ءبىلىم مينيسترلىگى باسپا ءسوز قىزمەتىنىڭ اقپاراتىنا سايكەس، جوعارى وقۋ ورنىندا پروفيلاكتيكالىق باقىلاۋ جۇرگىزىلگەن. ناتيجەسىندە تەكسەرۋ پاراعىنىڭ 46 تارماعىنان 39 تارماعى بويىنشا زاڭبۇزۋشىلىق انىقتالعان.
ۋنيۆەرسيتەتكە ولاردى جويۋعا ۋاقىت بەرىلدى، ءبىراق جوعارى وقۋ ورنى ءبىلىم بەرۋ قىزمەتىنىڭ ساپاسىن جاقسارتۋ ءۇشىن قاجەتتى جۇمىس جۇرگىزبەگەن.
"شەت تىلدەر جانە ىسكەرلىك كارەرا ۋنيۆەرسيتەتىندە ءبىلىم بەرۋ ساپاسىن قامتاماسىز ەتۋدىڭ ىشكى جۇيەسى قالىپتاسپاعان. ءبىلىم بەرۋ باعدارلامالارىن، جەكە وقۋ جوسپارلارىن تالداۋ بەلگىلى ءبىر پاندەر بويىنشا كرەديتتەردى يگەرۋدە ۇلكەن ايىرماشىلىقتاردى كورسەتتى. تيىسىنشە، ءبىلىم الۋشىلار پاندەردى تولىق كولەمدە مەڭگەرمەيدى. وقىتۋ ناتيجەلەرى بويىنشا ستۋدەنتتەردىڭ 90%ء-ى شەكتى دەڭگەيدەن وتە المادى"، – دەدى بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ باسقارما باسشىسى ەلۆيرا ساپاربەكوۆا.
ايتۋىنشا، وقۋ پروسەسىندە ءتىپتى ەڭ تومەنگى بەلگىلەنگەن تالاپتارعا سايكەس كەلمەيتىن ەسكىرگەن كومپيۋتەرلەر قولدانىلعان.
بەيىندىك ماگيستراتۋرا تۇلەگىنە عىلىمي-پەداگوگيكالىق باعىتتاعى ماگيستر دارەجەسىن بەرۋ بويىنشا دا زاڭبۇزۋشىلىقتار انىقتالدى. مەملەكەتتىك اتتەستاتتاۋ كوميسسياسىنىڭ شەشىمىمەن ءبىر جىلدىق ماگيستراتۋرا تۇلەگىنە ەكى جىلدىق ماگيستر دارەجەسى بەرىلگەن.
كوميتەت انىقتالعان زاڭبۇزۋشىلىقتارعا بايلانىستى شەت تىلدەر جانە ىسكەرلىك كارەرا ۋنيۆەرسيتەتى ليسەنزياسىنىڭ قولدانىلۋىن توقتاتتى. بۇدان ءارى باس ليسەنزيادان ايىرۋ جانە جوعارى وقۋ ورنىن جابۋ بويىنشا جۇمىس جۇرگىزىلەدى.
زاڭناماعا سايكەس، ليسەنزيانىڭ كۇشى توقتاتىلعان جاعدايدا، ستۋدەنتتەر باسقا جوعارى وقۋ ورىندارىنا اۋىسا الادى. مينيسترلىك تالاپكەرلەردەن جوعارى وقۋ ورىندارىن تاڭداۋعا جاۋاپكەرشىلىكپەن قاراۋدى سۇرادى.
ايتا كەتەلىك، بۇعان دەيىن ءبىلىم جانە عىلىم ءمينيسترى اسحات ايماعامبەتوۆ ساپاسىز ۋنيۆەرسيتەتتەر جابىلادى دەپ مالىمدەگەن.
ۆەدومستۆو باسشىسىنىڭ ايتۋىنشا، جوعارى وقۋ ورىندارىنا ەرەكشە تالاپ قويىلادى. ۋنيۆەرسيتەتتەردە سىبايلاس جەمقورلىق فاكتىسى تىركەلسە، كادر دايىنداۋ ليسەنزياسىنان ايىرىلادى.
"جوعارى ءبىلىمنىڭ ساپاسىن ارتتىرۋ ءۇشىن پەداگوگتاردى، دارىگەرلەردى، زاڭگەرلەر مەن ساۋلەتشىلەردى دايارلايتىن ۋنيۆەرسيتەتتەرگە ەرەكشە بىلىك تالابىن ەنگىزەمىز. بۇعان قوسا اكادەميالىق ادالدىقتى بۇزعانى جانە سىبايلاس جەمقورلىق قۇقىق بۇزۋشىلىقتارى ءۇشىن ليسەنزيادان ايىرۋعا دەيىن جاۋاپكەرشىلىك نورماتيۆتىك قۇقىقتارعا بەكىتۋدى دايىندادىق. ساپاسىز جوعارى وقۋ ورىندارىن جابۋ جۇمىسىن ارى قاراي جالعاستىرامىز"، – دەگەن ەدى مينيستر ۇكىمەت وتىرىسىندا.
