مەرەكەلىك شارا «قىزاي انا» قوعامدىق قورىنىڭ ءتوراعاسى، پروفەسسور ءنابيجان مۇحامەتحان ۇلىنىڭ حالىقتى ۇلىستىڭ ۇلى كۇنىمەن قۇتتىقتاپ، «قىزاي انا» قورى جۇمىسىن قىسقاشا تانىسترىپ، سىيلى قوناقتارعا شاپان كيگىزۋىمەن باستادى. اۋىل، اۋدان اكىمدەرى، قوعام قايراتكەرلەرىنىڭ اقجارما تىلەكتەرىن ايتىپ، اۋىل اقساقالدارى باتا بەردى. بۇدان كەيىن جاستار مەن جاسوسپىرىمدەر اراسىنداعى سپورتتىق جارىستار مەن مەرەكەلىك كونسەرتتىك باعدارلاما قاتار باستالدى. ق ر مادەنيەت قايراتكەرى، «قۇرمەت» وردەنىنىڭ يەگەرى تىلەۋبەك قوجان جانە نۇرشات زەيىپحان، ءادىل ءسىلامحان، اسقار اكىمبەك، ءلالا باقىتنۇر قىزى قاتارلى ءبىر توپ ءانشى ونەرپازدار اننەن شاشۋ شاشىپ، بيشىلەر ساحنانى سانگە بولەپ، اقىندارىمىز جىر مارجانىن جاۋدىردى.
كونسەرتتىك باعدارلامانىڭ ورتاسىندا «قىزاي انا» قوعامدىق قورى ۇيىمداستىرعان يگى شارالاردىڭ ماراپاتتاۋلارىنا دا كەزەك بەرىلىپ تۇردى. وسى يگى شارانىڭ ءبىرى – جاستارىمىزدى ءبىلىم مەن عىلىمعا ىنتالانتىرۋ ماقساتىندا جوعارى وقۋ ورىندارىندا ءبىلىم الىپ جاتقان ۇزدىك ستۋدەنتتەرگە ستيپەنديا تاعايىنداۋ. عالىم ءنابيجان مۇحامەتحان ۇلى وقۋداعى جەتىستىكتەرى مەن قوعامدىق جۇمىستاعى بەلسەندىلىگى ءۇشىن ءال-فارابي اتىنداعى قازۇۋ-دىڭ ماگيسترانتى مۇقتاي كلاراعا 100 مىڭ تەڭگە، ءال-فارابي اتىنداعى قازۇۋ-دىڭ 1-كۋرس ستۋدەنتى بولات ءبۇبىساراعا 70 مىڭ تەڭگە، تەحنولوگيا-ەكونوميكالىق كوللەدجىنىڭ 2-كۋرس ستۋدەنتى نۇردانعالي جايناعا 50 مىڭ تەڭگە، تالعار اۋدانى وستەمىر اۋىلى №14 مەكتەبىنىڭ 9-شى سىنىپ وقۋشىسى بەگالى بايسالدىعا 50 مىڭ تەڭگە قارجىلاي سىيلىق تابىس ەتتى.
[caption id="attachment_25407" align="alignleft" width="506"]
ءمۇشايرا جۇلدەگەرلەرى[/caption]
ەستەرىڭىزدە بولسا، «قىزاي انا» قوعامدىق قورى الاش وردا ۇكىمەتىنىڭ 100 جىلدىعىنا وراي «ادەبيەت» پورتالىندا «ايبىندى الاشىم» اتتى جاس اقىندار اراسىنداعى جىر ءمۇشايراسىن جاريالاعان بولاتىن. ءادىلقازىلار جەڭىمپاز دەپ بەلگىلەگەن اقىنداردى ماراپاتتاۋ دا وسى ناۋرىز مەرەكەلىك شاراسىنىڭ اياسىندا ءوتىپ، جىر ءمۇشايراسىنىڭ قازىلارى مەن قور مۇشەلەرى جەڭىمپاز اقىنداردى سالتاناتتى تۇردە ماراپاتتادى. بيىلعى جىلعى ناۋرىز مەرەكەلىك داستارقان شىعىنىن كوتەرگەن قور قۇرىلتايشىسىنىڭ ءبىرى سابىرجان مۇحامەتحان ۇلى جىر ءمۇشايراسىنىڭ نەگىزگى جۇلدە قورى 500 مىڭ تەڭگەنى ءوزى اتاعان بولاتىن. ءادىلقازىلار القاسى
باس جۇلدەگە باياناۋىلدىق جاس اقىن ەلامان حاسەن ۇلىنا بەرىلدى (200 مىڭ تەڭگە).
ءبىرىنشى ورىندى الماتىلىق اقىن تولەگەن مەللات الدى (150 مىڭ تەڭگە).
ەكىنشى ورىندى الماتىلىق جاس اقىن ايبول يسلامعالييەۆ يەلەنسە (100 مىڭ تەڭگە)،
ءۇشىنشى ورىن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 1-كۋرس ستۋدەنتى عىلىمنۇر كادىرباي ۇلىنا بۇيىردى (50 مىڭ تەڭگە).
سونىمەن بىرگە «قىزاي انا» قورى اقىن تالاپبەك تىنىسبەك ۇلى مەن بالتابەك نۇرعالييەۆكە ارنايى جۇلدە تابىس ەتسە، جاس كاسىپكەر جولدىباي وشىرباي ۇلى الاش ءتۇرسىنالى مەن دينارا مالىككە «قىزاي انا» قورىنىڭ اتىنان ارنايى جۇلدە تاعايىندادى.
«قىزاي انا» قوعامدىق قورى اقىندار اراسىنداعى ءمۇشايرانى وسىمەن ەكىنشى جىل وتكىزسە، ستۋدەنتتەر مەن وقۋشىلارعا ستيپەنديانى بەس جىلدان بەرى تاعايىنداپ كەلەدى. سونىمەن بىرگە قور اتىنان بەلگىلى كاسىپكەر، «قىزاي انا» قورىنىڭ حاتشىسى، الماتىداعى «ءساتتىباي» كومپانياسىنىڭ ءتوراعاسى ءومارالى ادىلبەك ۇلى دا جىل سايىن تالعار اۋدانى وستەمىر اۋىلى №14 مەكتەبىنىڭ وتباسىندا قيىنشىلىعى بار، وقۋدا وزات 5 وقۋشىعا 30 مىڭ تەڭگەدەن قارجىلاي سىيلىق بەرىپ كەلەدى. بيىلدا داستۇرگە ساي 1-سىنىپتان 7-سىنىپقا دەيىنگى 5 وقۋشىعا سىيلىعىن ءوز قولىمەن تابىستادى.
مەرەكە سپورتتىق جارىستاردا ماراپاتقا يە بولعان جاستار مەن جاسوسپىرىمدەردىڭ سىيلىقتارىن تابىس ەتۋمەن مارەسىنە جەتتى. كەلگەن بارشا قوناق ارنايى تىگىلگەن كيگىز ۇيلەردە جايىلعان داستارقاندارعا رەتىمەن كىرىپ كەڭ داستارقاننان ءدام تاتتى.
ەسكەرە كەتەيىن، «قىزاي انا» قوعامدىق قورى ۇيىمداستىرعان وستەمىر اۋىلىنداعى ناۋرىز مەرەكەسىنىڭ داستارقانىن ءار جىلى ءبىر اۋلەت نە بىرنەشە ازامات ءوز مويىندارىنا الادى. سپورتتىق شارالار مەن جىر ءمۇشايراسىنىڭ شىعىنىن دا داستارقان جايعان ازاماتتار شىعارادى. بيىلعى جىلعى ناۋرىز مەرەكەلىك داستارقانىن «قىزاي انا» قوعامدىق قورىنىڭ ءتوراعاسى، تاريحشى، پروفەسسور ءنابيجان مۇحامەتحان ۇلى جانە ىنىلەرى ءانۋار مۇحامەتحان ۇلى مەن سابىرجان مۇحامەتحان ۇلى جايدى.
تۇردىبەك قۇرمەتحان
سۋرەتتەردى تۇسىرگەن بەكزات تۇرعىن ۇلى
