مارقۇم سالتانات نٷكەنوۆانىڭ اعاسى ايتبەك امانگەلدٸ سوتتا قۋاندىق بيشٸمباەۆقا قاتىستى تىڭ مەلٸمەت ايتتى, - دەپ حابارلايدى Dalanews.kz.
بٷگٸن بۇرىنعى ۇلتتىق ەكونوميكا مينيسترٸ قۋاندىق بيشٸمباەۆقا قاتىستى سوت وتىرىسى ٶتٸپ جاتىر. سوت وتىرىسى جەبٸرلەنۋشٸ تاراپتان جاۋاپ الۋدان باستالدى. سالتانات نٷكەنوۆانىڭ اعاسى ايتبەك امانگەلدٸ سوتتا سٶز سٶيلەدٸ.
"مەنٸڭ بٸلۋٸمشە, قۋاندىق ٷنەمٸ بالگەرلەرگە, ەكستراسەنتەرگە بارىپ جٷرگەن. سالتاناتپەن كەزدەسكەنگە دەيٸن دە قانداي دا بٸر سۇراقتارمەن جٷگٸنٸپ وتىرعان. بالگەر "يە, سەندەردە بەرٸ جاقسى بولادى, ول سەنٸ جاقسى كٶرٸپ قالادى" دەگەن. ماعان ايتقان كٷنٸ سالتاناتتى الا بارعان... سالتانات تا بيشٸمباەۆ ەرتٷرلٸ سۇراقپەن بالگەرلەرگە جيٸ جٷگٸنگەنٸن ايتتى", - دەدٸ ول.
ايتا كەتەيٸك, بۇعان دەيٸن دە مارقۇمنىڭ اعاسى ايتبەك امانگەلدٸ بيشٸمباەۆ نٷكەنوۆانى بالگەرلەرگە بارۋعا مەجبٷرلەگەنٸن ايتتى.
"سالتاناتتى 8 ناۋرىزدا قۇتتىقتاۋعا بارعاندا كٶردٸم. تٷس ۋاقىتىندا بارعان ەدٸم. وعان بٸر قۇشاق گٷل سىيلادىم. ول ٷيدە ەدٸ. ونىڭ بەت-ەلپەتٸ قاتتى شارشاڭقى كٶرٸنٸپ تۇردى, كٶزٸنٸڭ استى قارايىپ كەتكەن. "سالتانات, نەگە شارشاپ تۇرسىڭ?" دەدٸم. "قۋاندىق تٷنٸمەن ۇيقى بەرمەدٸ, تٷنٸمەن سٶيلەسٸپ شىقتىق, ال تاڭ اتپاستان بالگەرگە بارۋعا مەجبٷرلەدٸ" دەدٸ", - دەيدٸ ول.
سونىمەن قاتار, ول بٸرنەشە كٷننەن كەيٸن قارىنداسى سوققىعا جىعىلعان سۋرەتٸن جٸبەرگەنٸن جەتكٸزدٸ.
