وسى وتىرىستا ديرەكتورلار كەڭەسى «ازاماتتارعا ارنالعان ۇكىمەت» مەملەكەتتىك كورپوراسياسى» كەاق باسقارما ءتوراعاسىنا ابىلايحان وسپانوۆتى ءبىراۋىزدان سايلادى.
ءوزىنىڭ ەڭبەك قىزمەتىن «جاسىل ەل» جاستار ەڭبەك جاساعىنىڭ رەسپۋبليكالىق شتابىندا باستاعان، كەيىن جەكە كومپانيالاردا جۇمىس ىستەگەن، جوبا مەنەدجەرىنەن جوبالاردى باسقارۋ ءبولىمىنىڭ باستىعىنا دەيىن قىزمەت اتقاردى.
2011 جىلى ق ر ىشكى ىستەر مينيسترلىگىنە مەملەكەتتىك قىزمەتكە اۋىستى. تەحنيكالىق قىزمەت دەپارتامەنتىنىڭ اعا ينجەنەرى لاۋازىمىندا قىزمەت اتقاردى، ىىم-دە ءىت-جوبالاردى دامىتۋدى ۇيلەستىرۋمەن اينالىستى. پوليسيا لەيتەنانتى اتاعى بەرىلدى.
سونداي-اق، ق ر بايلانىس جانە اقپارات مينيسترلىگى اقپاراتتىق تەحنولوگيالار سالاسىنداعى مەملەكەتتىك ساياسات دەپارتامەنتى ديرەكتورىنىڭ ورىنباسارى، كولىك جانە كوممۋنيكاسيالار مينيسترلىگى مەملەكەتتىك قىزمەتتەردى اۆتوماتتاندىرۋدى باقىلاۋ جانە حالىققا قىزمەت كورسەتۋ ورتالىقتارىنىڭ قىزمەتىن ۇيلەستىرۋ كوميتەتى ءتوراعاسىنىڭ ورىنباسارى لاۋازىمدارىن اتقارعان.
2014 جىلى ەلەكتروندىق قىزمەت جانە حالىققا قىزمەت كورسەتۋ ورتالىعىن دامىتۋ دەپارتامەنتى باسشىسى بولىپ تاعايىندالدى. مەملەكەتتىك قىزمەتتەردى اۆتوماتتاندىرۋ جانە وڭتايلاندىرۋ جانە رۇقسات قۇجاتتار ماسەلەلەرىمەن اينالىستى، «مەملەكەتتىك كورسەتىلەتىن قىزمەتتەر تۋرالى»، «رۇقسات قۇجاتتار جانە حابارلامالار تۋرالى» زاڭ جوبالارىن ازىرلەۋگە قاتىستى. سونىمەن بىرگە، «حقكو» اقپاراتتىق جۇيەسىن، ەلەكتروندىق ۇكىمەتتى دامىتۋمەن جانە ءموبيلدى ۇكىمەتتى ەندىرۋمەن اينالىستى.
2015 جىلى «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى بولىپ تاعايىندالدى.
2016 جىلعى ساۋىردە «الماتى قالاسىن دامىتۋ ورتالىعى» اق باسقارما ءتوراعاسىنىڭ ورىنباسارى بولىپ تاعايىندالدى.
