استانادا ءى توپتاعى مۇمكىندىگى شەكتەۋلى پاراسپورتشىلاردان جۇيەلى تۇردە اقشا جينالدى دەگەن دەرەك قوعام نازارىن اۋدارتتى. بۇل جاعداي بويىنشا الدىمەن ادۆوكات مالىمدەمە جاساپ، كەيىن رەسمي شاعىم جولدانعان. وقيعانىڭ ءمان-جايىن پاراسپورتشىنىڭ ءوزى دە اشىق باياندادى، دەپ حابارلايدى Dalanews.kz.
ادۆوكات مالىمدەمەسى
ادۆوكات داستان يگۋبايەۆتىڭ ايتۋىنشا، ونىڭ قورعاۋىنداعى ەكى پاراكاراتەشى، ءى توپتاعى مۇگەدەكتىگى بار سپورتشىلار 2023 جىلدان بەرى جۇمىس بارىسىندا جۇيەلى قىسىمعا تاپ بولعان.
“جالاقىلارى شامامەن 137 مىڭ تەڭگە بولعان. سونىڭ 50 مىڭ تەڭگەسىن اي سايىن ءتۇرلى نومىرگە اۋدارىپ وتىرۋ تالاپ ەتىلگەن. بۇل تالاپ ورىندالماسا، جۇمىستان شىعارۋ ءقاۋپى بولعان”، - دەدى ادۆوكات.
ونىڭ سوزىنشە، سپورتشىلار بۇل جاعدايعا بايلانىستى قۇقىق قورعاۋ ورگاندارىنا جۇگىنگەنىمەن، ءىس ءالى كۇنگە دەيىن قوزعالماعان.
“قاڭتار ايىنان بەرى قىلمىستىق ءىس قوزعالماي وتىر. ماتەريالدار ءبىر ورگاننان ەكىنشىسىنە جىبەرىلىپ، ناقتى ناتيجە جوق”، - دەيدى ول.
رەسمي شاعىم
ادۆوكاتتىڭ اتىنان جولدانعان رەسمي شاعىمدا وقيعانىڭ ءمان-جايى تولىق باياندالعان. قۇجاتتا كورسەتىلگەندەي، سپورتشىلار جۇمىسپەن قامتۋ باعدارلاماسى ارقىلى استاناداعى كاراتە فەدەراسياسىنا جۇمىسقا ورنالاسقان.
الايدا العاشقى جالاقى تۇسكەننەن كەيىن ولاردان اي سايىن 50 مىڭ تەڭگەدەن اۋدارىپ وتىرۋ تالاپ ەتىلگەن.
شاعىمعا سايكەس، بۇل قاراجات ناقتى كورسەتىلگەن تەلەفون نومىرلەرىنە اۋدارىلىپ وتىرعان. ال باس تارتقان جاعدايدا جۇمىستان شىعارۋ تۋرالى ەسكەرتۋ جاسالعان.
سونىمەن قاتار ارىز 2026 جىلدىڭ 16 قاڭتارىندا پوليسياعا بەرىلگەنىمەن، ول ءبىرىڭعاي سوتقا دەيىنگى تەرگەپ-تەكسەرۋ تىزىلىمىنە (ەردر) تىركەلمەگەن.
“بۇل پروسەسسۋالدىق شەشىم زاڭ تالاپتارىنا قايشى. قىلمىس بەلگىلەرى بولعان جاعدايدا ءىس مىندەتتى تۇردە تىركەلۋى ءتيىس”، - دەلىنگەن شاعىمدا.
قۇجاتتا سونداي-اق اقشا قايتارىلعانىمەن، بۇل جاعداي قۇقىقتىق جاۋاپكەرشىلىكتى جوققا شىعارمايتىنى اتاپ وتىلگەن.
پاراسپورتشىنىڭ ءوزى نە دەيدى
وسى ارادا Dalanews.kz رەداكسياسى دا اتالعان جاعداي بويىنشا پاراسپورتشىنىڭ مالىمدەمەسىنە نازار اۋداردى. ول بۇعان دەيىن Sportbugin.kz سايتىنا سۇحبات بەرگەن.
جەتەس نۇرماعانبەتوۆتىڭ ايتۋىنشا، 2021 جىلدان باستاپ پاراكاراتەمەن اينالىسىپ، كەيىن فەدەراسيا ارقىلى جۇمىسقا قابىلدانعان.
“باستاپقىدا 102 مىڭ تەڭگە الدىق، كەيىن 120 مىڭ تەڭگەگە دەيىن ءوستى. ءبىراق اي سايىن 50 مىڭ تەڭگەنى بەلگىلى ادامداردىڭ Kaspi نومىرلەرىنە اۋدارىپ وتىردىق”، - دەيدى ول.
ونىڭ سوزىنشە، بۇل قاراجاتتىڭ قايدا جۇمسالاتىنى العاشىندا تۇسىندىرىلمەگەن. كەيىن “مۇقتاج جاندارعا كومەك” رەتىندە جىبەرىلەتىنى ايتىلعان.
الايدا ۋاقىت وتە كەلە سپورتشى بۇل تالاپتارعا قارسى شىققان.
“مەن يپوتەكا العانىمدى ايتىپ، ەندى اقشا اۋدارا المايتىنىمدى جەتكىزدىم. سول كەزدە ماعان قىسىم كورسەتىلىپ، جۇمىستان شىعاراتىنىن ايتتى”، — دەيدى ول.
سونىمەن قاتار ول قۇجات جۇزىندە گاردەروبشى جانە پروگرامميست بولىپ تىركەلگەنىن، ءبىراق ءىس جۇزىندە تەك جاتتىعۋمەن اينالىسقانىن اتاپ ءوتتى.
اقشا قايتارۋ جانە كەشىرىم سۇراۋ
سپورتشىنىڭ ايتۋىنشا، 2026 جىلدىڭ قاڭتارىندا eء-وتىنىش ارقىلى شاعىمدانعاننان كەيىن فەدەراسيا باسشىسى ونىڭ ۇيىنە بارىپ، كەشىرىم سۇراعان.
“1 ملن 150 مىڭ تەڭگەنى قولما-قول الىپ كەلدى. ءبىراق مەن ول اقشانى المادىم. كەيىن ول اقشا باسقا نومىرلەر ارقىلى مەنىڭ شوتىما اۋدارىلدى”، — دەيدى جەتەس نۇرماعانبەتوۆ.
ول سونداي-اق وزىنەن بولەك تاعى بىرنەشە ادامنان اقشا جينالعانىن ايتتى.
فەدەراسيا باسشىسى ايىپتاۋدى جوققا شىعاردى
بۇل جاعدايعا قاتىستى فەدەراسيا وكىلى مەيرامگۇل دۋكۋيەۆا وزىنە تاعىلعان ايىپتاۋلاردى جوققا شىعاردى.
“مۇنىڭ بارلىعى - جالا. بۇعان دەيىن دە ارىزدار بولعان، ءبىراق ەشقايسىسى دالەلدەنگەن جوق. قالاسا، تاعى دا سوتقا جۇگىنسىن”، — دەدى ول.
قازىرگى تاڭدا بۇل ىسكە قاتىستى قۇقىق قورعاۋ ورگاندارى تاراپىنان رەسمي قورىتىندى جاريالانعان جوق.
