جىل باسىنان بەرى مەملەكەتتىك جاردەماقىلارمەن، سونداي-اق مەملەكەتتىك الەۋمەتتىك ساقتاندىرۋ قورىنان (بۇدان ءارى – ءماسق)، بالانى بوسانۋعا جانە بالا 1،5 جاسقا تولعانعا دەيىن ونىڭ كۇتىمىنە بايلانىستى تولەمدەرمەن جالپى سوماسى 437،7 ملرد تەڭگەگە 369،1 مىڭ ادام قامتىلدى، دەپ حابارلايدى Dalanews.kz.
ەڭبەك جانە الەۋمەتتىك قورعاۋ مينيسترلىگىنىڭ مالىمەتىنشە، بالا تۋعاندا بەرىلەتىن جاردەماقىنى 2025 جىلدىڭ باسىنان باستاپ رەسپۋبليكالىق بيۋدجەتتەن بارلىعى 30،6 ملرد تەڭگە سوماعا 169،2 مىڭ ادام، ونىڭ ىشىندە ماۋسىم ايىندا 4،3 ملرد تەڭگە سوماسىن 24،2 مىڭ ادام الدى.
بۇل جاردەماقىعا بالا تۋعان، اسىراپ العان، سونداي-اق قامقورلىققا العان بالالارى بار ەلىمىزدىڭ ازاماتتارى، قانداستار، سونداي-اق قازاقستاندا تۇراقتى تۇراتىن شەتەلدىكتەر ۇمىتكەر بولا الادى.
بالاعا كۇتىم جاسايتىن ادام مىندەتتى الەۋمەتتىك ساقتاندىرۋ جۇيەسىنە قاتىسۋشى بولىپ تابىلماعان جاعدايدا تۋعان، اسىراپ العان، سونداي-اق قورعانشىلىققا العان بالالارى بار، ەگەر ولار باسقا اتا-انانىڭ وتباسىندا ەسكەرىلمەسە، وگەي بالالارى بار ادامداردىڭ (وتباسىلاردىڭ) بالا كۇتىمىنە بايلانىستى جاردەماقى الۋعا قۇقىعى بار.
ەسەپتى كەزەڭدە 1،5 جاسقا تولعانعا دەيىن بالا كۇتىمى بويىنشا جاردەماقىمەن 21،7 ملرد تەڭگە سوماسىندا ورتا ەسەپپەن 123،8 مىڭ ادام قامتىلدى، ونىڭ ىشىندە ماۋسىم ايىندا 3،6 ملرد تەڭگە سوماسىن 124،5 مىڭ ادام الدى.
بالا تۋۋىنا جانە بالا كۇتىمىنە ارنالعان مەملەكەتتىك جاردەماقىلاردىڭ مولشەرى رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەكىتىلگەن ايلىق ەسەپتىك كورسەتكىشكە (بۇدان ءارى – اەك) بايلانىستى بەلگىلەنەدى. 2025 جىلدىڭ باسىنان باستاپ مەملەكەتتىك جاردەماقىلاردىڭ مولشەرى 6،5%-عا يندەكستەلگەن.
بيىلعى بالا تۋۋىنا ارنالعان جاردەماقى مولشەرى:
- ءبىرىنشى، ەكىنشى، ءۇشىنشى بالاعا – 38،0 اەك نەمەسە 149 416 تەڭگە؛
- ءتورتىنشى جانە ودان كەيىنگى بالالارعا – 63،0 اەك نەمەسە 247 716 تەڭگە.
بالا 1،5 جاسقا تولعانعا دەيىن ونىڭ كۇتىمىنە بايلانىستى تولەنەتىن جاردەماقى اي سايىن كەلەسىدەي مولشەردە تولەنەدى:
- ءبىرىنشى بالاعا – 5،76 اەك نەمەسە 22 648 تەڭگە؛
- ەكىنشى بالاعا – 6،81 اەك نەمەسە 26 777 تەڭگە؛
- ءۇشىنشى بالاعا – 7،85 اەك نەمەسە 30 866 تەڭگە؛
- ءتورتىنشى جانە ودان كەيىنگى بالالارعا – 8،90 اەك نەمەسە 34 995 تەڭگە.
بۇدان باسقا جۇمىس ىستەيتىن ازاماتتارعا جۇكتىلىككە جانە بوسانۋعا، جاڭا تۋعان بالانى (بالالاردى) اسىراپ الۋعا بايلانىستى كىرىسىنەن ايىرىلعان جاعدايدا ءماسق-تان تولەنەتىن الەۋمەتتىك تولەم جۇكتىلىگى جانە بوسانۋى بويىنشا بەرىلگەن دەمالىستىڭ بارلىق كۇندەرىنە تاعايىندالادى.
"تولەم مولشەرى جۇكتىلىگى جانە بوسانۋى بويىنشا ۋاقىتشا ەڭبەككە جارامسىزدىق پاراعى بەرىلگەنگە دەيىنگى سوڭعى 12 اي ىشىندە ءماسق-عا الەۋمەتتىك اۋدارىمدار جۇرگىزىلگەن ورتاشا ايلىق كىرىسكە جانە ەڭبەككە جارامسىزدىق كۇندەرىنىڭ سانىنا بايلانىستى بولادى"، دەلىنگەن مينيسترلىك حابارلاماسىندا.
اتالعان ءبىرجولعى تولەمدى جىل باسىنان بەرى جالپى سوماسى 166،9 ملرد تەڭگە سوماسىندا 116،1 مىڭ ادام الدى، ونىڭ ىشىندە ماۋسىم ايىندا 22 ملرد تەڭگە سوماسىندا 19،4 مىڭ ادام الدى.
2025 جىلدىڭ 6 ايىندا تاعايىندالعان تولەمنىڭ ورتاشا مولشەرى 1 556 736 تەڭگەنى قۇرادى.
سونداي-اق، ءماسق-دان الەۋمەتتىك ساقتاندىرۋ جۇيەسىنە قاتىسۋشىعا بالا تۋعان كۇننەن باستاپ ءبىر جارىم جاسقا دەيىن ونىڭ كۇتىمىنە بايلانىستى تابىسىنان ايىرىلعان جاعدايدا اي سايىنعى الەۋمەتتىك تولەم تاعايىندالادى. تولەم مولشەرى سوڭعى 2 جىلدا ءماسق الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40%-ىن قۇرايدى. ەكى جانە ودان دا كوپ بالا تۋعان جاعدايدا تولەم ءار بالاعا جەكە تاعايىندالادى.
2025 جىلدىڭ 6 ايىندا بۇل تولەم 218،5 ملرد تەڭگە 129،2 مىڭ ادامعا، ونىڭ ىشىندە ماۋسىم ايىندا 35،5 ملرد تەڭگە 19،5 مىڭ ادامعا تاعايىندالدى. 6 ايداعى ورتاشا ايلىق تولەم 89 881 تەڭگەنى قۇرادى.
بۇعان دەيىن سايتىمىزدا ەڭبەك جانە حالىقتى الەۋمەتتىك قورعاۋ مينيسترلىگى جەلىدە تاراعان "التى بالادان كەم بالاسى بار كوپبالالى وتباسىلار مەملەكەتتىك جاردەماقىدان قاعىلۋى مۇمكىن" دەگەن اقپاراتتى جوققا شىعارعانىن جازعانبىز.
