بۇگىندە جاستار اراسىندا وتانشىلىدىق سەزىمىن وياتۋ ماڭىزدى مىندەتتەردىڭ ءبىرى. ەل قورعانى بولاتىن جاستاردىڭ وسى باعىتتا قالاي تاربيەلەۋگە بولادى؟ بۇعان اركىم ءارتۇرلى جاۋاپ بەرەتىنى انىق. وسى سۇراققا تاياۋدا اياگوزدە جاۋاپ تابىلعانداي. تاۋەلسىزدىك مەرەكەسى قارساڭىندا اياگوز قالاسىنداعى №6 ورتا مەكتەپتىڭ تۇلەكتەرى جاس جەتكىنشەكتەردىڭ وتانشىلدىق سەزىمىن دامىتۋعا تاربيەلەيتىن «جاس سارباز» اسكەري-پاتريوتتىق كلۋبىنىڭ مۇشەلەگىنە ءوتتى، – دەپ حابارلايدى Dalanews.kz.

كەڭەس زامانىندا ەلىمىزدە كوپتەگەن اسكەري-پاتريوتتىق ۇيىمدار جۇمىس ىستەگەن ەدى. كەيىننەن ونىڭ ءبارى جابىلىپ قالعانى جاسىرىن ەمەس.

اياگوزدىك ورەندەر سول ەسكى ءداستۇردى جاڭعارتىپ، اسكەري-پاتريوتتىق كلۋب قۇرىپ، جاس جەتكىنشەكتەردى وتانشىلدىق سەزىمگە باۋلىپ كەلەدى.

«جاس سارباز» اسكەري-پاتريوتتىق كلۋبىنىڭ قۇرامىنا جاڭا مۇشەلەردى قابىلداۋ شاراسىنا اۋدانداعى اۋعان سوعىسى ارداگەرلەرى، وقۋ ءبولىمىنىڭ قىزمەتكەرلەرى مەن اسكەريلەر قاتىستى. سالتاناتتى شارادا كلۋب بەلسەندىلەرى قاتارلارىنا قابىلدانعان 25 وقۋشىعا كلۋبتىڭ مۇشەسى ەكەنىن ايعاقتايتىن كاۋلىكتى تابىستاپ، ولاردان انت قابىلدادى.

انت بەرۋ راسىمىندە جاس ساربازدار قازاقستان رەسپۋبليكاسى كونستيتۋتسياسىن ساقتاۋعا، وتانىمىزدى قورعاۋعا انت بەردى. وسىلايشا «جاس ساربازدىڭ» جاڭا قۇراممەن تولىقۇانىنا كۋا بولدىق.

جيىنعا قاتىسۋشىلار جاس جەتكىنشەكتەردىڭ وسىنداي كلۋب، ۇيىرمەلەردىڭ جۇمىسىنا بەلسەنە قاتىسۋى ولاردىڭ بولاشاقتا ءوز وتانىن سۇيەتىن پاتريوت ازامات بولىپ قالىپتاسۋىنا جول اشاتىنىن العا تارتىپ، «جاس سارباز» اسكەري-پاتريوتتىق كلۋبىنىڭ جۇمىسىنا ساتتىلىك تىلەدى.