وسكەمەندە وتكەن شقو قوعامدىق كەڭەستىڭ دەنساۋلىق ساقتاۋ جونىندەگى ساراپتاما جۇمىسى توبىنىڭ وكىلدەرى قاتىسقان كەزەكتى وتىرىس بارىسىندا كۆوتا بەرۋ جانە ناۋقاستاردى مۇگەدەتتىك توپقا شىعارۋ ماسەلەسى كوتەرىلدى. قوعامدىق كەڭەس مۇشەلەرىنىڭ ايتۋىنشا، ايماقتاعى مەملەكەتتىك دەنساۋلىق ساقتاۋ ۇيىمدارىنىڭ ماماندارى جەرگىلىكتى تۇرعىندارعا كۆوتا بەرۋ جانە مۇگەدەكتىك توپتارىن تىركەۋ جۇيەسى جايلى ءتۇسىندىرۋ جۇمىستارىن دۇرىس جۇرگىزبەگەن. ناتيجەسىندە مەملەكەت تاراپىنان جاسالىپ وتىرعان كومەك-قولداۋ جايلى تۇرعىندار تولىققاندى اقپاراتتانباعان.
– اقپاراتتاندىرۋ، قۇلاعدار ەتۋدىڭ ەڭ قاراپايىم، شىعىنسىز جولى بار. مىسالى، ءاربىر تۇرعىندى جەكە وتىرعىزىپ قويىپ، تۇسىندىرمەي اق، اۋرۋحانا، ەمحانالاردىڭ ىشىنە اقپاراتتىق ستەند قويۋعا بولادى. ەم-دوم الۋشى جازىلىپ تۇرعان اقپاراتتى وقىپ، قاجەتتى ماعلۇمات الار ەدى. ال بىزدە مۇنداي جۇمىستار جاسالماعان. دەمەك، بۇل جاۋاپتى شارۋاعا ءاتۇستى قاراۋ دەگەن ءسوز، – دەپ وتىر وبلىستىق ءماسليحاتتىڭ دەپۋتاتى ولەگ چەرنىشوۆ.
جيىنعا قاتىسۋشىلار اتالعان ماسەلەنى شەشۋ اقپاراتتاندىرۋ جۇمىستارىن ناتيجەلى جۇرگىزۋ ءۇشىن قوعامدىق كەڭەس مۇشەلەرى مەن مەملەكەتتىك ورگاندار بىرلەسە وتىرىپ اتقارعان ءجون دەيدى. بۇل شارۋاعا قوعامنىڭ ءالجۋاز توپتارىمەن جۇمىس جاساۋدا تاجىريبەسى بار ۇكىمەتتىك ەمەس ۇيىمداردى دا تارتقان ءجون. سونىمەن قاتار، قوعامدىق بەلسەندىلەر الەۋمەت ءۇشىن ماڭىزى بار جۇيەنى بارىنشا اشىق جۇرگىزۋگە شاقىردى.
