ق ر قارجى نارىعىن رەتتەۋ جانە دامىتۋ اگەنتتىگىنىڭ باسقارماسى 2025 جىلعى 26 اقپانداعى قاۋلىسىمەن بانك جانە ميكروقارجى ۇيىمدارى اكتيۆتەرى بويىنشا ەلەكتروندىق ساۋدا الاڭىندا ساۋدا-ساتتىق وتكىزۋ قاعيدالارىنا وزگەرىستەر ەنگىزدى، دەپ حابارلايدى Dalanews.kz.
جاڭا وزگەرىستەرگە سايكەس، ساۋدا-ساتتىقتى وتكىزۋ تۋرالى حابارلاندىرۋدا ساۋدا-ساتتىقتى وتكىزۋ كۇنى مەن ۋاقىتى ەلەكتروندىق ساۋدا الاڭىندا ورنالاستىرىلعان كۇننەن باستاپ كەمىندە كۇنتىزبەلىك 10 كۇن بۇرىن كورسەتىلۋى ءتيىس. بۇرىن بۇل مەرزىم 15 كۇنتىزبەلىك كۇندى قامتىعان.
ساۋدا-ساتتىققا قاتىسۋشىلاردىڭ وتىنىمدەرىن تەكسەرۋ ناتيجەلەرى بويىنشا ساتۋشى وپەراتورعا ءوتىنىمنىڭ قابىلدانعانى نەمەسە وپەراتوردىڭ ىشكى قاعيدالارىنا سايكەس ءوتىنىمدى قابىلداۋدان باس تارتۋ سەبەپتەرى تۋرالى حابارلاما جىبەرەدى.
ءوتىنىمدى قابىلداۋدان باس تارتۋعا سەبەپتەردىڭ تىزبەسى كەڭەيتىلدى:
- ساۋدا-ساتتىق باستالعان ساتتە وپەراتوردىڭ بانكتىك شوتىنا ساۋدا-ساتتىق وتكىزۋ تۋرالى حابارلاندىرۋدا كورسەتىلگەن كەپىلدىك جارنانىڭ تۇسپەۋى؛
- ساۋدا-ساتتىققا قاتىسۋشىنىڭ مەملەكەتتىك رەتتەۋ تۋرالى زاڭنىڭ 15-18-بابىنىڭ 3-تارماعىنا سايكەس كەلمەۋى؛
- "اكسيونەرلىك قوعامدار تۋرالى" زاڭنىڭ 64-بابىنا جانە "جاۋاپكەرشىلىگى شەكتەۋلى جانە قوسىمشا سەرىكتەستىكتەر تۋرالى" زاڭنىڭ 12-1-بابىنا سايكەس الەۋەتتى ساتىپ الۋشىلاردىڭ بىر-بىرىنە قاتىستى ۇلەستەس بولۋى (جاڭا نەگىز).
رەزەرۆتىك باعانى قالىپتاستىرۋعا قويىلاتىن جاڭا تالاپتار بەلگىلەندى.
اتاپ ايتقاندا، رەزەرۆتىك باعانى ساتۋشى بەلگىلەيدى، ءبىراق ول وبەكتىنىڭ نارىقتىق قۇنىنىڭ 100%-نان اسپاۋى ءتيىس. ەستەرىڭىزگە سالا كەتەيىك، بۇرىن قۇجاتتا 50% تۋرالى ايتىلعان بولاتىن.
ساۋدا ساتتىق وتپەگەن جاعدايدا كەيىنگى ساۋدا-ساتتىقتىڭ رەزەرۆتىك باعاسىن ساتۋشى مىنا دەڭگەيدە بەلگىلەي الادى:
- ەكىنشى ساۋدا-ساتتىقتا وبەكتىنىڭ نارىقتىق قۇنىنىڭ 70%-دان اسىرماۋ؛
- سودان كەيىنگى ساۋدا-ساتتىقتا وبەكتىنىڭ نارىقتىق قۇنىنىڭ 50%-نان اسىرماۋ.
وتكىزىلمەگەن ساۋدا-ساتتىق تۋرالى اكت ەلەكتروندىق ساۋدا الاڭىندا تولتىرىلادى. وسىدان كەيىن وپەراتور "ساۋدا-ساتتىق وتكىزىلمەگەن" مارتەبەسى بار ساۋدا-ساتتىق ناتيجەلەرى تۋرالى مالىمەتتەردى جاريالايدى جانە وتكىزىلمەگەن ساۋدا-ساتتىق تۋرالى اكتىنى ساتۋشىعا جىبەرەدى. بۇعان دەيىن وپەراتور ساۋدا-ساتتىق ناتيجەلەرى تۋرالى حاتتامانى ساۋدا-ساتتىققا قاتىسۋشىلارعا عانا جولداۋى كەرەك بولاتىن.
تىكەلەي اتاۋلى ساۋدا ەلەكتروندىق ساۋدا الاڭىندا مىنانداي جاعدايدا جۇرگىزىلەدى: وتكىزىلمەگەن ساۋدا-ساتتىق تۋرالى ءۇش نەمەسە ودان دا كوپ اكتىلەر نەگىزىندە مەملەكەتتىك رەتتەۋ تۋرالى زاڭنىڭ 15-18-بابى 1-تارماعىنىڭ 1) جانە 2) تارماقشالارىندا كورسەتىلگەن وبەكتىلەرگە قاتىستى.
ەستەرىڭىزگە سالا كەتەيىك، بۇل ارادا:
- بانكتىڭ، بانك وپەراسيالارىنىڭ جەكەلەگەن تۇرلەرىن جۇزەگە اسىراتىن ۇيىمنىڭ، باس بانكتىڭ كۇماندى جانە ءۇمىتسىز اكتيۆتەرىن ساتىپ الاتىن بانكتىڭ ەنشىلەس ۇيىمىنىڭ مۇلىكتەرى؛
- بۇرىن ميكروقارجى ۇيىمىنا ءوندىرىپ الۋ ناتيجەسىندە ميكروقارجى ۇيىمىنىڭ مەنشىگىنە وتكەن شاعىن نەسيە بەرۋ تۋرالى شارت بويىنشا مىندەتتەمەلەردىڭ ورىندالۋىن قامتاماسىز ەتۋ بولىپ تابىلعان ميكروقارجى ۇيىمىنىڭ كەپىل مۇلكى تۋرالى ءسوز بولىپ وتىر.
ساۋدا-ساتتىق وتكىزىلمەگەن دەپ تانىلعان جاعدايدا، كەيىنگى ساۋدا-ساتتىق وتكىزىلمەگەن ساۋدا-ساتتىق تۋرالى ءبىرىنشى اكتىگە قول قويىلعان كۇننەن باستاپ كەمىندە كۇنتىزبەلىك 15 كۇن وتكەن سوڭ وتكىزىلەدى. بۇرىن بۇل مەرزىم 30 كۇنتىزبەلىك كۇندى قامتىعان.
جوعارىدا جازعان وبەكتىلەرگە قاتىستى تىكەلەي اتاۋلى ساۋدا جۇرگىزىلگەن جاعدايدا، وبەكتىنىڭ باعاسى سوڭعى وتكىزىلمەگەن ساۋدا-ساتتىقتا بەلگىلەنگەن رەزەرۆتىك باعادان تومەن ەمەس دەڭگەيدە بەلگىلەنەدى.
ق ر قنردا بۇل وزگەرىستەر بانكتەر مەن ميكروقارجى ۇيىمدارىنىڭ سترەسستىك اكتيۆتەرىن ساتۋ پروسەسىن جەتىلدىرۋ ماقساتىندا ەنگىزىلىپ جاتقانىن ناقتىلايدى.
قاۋلى 2025 جىلعى 11 ناۋرىزدان باستاپ قولدانىسقا ەنگىزىلەدى.
