– بۇل جاعدايدى وبلىس اكىمى باقىلاۋىندا. دانيال احمەتوۆتىڭ تاپسىرماسىمەن ۆەدومستۆوارالىق كوميسسيا قۇرىلىپ، تەكسەرۋ جۇمىستارى جۇرگىزىلدى. ناتيجەسىندە اتالمىش ورتالىقتىڭ 4 تاربيەلەنۋشىسى نەگىزگى اۋىر جانە ىلەسپە اۋرۋلاردان قايتىس بولعانى انىقتالدى. كوميسسيا مۇشەلەرى جۇرگىزگەن زەرتتەۋ جۇمىستارىنىڭ قورتىندىسى بويىنشا بالالاردىڭ ءارتۇرلى تۋا بىتكەن اۋرۋلارىنىڭ اسقىنۋىنىڭ سالدارىنان ءبىر اي ىشىندە ءارتۇرلى ۋاقىتتا قايتىس بولعانى انىقتالدى، – دەدى الىشەر مارحابات.
رەسمي دەرەك كوزىنە سۇيەنسەك، ءبىرىنشى 2 ءساۋىر كۇنى 24.12.2008 جىلى تۋىلعان ۇل بالانىڭ قازاسى بالادا تىركەلگەن. ەكىنشى رەت 11 ءساۋىر كۇنى 17.11.2009 جىلى تۋىلعان تاعى ءبىر ۇل بالا قايتىس بولسا، 20 ءساۋىر كۇنى 11.03.2006 جىلى تۋىلعان ۇل بالا قايتىس بولادى. ال 29 ءساۋىر كۇنى تىركەلگەن قايعىلى وقيعادا 24.08.2012 جىلى دۇنيەگە كەلگەن قىز بالا ومىردەن ءوتتى.
تەكسەرۋ بارىسىندا قايتىس بولعان بالالاردا قىزىلشا اۋرۋى انىقتالماعان. وكىنىشكە قاراي، قايتىس بولعان بالالاردىڭ تورتەۋىنەن دە اتا-انالارى باس تارتقان ەكەن.
كوميسسيا قۇرامىندا الەۋمەتتىك قورعاۋ، دەنساۋلىق ساقتاۋ باسقارمالارىنىڭ، شقو بويىنشا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ، اۋداندىق اكىمدىكتىڭ باسشىلارى مەن وكىلدەرى، وبلىستىق جانە اۋداندىق پروكۋراتۋرا مەن پوليسيا قىزمەتكەرلەرى بولعان. بۇدان باسقا بەيىندى مەديسينالىق ماماندار – وبلىستىڭ باس پەدياتر، دارىگەر ينفەكسيونيست، مەديسينالىق باقىلاۋ قىزمەتكەرلەرى كوميسسيا جۇمىسىنا ارالاسقانىن ايتا كەتۋىمىز كەرەك.
– وبلىستىڭ باس پەدياترى مەن ينفەكسيونيست دارىگەرىنىڭ باسشىلىعىمەن جاۋاپتى سالا ماماندارى بالالار ورتالىعىنىڭ قامقورلىققا الىنعان 98 تاربيەلەنۋشىسىن قارادى. ناتيجەسىندە بالالاردىڭ جاعدايى جاقسى ەكەنى انىقتالدى. تەكسەرۋ بارىسىندا تاربيەلەنۋشىلەردەن تەرى ويىلۋلارى بايقالمادى. بالالار تاماقپەن تولىق قامتاماسىز ەتىلگەن، مەديسينالىق جانە الەۋمەتتىك قىزمەتتەردىڭ بارلىق كولەمىن الىپ وتىرعانى انىقتالدى، – دەدى الىشەر مارحابات.
كوميسسيا جۇمىسىنىڭ قورىتىندىسى نەگىزىندە ىشكى ىستەر ورگاندارى بالالار ولىمىنە قاتىستى ق ر قك 317-بابىنىڭ 4-تارماعى بويىنشا («مەديسينا نەمەسە فارماسيەۆتيكا جۇمىسكەرىنىڭ كاسىپتىك مىندەتتەرىن تيىسىنشە ورىنداماۋى» 4. وسى باپتىڭ ءبىرىنشى بولىگىندە كوزدەلگەن، ابايسىزدا ەكى نەمەسە ودان كوپ ادامنىڭ ولىمىنە اكەپ سوققان ىس-ارەكەتتەر) قىلمىستىق ءىس قوزعادى. ءقازىر سوتقا دەيىنگى تەرگەۋ جۇمىستارى باستالدى.
– كوميسسيا مۇشەلەرى مەديسينالىق قۇجاتتاردى جۇرگىزۋ بولىگىندە ورىن العان ولقىلىقتاردى انىقتادى. سوعان بايلانىستى ءىس جۇرگىزۋ نورمالارىنا سايكەس شقو بويىنشا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى اتالمىش ورتالىقتىڭ قىزمەتىنە قۇزىرەتىنە كىرەتىن ماسەلەلەرى بويىنشا تەكسەرۋدى جالعاستىرۋدا. اتالعان زاڭ بۇزۋشىلىقتار بويىنشا لاۋازىمدى تۇلعالاردى جاۋاپكەرشىلىككە تارتۋ شاراسى جۇرگىزىلگەن تەكسەرۋ قورىتىندىسى بويىنشا قارالادى، – دەدى الىشەر مارحابات.
سونىمەن قاتار، ىشكى باقىلاۋ اياسىندا الەۋمەتتىك قورعاۋ باسقارماسىمەن اتالمىش ورتالىقتىڭ ديرەكتورى، ونىڭ ورىنباسارى، سونداي-اق ورتالىق پەن باسقارمانىڭ بەيىندى بولىمدەرىنىڭ باسشىلارى تارتىپتىك جاۋاپكەرشىلىككە تارتىلدى.
ۆەدومستۆوارالىق كوميسسيانىڭ جۇمىسى اياسىندا زەرتحانا ماماندارى 146 ادامنان، ونىڭ ىشىندە 96 تاربيەلەنۋشى، 50 قىزمەتكەردەن يممۋنيتەت كەرنەۋلىگىنە تالداۋ جاسادى. تالداۋدىڭ قورتىندىسىنا سايكەس 9 تاربيەلەنۋشى، 2 قىزمەتكەر واا جۇقپالى اۋرۋلار بولىمىندە ەمدەلگەن. قازىرگى كۇنى ولار اۋرۋحانادان شىقتى.
بۇگىندە بۇل ورتالىقتا 35 قىز بەن 65 ۇل تاربيەلەنۋدە. ونىڭ ىشىندە 24 بالانىڭ اتا-اناسى بار. 11ء-ى تۇراقتى تۇردە كەلىپ تۇرادى. ال 7 اتا-انا بالالارىنىڭ جاعدايىن تەلەفون شالىپ، سۇراپ تۇرادى. قالعان 6 بالالارىنىڭ جاعدايى مۇلدەم قىزىقتىرمايدى.
وكىنىشكە قاراي، 20 بالادان اتا-اناسى باس تارتقان. سونىمەن قاتار مۇندا 9 جەتىم بالا تاربيەلەنۋدە. سونداي-اق، اتا-اناسىنىڭ قامقورلىعىنسىز قالعان 5 بالا بار. 42 بالانىڭ اتا-اناسى قۇقىعىنان ايىرىلعان.
رەسمي دەرەك كوزدەرىنە سۇيەنسەك، مۇنداعى 85 تاربيەلەنۋشى بالا كەزىنەن بەرى مۇگەدەك. ال 8 بالا ءبىرىنشى توپتاعى بولسا، 7 بالا ەكىنشى توپتاعى مۇمكىندىگى شەكتەۋلى جاندار قاتارىنا جاتادى.
– كوميسسيا مۇشەلەرى بالالاردىڭ دەنە سالماعىنىڭ جەتىسپەۋشىلىگى تۋا بىتكەن اۋرۋلاردىڭ ەرەكشەلىگى مەن اۋىرلىعىنا بايلانىستى ەكەنىن انىقتادى. مۇنداي پاتولوگياسى بار بالالاردىڭ فيزيكالىق دامۋىندا ارتتا قالۋشىلىقتار بار. ايتا كەتەيىك، وتكەن جىلى وبلىس اكىمىنىڭ تاپسىرماسى بويىنشا قۇرىلعان قوعامدىق كوميسسيانىڭ جۇمىسى اياسىندا قوعام وكىلدەرى، اتا-انالار مەن ب ا ق وكىلدەرى وسى ورتالىققا بارىپ، بالالاردىڭ ستاندارتقا سايكەس بارلىق مەديسينالىق جانە الەۋمەتتىك قىزمەتتەردى الىپ وتىرعاندارىن كورىپ قايتتى. سونداي-اق، مەكەمەنىڭ ۇيىمدىق-قارجىلىق قىزمەتىن مەملەكەتتىك اۋديت ورگاندارى تەكسەرگەنىن اتاپ وتكەن ءجون، – دەدى الىشەر مارحابات.
