ۇلتتىق قۋىرشاق ونەرىنىڭ تەمىرقازىعى سانالاتىن الماتى مەملەكەتتىك قۋىرشاق تەاترى فرانسيا مەملەكەتىندە وتەتىن زاماناۋي تەاتر ونەرىنىڭ ەڭ اۋقىمدى شارالارىنىڭ ءبىرى «Off Avignon» حالىقارالىق فەستيۆالىنە قاتىسۋعا جولداما الدى.
تاريحى 1947 جىلدان باستاۋ الاتىن الەمدەگى ەڭ بەدەلدى ءارى كورنەكتى مادەني شارا فرانسيا مەملەكەتى اۆينون قالاسىندا جىل سايىن وتكىزىلىپ كەلەدى. بۇگىندە فەستيۆال ءتۇرلى مەملەكەتتىڭ تۇكپىر-تۇكپىرىنەن كەلگەن شىعارماشىلىق ۇجىمداردى ءبىر ارناعا توعىستىرىپ، مادەني تاجىريبە الماسۋدىڭ ماڭىزدى ورتالىعىنا اينالىپ وتىر.
تەاتر اتالمىش فەستيۆال اياسىندا ۋيليام شەكسپيردىڭ كلاسسيكالىق تۋىندىسى «رومەو مەن دجۋلەتتا» سپەكتاكلىن 16-26 ماۋسىم كۇندەرى ساعات 20:40-تا «LaScierie» تەاترى ساحناسىندا ۇسىنادى. سپەكتاكل جاستاردىڭ تاڭداۋ ەركىندىگى، پاتريارحالدى جۇيەنىڭ قىسىمى، ۇرپاقتار اراسىنداعى تۇسىنىسپەۋشىلىك جانە الەمدەگى ۇلتارالىق تاپتىق، مادەني كەدەرگىلەر سياقتى وزەكتى ماسەلەلەردى قۋىرشاق ونەرىنىڭ زاماناۋي ءۇردىسى ارقىلى كورسەتەدى. اتالمىش سپەكتاكل رەجيسسەرى تالانتتى دينا جۇمابايدىڭ ەرەكشە شىعارماشىلىق قولتاڭباسى سپەكتاكلگە ەموسيونالدى تەرەڭدىك پەن استارلى سيمۆولداردى قوسىپ، ۆيزۋالدىق جانە مۋزىكالىق شەشىمدەر ارقىلى كورەرمەنگە ەرەكشە اسەر قالدىرادى. سپەكتاكلدە كوركەم قۋىرشاق پلاستيكاسى مەن اكتەرلىك ويىن ۇيلەسىمدى ۇشتاسىپ، پوەتيكالىق ءارى اسەرلى ساحنالىق اتموسفەرا قۇرىلادى.
«Off Avignon» فەستيۆالىنە قاتىسۋ الماتى قۋىرشاق تەاترىنىڭ تاريحىنداعى ايتۋلى بەلەس، ۇلتتىق قۋىرشاق ونەرىن الەمدىك دەڭگەيدە تانىستىرۋعا تاپتىرماس مۇمكىندىك. ءبىز كلاسسيكالىق شىعارما ۋيليام شەكسپيردىڭ «رومەو مەن دجۋلەتتا» تراگەدياسىن قۋىرشاق تىلىمەن جاڭاشا تۇرلەندىرىپ ۇسىندىق. سپەكتاكلدە اكتەرلىك شەبەرلىك پەن كوركەم قۋىرشاق پلاستيكاسى ۇيلەسىم تاۋىپ، كورەرمەنگە جاڭا ەستەتيكالىق اسەر سىيلايدى. سپەكتاكل وتكەن عاسىرداعى وتباسى تاريحىن عانا ەمەس، سونىمەن قاتار بۇگىنگى تاڭداعى وزەكتى ماسەلەلەردى قامتي كەلە، ماڭگىلىك وشپەس تاقىرىپتاردى تەرەڭىنەن قوزعايدى. بۇل ساپار ءبىزدىڭ ۇجىم ءۇشىن ۇلكەن جاۋاپكەرشىلىك ءارى شابىت كوزى»، - دەيدى مەملەكەتتىك قۋىرشاق تەاترىنىڭ ديرەكتورى المات امانگەلدى.
«رومەو مەن دجۋلەتتا» سپەكتاكلى 2024 جىلى كانادا مەملەكەتى وتتاۆا قالاسىندا وتكەن ءى-شى حالىقارالىق «وتتاۆا» قۋىرشاق تەاترلار فەستيۆالىنە تۇڭعىش رەت قاتىسىپ، «گران-پري» جۇلدەسىنە، 2022 جىلى بولگاريانىڭ ۆارنا قالاسىندا وتكەن «التىن دەلفين» حالىقارالىق فەستيۆالىندە «گران-پري»، سونداي-اق، «ەڭ ۇزدىك ەر ادام ءرولى» جانە «ەڭ ۇزدىك دەبيۋت» نوميناسيالارىن، 2021 جىلى قاراعاندىدا وتكەن «سىن - شىن بولسىن» رەسپۋبليكالىق تەاتر فەستيۆالىندە «گران-پري» جۇلدەسىن يەلەنگەن!
«Off Avignon» فەستيۆالىنە قاتىسۋ تەاتر ۇجىمى ءۇشىن زور مارتەبە عانا ەمەس، سونىمەن قاتار قازاق قۋىرشاق ونەرى مەن مادەني بولمىسىن الەم جۇرتشىلىعىنا تانىتاتىن بىرەگەي مۇمكىندىك. بۇل - ۇلتتىق ونەردىڭ وزىندىك بوياۋى مەن تەرەڭ رۋحاني ءمانىن حالىقارالىق دەڭگەيدە پاش ەتىپ، قازاق مادەنيەتىنىڭ كوپقىرلىلىعىن كورسەتۋگە جول اشاتىن، شىعارماشىلىق ىزدەنىستەر مەن رۋحاني ۇندەستىكتەر توعىساتىن اسا ماڭىزدى الاڭ.
ەۋروپا ساحناسىندا ەل اتىن اسقاقتاتاتىن ارىپتەستەرىمىزگە ساتتىلىك تىلەيمىز!
