2025 جىلدىڭ 10 قازانىندا ەلوردادا «يننوۆاسيالار مەن تەحنولوگيالار: استانا ازاماتتىق سەكتورىنىڭ بولاشاعى» تاقىرىبىندا XII ازاماتتىق فورۋمى ءوتتى. ءىس-شاراعا ازاماتتىق قوعام ينستيتۋتتارىنىڭ وكىلدەرى، مەملەكەتتىك ورگاندار، قوعام بەلسىندىلەرى مەن ساراپشىلار قاتىستى، دەپ حابارلايدى Dalanews.kz.
فورۋم ازاماتتىق سەكتوردىڭ دامۋىنا سەرپىن بەرەتىن ماڭىزدى الاڭ بولدى. قاتىسۋشىلار زاماناۋي تەحنولوگيالىق شەشىمدەر مەن يننوۆاسيالىق تاسىلدەردى تالقىلاپ، ازاماتتىق باستامالاردىڭ تيىمدىلىگىن ارتتىرۋ جولدارىن ىزدەستىردى.
فورۋم اياسىندا:
- تابىستى جوبالار تانىستىرىلىپ،
- تاجىريبە الماسۋعا باعىتتالعان پانەلدىك سەسسيالار ءوتىپ،
- قاتىسۋشىلاردىڭ كاسىبي بىلىكتىلىگىن ارتتىرۋعا ارنالعان تالقىلاۋلار ۇيىمداستىرىلدى،
- سونىمەن قاتار ءارتۇرلى ۇيىمدار مەن باستامالار ءوز جوبالارىن كورمەدە ۇسىنعان ەدى.
بۇل فورۋم ازاماتتىق سەكتور وكىلدەرىنىڭ ءوزارا بايلانىسىن نىعايتىپ، جاڭا سەرىكتەستىكتەر قۇرۋعا مۇمكىندىك بەردى. يننوۆاسيالىق شەشىمدەر مەن سيفرلىق قۇرالداردى ءتيىمدى پايدالانۋ ارقىلى استانانىڭ ازاماتتىق قوعامىنىڭ الەۋەتىن ارتتىرۋ - فورۋمنىڭ باستى ماقساتى ەدى.
«بۇل ازاماتتىق فورۋم قازاقستان بويىنشا ءار وڭىرىندە وتكەن فورۋمنىڭ سوڭعى فورۋمى. سەبەبى استانا قالاسىندا وتكىزىلىپ، اياقتالىپ، ودان كەيىن رەسپۋبليكالىق ورتالىق فورۋمعا كوشەتىن بولامىز. بيىلعى جىل قازاقستان ازاماتتىق اليانسىنىڭ ۇلكەن مەرەيلى كۇنى. سوندىقتان ۇلكەن ماڭىزى بار فورۋم. قازاقستاننىڭ ءار وڭىرىندە وتكەن فورۋمنىڭ ءوز ەرەكشەلىكتەرى بولدى. ازاماتتىق سەكتوردىڭ ۇكىمەتتىك ەمەس ۇيىمدارىنىڭ، بەلسەندى ازاماتتارىنىڭ، ءتۇرلى قورلار، قوعامدىق ۇيىمداردىڭ جۇمىسىن جىل بويعى قورىتىندىلاۋ ەسەبى . الەۋمەتتىك جوبالارىن كورسەتۋ، قانداي جەتىستىككە جەتكەنىن ايقىنداۋ. ودان كەيىن ءار وڭىردە ەرەكشەلىكتەرىنە سايكەس ءار فورۋمنىڭ قورىتىندىسى شىعارىلادى. سوندىقتان مۇنىن ءبارى رەسپۋبليكالىق فورۋمدا ايتىلاتىن بولادى. سەبەبى ءار فورۋمنىڭ قورىتىندىسى بەلگىلى ءبىر ۇسىنىستاردى بەكىتۋ جانە ونى رەسپۋبليكالىق فورۋمعا جولداۋ. بۇگىن بىزدە زامان تالابىنا ساي ، پرەزيدەنتتىڭ جولداۋىنا ساي جاساندى ينتەللەكتكە بايلانىستى، ازاماتتىق سەكتورلىق كۇشەيتۋ، جاستاردىڭ جوبالارىن قولداۋ، ىسكە اسىرۋ، ۆولونتەرلىق ەرىكتىلەردىڭ جۇمىسىنا كوڭىل ءبولۋ سەكىلدى باعىتتار بار»،- دەپ اتاپ ءوتتى استانا قالاسى ازاماتتىق باستامالار ورتالىعىنىڭ جوبالار جەتەكشىسى قوجاحمەتوۆ شىڭعىسحان شوپان ۇلى.
سپيكەر رەتىندە قاتىسقان ق ر مادەنيەت جانە اقپارات ۆيسە-مينيسترى قۇرمانوۆا ايزادا امانگەلدى قىزى: ەلىمىزدە ەۇۇ- نىڭ الەۋمەتتىك جوبالارىنا بولىنەتىن قارجى كولەمى سوڭعى 5 جىلدا ەكى ەسە ءوستى.
بۇگىندە ەلىمىزدە 18 مىڭعا جۋىق بەلسەندى ۇكىمەتتىك ەمەس ۇيىم (ەۇۇ) تىركەلگەن. ولار مەملەكەتتىك ورگاندارمەن ءارتۇرلى ديالوگتىق الاڭدار مەن بىرلەسكەن جوبالار ارقىلى تىعىز بايلانىس ورناتىپ، قوعامنىڭ وزەكتى ماسەلەلەرىن شەشۋگە بەلسەنە اتسالىسۋدا. بۇل تۋرالى ايزادا حانىم مالىمدەدى.
ونىڭ ايتۋىنشا، قازىرگى تاڭدا مىڭعا جۋىق ەۇۇ الەۋمەتتىك جوبالاردى باسقارۋ تەتىكتەرى ارقىلى جۇزەگە اسىرىپ وتىر. بۇل ازاماتتىق سەكتوردىڭ الەۋەتى ارتىپ كەلە جاتقانىن كورسەتەدى.
«سوڭعى بەس جىل ىشىندە ەلىمىزدە ۇكىمەتتىك ەمەس ۇيىمداردىڭ جوبالارىن قارجىلاندىرۋ كولەمى ەكى ەسەگە ارتتى. بۇل – ازاماتتىق قوعام مەن مەملەكەت اراسىنداعى سەرىكتەستىكتىڭ نىعايعانىنىڭ ايقىن كورىنىسى. استانا قالاسى دا بۇل ۇدەرىستە الدىڭعى قاتاردا. قالا بيۋدجەتىنىڭ 10 %- ى الەۋمەتتىك ماسەلەلەردى شەشۋگە باعىتتالعان»،- دەدى مينيستر.
دەگەنمەن، ۆيسە-مينيستر جوبالاردىڭ سانى عانا ەمەس، ولاردىڭ ساپاسى مەن تيىمدىلىگى دە باستى نازاردا بولۋى ءتيىس ەكەنىن ەرەكشە اتاپ ءوتتى.
«ءبىز تەك كورسەتكىشتەرگە قاراپ قانا قويماي، ولاردىڭ قوعامعا ناقتى پايداسىن باعالاۋىمىز كەرەك. جوبالاردىڭ الەۋمەتتىك اسەرى، ولاردىڭ شەشىپ جاتقان ناقتى پروبلەمالارى مەن قوعامعا اكەلگەن وڭ وزگەرىستەرى باستى نازاردا بولۋى قاجەت»،- دەپ تولىقتىردى ول.
ازاماتتىق قوعامنىڭ بۇل بەلسەندىلىگى مەملەكەتتىك ساياساتتى جەتىلدىرۋگە، الەۋمەتتىك ماسەلەلەردى شەشۋگە جانە ەل دامۋىنا ازاماتتىق باستامالار ارقىلى ۇلەس قوسۋعا ۇلكەن مۇمكىندىك بەرەدى.
«ەلىمىزدىڭ 19 وڭىرىندە فورۋم ءوتتى. ەلىمىزدەگى ۇكىمەتتىك ەمەس ۇيىمدارىنىڭ 15%- پايىزدان استامى ەلوردادا. جاساندى ينتەللەكت داۋىرىندەگى قازاقستان اتتى جولداۋىندا ءۇش جىل ىشىندە تولىققاندى سيفرلى ەل بولۋ تۋرالى ناقتى باعىت ايقىندالعان. ەلىمىزدىڭ بارلىق سالالارىندا سيفرلىق شەشىمدەردى ەنگىزۋ تاپسىرما قويىلدى. سيفرلىق ءداۋىر ازاماتتىق قوعامعا جاڭا مۇمكىندىكتەر اشىپ وتىر»،- دەپ اتاپ ءوتتى ول.
سونىمەن قاتار، فورۋمدا «Esbol Qory» قورىنىڭ ءتوراعاسى اقتايەۆ جاندوستىڭ «نەگاتيۆتى قۇبىلاستىردىڭ الدىن الۋعا ازاماتتىق قاتىسۋدىڭ سيفرلىق قۇرالدارى» تاقىرىبىنداعى بايانداماسى، «تەڭ مۇمكىندىكتەر الەمى» قورىنىڭ ديرەكتورى ۇلجەكوۆا ن.ت.–نىڭ «قولداۋ كورسەتۋدىڭ جەرگىلىكتى باستامالارىن دامىتۋ» تاقىرىبىنداعى بايانداماسى، Yandex Kazakhstan كومپانياسىنىڭ GR ديرەكتورى مۇقاتوۆ م.ج. –نىڭ «سيفرلىق قولجەتىمدىلىك: ازاماتتىق قوعامعا كومەكتەسەتىن تەحنولوگيالار» تاقىرىبىنداعى بايانداماسى جانە ت.ب. قىزىقتى ءار ءتۇرلى سەكتور وكىلدەرىنىڭ تالقىلاۋ ديسكۋسسيا بولدى.
