ايتىسكەر اقىن بالعىنبەك يماشيەۆتىڭ ۇلى ۇيىمداستىرعان قاجىلىق تۋرىنا اقشا تولەپ، جولدا قالعان تاعى 40-قا جۋىق ادام شۋ كوتەردى. قازاقستاننىڭ ءار تۇكپىرىنەن كەلگەن ازاماتتار مەككە مەن ءماديناعا اتتانا الماي، بەرگەن قاراجاتتارىن قايتارىپ الا الماي سەندەلىپ ءجۇر، دەپ حابارلايدى Dalanews.kz كتك ارناسىنا سىلتەمە جاساپ.
الماتىداعى پوليسيا باسقارماسىنا ارنايى كەلگەن توپ تەرگەۋدىڭ سوزىلىپ كەتكەنىنە نارازى. قاسيەتتى جەرگە ءساۋىردىڭ 19-ى كۇنى ۇشامىز دەپ ۇمىتتەنگەندەر ءالى كۇنگە دەيىن جولعا شىقپاعان.
«ساۋىردە ساپارعا اتتانامىز دەگەنبىز، مىنە، ەكى اي بولدى. اقشامىزدى دا قايتارا الماي اۋرەمىز. «جۇماعا دەيىن، قۇربان ايتقا دەيىن قايتارامىز» دەپ ۋادە ەتكەن. جاۋاپ بەرەتىن ادام جوق، ديرەكتورى – دانيار يماشيەۆ دەگەن جىگىت»، – دەيدى زارداپ شەگۋشىلەردىڭ ءبىرى بەرىك مارجانوۆ.
ءار ادام قاجىلىققا بارۋ ءۇشىن شامامەن 500 مىڭ تەڭگەدەن تولەگەن. زارداپ شەگۋشىلەردىڭ جالپى شىعىنى – 20 ميلليون تەڭگەدەن اسادى. جولاۋشىلارعا مەككە مەن ءماديناداعى ءۇش-تورت جۇلدىزدى قوناقۇيلەردە جايلى جاتىن ورىن ۋادە ەتىلگەن.
جولداماعا الدانعانداردىڭ ايتۋىنشا، ولار بۇل كومپانيانى الەۋمەتتىك جەلىدەگى جارناما ارقىلى تاۋىپتى. بالعىنبەك يماشيەۆتىڭ ءوزى جارنامالاپ جۇرگەن سوڭ، كۇمانسىز سەنىپ قالعاندارىن ايتادى. ءقازىر، ءبىراق، ايتىسكەر دە، ۇلى دانيار يماشيەۆ تە بايلانىسقا شىقپاي قالعان. جۋرناليستەر حابارلاسقانىمەن، بالعىنبەك مۇلدە جاۋاپ بەرمەگەن.
ەسكە سالا كەتەيىك، بۇعان دەيىن ءدال وسى كومپانيادان قاجىلىق جولداماسىن ساتىپ الىپ، سان سوعىپ قالعان 50-گە جۋىق ادام پوليسياعا شاعىمدانعان ەدى. ول كەزدە دانيار يماشيەۆ شۇعىل تۇردە اقشالارىن قايتارىپ بەرگەن. ءقازىر تاعى الاياقتىق دەرەگى بويىنشا قىلمىستىق ءىس قوزعالىپ، تەرگەۋ باستالعان.
«قىلمىستىق ءىس بويىنشا بارلىق قاجەتتى ساراپتامالار جۇرگىزىلىپ جاتىر. تەرگەۋ اياقتالعان سوڭ، ءىس ماتەريالدارى مىندەتتى تۇردە سوتقا جىبەرىلەدى»، – دەدى الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك.
