ءبارى بىلەدى. سەبەبى "بىرەۋ" ونىڭ تۇرمەدە وتىرعانىن قالادى. ءبىراز اڭگىمە ايتىلدى،سۇحبات تا بەرىلدى. ءبارى ءبىر نارسەنى ءتۇسىندى - ونىڭ كىناسى جوق!" ، - دەيدى زەرە شاكەرحان.
ول تۇرمەدە ءبارى مۇراتحان ءتوقماديدى سىيلايتىنىن ايتادى.
"ول - اۆتوريتەت،كوشباسشى. ول لاگەردە اشىق ەسىك كۇندەرىن ءۇش رەت ۇيىمداستىرعان. نۇرلان ابدۋللين، ايجان نۇرماعامبەتوۆا، پارۆيز نازاروۆ سەكىلدى انشىلەردى شاقىرىپ كونسەرت ۇيىمداستىرىپ، دوسى تالعات قوجاحمەتوۆ جانە باسقا دا كاسىپكەر دوستارى كەلگەن"، - دەيدى زەرە.
ايتا كەتەيىك، مۇراتحان ءتوقمادي بانكير ەرجان تاتىشيەۆتى ءولتىردى دەپ ايىپتالىپ، 10،5 جىلعا سوتتالعان بولاتىن. تەرگەۋ مالىمەتىنشە، تاتىشيەۆتى ولتىرۋگە مۇحتار ءابليازوۆ تاپسىرىپ بەرگەن. ال ءابليازوۆ تاتىشيەۆتىڭ ولىمىنە قاتىسى جوعىن، ال توقماديمەن جەكە تانىس ەمەس ەكەنىن ايتقان بولاتىن.
