بۇگىن تۇركىستان قالاسىنداعى وقۋشىلار سارايىنىڭ ءماجىلىس زالىندا «AMANAT» پارتياسى تۇركىستان وبلىستىق فيليالىنىڭ ۇيىمداستىرۋىمەن اۋىلدىق وكرۋگ اكىمدەرىنىڭ ايماقتىق فورۋمى جۇمىسىن باستادى،- دەپ حابارلايدى Dalanews.kz
فورۋم جۇمىسىنا تۇركىستان وبلىسى اكىمىنىڭ ورىنباسارى بەيسەنباي تاجىبايەۆ، قازاقستان رەسپۋبليكاسى پارلامەنتى ماجىلىسىندەگى «AMANAT» پارتياسى فراكسياسىنىڭ دەپۋتاتتارى اسحات ايماعانبەتوۆ، تەمىر قىرىقبايەۆ، نۇرسۇلتان بايتىلەسوۆ، تۇركىستان وبلىستىق ءماسليحاتىنىڭ ءتوراعاسى نۇرالى ءابىشوۆ، ءماسليحات دەپۋتاتتارى، وبلىستىق دەپارتامەنتتەر مەن باسقارما باسشىلارى، اۋىلدىق وكرۋگ اكىمدەرى، وبلىستىق پارتيا فيليالىنىڭ جاۋاپتى وكىلدەرى مەن اۋماقتىق پارتيا فيليالدارىنىڭ جەتەكشىلەرى قاتىستى. فورۋم جۇمىسىنا «AMANAT» پارتياسى تۇركىستان وبلىستىق فيليالىنىڭ ءتوراعاسى، تۇركىستان وبلىستىق ءماسليحاتىنداعى پارتيالىق فراكسيا جەتەكشىسى التىنسارى ۇمبەتالييەۆ ءتوراعالىق ەتتى.
فورۋم الاڭى اۋىلدىق دەڭگەيدەگى باسقارۋ جۇيەسىن جەتىلدىرۋدى، اكىمدەردىڭ كاسىبي الەۋەتىن ارتتىرۋدى، سونداي-اق، ناقتى پروبلەمالاردى شەشۋ جولدارىن بىرلەسە قاراستىرۋدى كوزدەدى. اۋىل حالقىنىڭ ەڭ جاقىن تىرەگى، جەرگىلىكتى ماسەلەلەردىڭ شەشىمىن تاباتىن نەگىزگى لاۋازىم يەسى – بۇل اۋىل اكىمى ەكەنى بايىپتالىپ، تۇرعىنداردىڭ ءال-اۋقاتىن ارتتىرۋ، كاسىپكەرلىكتىڭ دامۋىنا جاعداي جاساۋ مىندەتتەرىنىڭ ورىندالۋى، ەڭ الدىمەن اكىمدەردىڭ ىسكەرلىك قارىم-قابىلەتىنە تىكەلەي بايلانىستى بولىپ تابىلاتىنىنا نازار اۋدارىلدى.
«مەملەكەت باسشىسى قاسىم-جومارت كەمەل ۇلى توقايەۆ: «حالىقپەن ءتيىمدى كەرى بايلانىس ورناتۋ – جەرگىلىكتى باسقارۋدىڭ باستى قاعيداتى بولۋى كەرەك»، – دەپ اتاپ وتكەن بولاتىن. سوندىقتان، سىزدەردىڭ جۇمىستارىڭىز – تەك اكىمشىلىك ەمەس، قوعاممەن تىكەلەي جۇمىس ىستەۋ، حالىقتىڭ ۇنىنە قۇلاق اسۋ، سەنىمدى اقتاۋ جولىنداعى كۇندەلىكتى ەڭبەك. اۋىل – ەل تىرەگى عانا ەمەس، بولاشاقتىڭ باستاۋى. اۋىل كوتەرىلسە – ەل ەڭسەسىن تىكتەيدى. ءار اۋىلدىڭ دامۋى – ەلدىڭ وركەندەۋىنە تىكەلەي اسەر ەتەدى. سوندىقتان دا، ءاربىر اكىم، ءوز اۋىلىن شاعىن ورتالىق رەتىندە دامىتۋدى ماقسات تۇتۋى ءتيىس. سىزدەردىڭ كۇندەلىكتى ەڭبەكتەرىڭىز، شىنايى جاناشىرلىقتارىڭىز ارقىلى اۋىلدارىمىز وزگەرەدى، جاڭارادى، جاڭعىرادى»، - دەدى التىنسارى ۇمبەتالييەۆ فورۋم جۇمىسىن باستاۋعا ارنالعان العىسوزىندە.
اتاپ ءوتۋىمىز كەرەك، «AMANAT» پارتياسى مەملەكەت باسشىسىنىڭ قوعامدىق-ساياسي تىرەگى رەتىندە، جاڭا قازاقستاننىڭ ساياسي جۇيەسىن جاڭارتۋعا، ەلدىڭ تۇتاستىعىن بەكەمدەيتىن ساياسي ۇردىستەردىڭ بارىنشا اشىق بولۋىنا ۇلەسىن قوسۋدا. پارلامەنت ءماجىلىسىنىڭ سپيكەرى، پارتيا ءتوراعاسى ەرلان جاقان ۇلى قوشانوۆ اۋىل اكىمدەرىنىڭ سايلاۋى، ەڭ الدىمەن، اۋىل تۇرعىندارىنىڭ مۇددەسىن قورعاۋعا باعىتتالعانىن ەرەكشە ايتقان بولاتىن. بۇل تۇرعىدا، قازاقستان حالقىنىڭ 40 پايىزدان استامى، اۋىل تۇرعىندارى بولىپ تابىلاتىنى ەسكەرىلىپ، ازاماتتاردىڭ ەل باسقارۋ جانە شەشىم قابىلداۋ پروسەسستەرىنە قاتىسۋىنا جول اشىلدى. تۇرعىندارىنىڭ باسىم كوپشىلىگى اۋىلداردا تۇراتىن تۇركىستان وبلىسىندا 2021 جىلدان بەرى 226 مارتە اۋىل اكىمدەرىنىڭ سايلاۋى ءوتىپ، سونىڭ 214-دە «AMANAT» پارتياسىنىڭ كانديداتتارى جەڭىسكە جەتكەن.
تۇركىستان وبلىسىنىڭ اكىمشىلىك-اۋماقتىق قۇرىلىمىندا 181 اۋىلدىق وكرۋگى بولسا، پارتيامىز باستاماشىل بولعان بۇگىنگى فورۋمعا 137 اۋىلدىق وكرۋگتىڭ اكىمى قاتىسىپ، مەملەكەتتىك بيلىكتىڭ ءاربىر ەلدى مەكەندەگى تىكەلەي وكىلى بولىپ تابىلاتىن اۋىل اكىمدەرىنىڭ ءرولى مەن جاۋاپكەرشىلىگى ماسەلەسى جان-جاقتى قارالدى. فورۋم جۇمىسىنا قاتىسقان وبلىس اكىمىنىڭ ورىنباسارى بەيسەنباي تاجىبايەۆ بۇگىنگى جيىن ەل بولاشاعىنا قىزمەت ەتەتىن اۋىل اكىمدەرىنىڭ كاسىبي جانە قوعامدىق ءرولىن ارتتىرۋعا ارنالعان ماڭىزدى ساياسي-الەۋمەتتىك ديالوگ الاڭى بولىپ وتىرعانىن جەتكىزدى. وسى ءىس-شارانىڭ باستاماشىسى بولىپ وتىرعان “اماNات” پارتياسىنىڭ تۇركىستان وبلىستىق فيليالىنا وبلىس باسشىلىعىنىڭ اتىنان زور العىسىن ءبىلدىردى.
«2021 جىلعى 25 شىلدەدەن بۇگىنگى كۇنگە دەيىن وبلىس اۋماعىنداعى 181 اۋداندىق باعىنىستاعى قالا، كەنت، اۋىلدىق وكرۋگ، اۋىل اكىمى لاۋازىمدارىنا 226 اكىمدەردىڭ تىكەلەي سايلاۋى ءوتتى. سايلانعان اكىمدەردىڭ 61،5 پايىزى اۋىلدىق وكرۋگ اكىمى لاۋازىمىنا العاش رەت سايلانعاندار، 38،5 پايىزى – قايتا سايلانعان لاۋازىم يەلەرى. بۇل – ەلدىڭ جەرگىلىكتى باسقارۋعا قاتىسۋىنىڭ ناقتى كورىنىسى. اۋىل اكىمدەرى ەندى تەك تاعايىندالاتىن ەمەس، حالىقتىڭ سەنىم مانداتىن العان جاۋاپتى تۇلعا رەتىندە ارەكەت ەتۋى ءتيىس. 2023 جىلدان باستاپ اۋىل اكىمدىكتەرىنە دەربەس بيۋدجەتتىك وكىلەتتىك بەرىلدى. بۇل – تەك قۇقىق ەمەس، ۇلكەن جاۋاپكەرشىلىك. بيۋدجەت جوسپارلاۋ، قارجى يگەرۋ، جوبالاردى ىسكە اسىرۋ – بارلىعى اۋىل اكىمىنىڭ بىلىكتىلىگىنە بايلانىستى»، - دەپ اتاپ وتكەن وبلىس اكىمىنىڭ ورىنباسارى، بۇل جۇمىستار ءۇش نەگىزگى باعىتتا: حالىقپەن تىعىز بايلانىس، ينفراقۇرىلىمدىق جوبالاردى ىسكە اسىرۋ، جاستار ساياساتى جانە الەۋمەتتىك قولداۋ سالالارى بويىنشا جۇرگىزىلىپ جاتقانىن مالىمدەدى.
باسقوسۋدا اۋىل اكىمدەرىنىڭ قىزمەت تيىمدىلىگىن ارتتىرۋ بويىنشا تاجىريبەلىك ۇسىنىمدار بەرىلدى، تۇرعىندار تاراپىنان كەڭ قولداۋعا يە بولعان «اۋىل اماناتى»، «جەر اماناتى»، «قارىزسىز قوعام» جوبالارىن ىسكە اسىرۋ مەحانيزمدەرى تۋرالى ادىستەمەلىك كومەكتەر كورسەتىلدى. مەملەكەت باسشىسىنىڭ ساياسي رەفورمالارى كەڭ اۋقىمدى وزگەرىستەر جاساۋعا مۇمكىندىك بەرگەنى ايتىلدى. سونىڭ ىشىندە اۋىل اكىمدەرىنىڭ سايلاۋىن وتكىزۋ پروسەسستەرى ەلىمىزدەگى ساياسي ۇدەرىستى دەموكراتيالاندىرىپ، ازاماتتىردىڭ مەملەكەتتىك باسقارۋ ىسىنە قاتىسۋىن كەڭەيتكەنى ءسوز بولدى.
فورۋم جۇمىسىنا ارنايى قاتىسقان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، الەۋمەتتىك دامۋ كوميتەتىنىڭ ءتوراعاسى اسحات ايماعانبەتوۆ بۇگىنگى فورۋم اۋىل اكىمدەرى ءۇشىن شىن مانىندە پايدالى جيىن بولىپ وتىرعانىن جەتكىزدى. ءوزى جەتەكشىلىك ەتەتىن كوميتەت 6 نەگىزگى باعىت بويىنشا قىزمەت اتقاراتىنىن مالىمدەپ، وسى سالالارعا تۇبەگەيلى وزگەرىستەر اكەلەتىن زاڭ باستامالارى تۋرالى ماعلۇمات بەردى. سونىڭ ىشىندە ءمامس جۇيەسىن جەتىلدىرۋ، اۋىلدىق فاپ-تاردىڭ جۇمىسىن جۇيەلەۋ، بالاباقشالاردا بالا قۇقىقتارىنىڭ ساقتالۋىن قامتۋ، ولاردىڭ قىزمەتىن ليسەنزيالاۋدى قايتا قالپىنا كەلتىرۋ ماسەلەلەرى بار ەكەنى ايتىلدى. بالالاردىڭ جازعى دەمالىس لاگەرلەرىنە قويىلاتىن تالاپتاردى بەكىتۋ، سانيتارلىق-ەپيدەميولوگيالىق باقىلاۋ جۇيەسىنىڭ پارمەندىلىگىن ارتتىرۋ، ءبىلىم بەرۋ جۇيەسىندەگى اتتەستاسياعا مەملەكەتتىك باقىلاۋدى كۇشەيتۋ تالاپتارىنداعى وزگەرىستەر جونىندە ماعلۇماتتار بەرىلدى. بيۋدجەت كودەكسىندەگى جاڭا تالاپتار، مەملەكەتتىك ساتىپ الۋ پروسەسىنىڭ جاريالىعىن قامتاماسىز ەتە وتىرىپ، جەتىلدىرۋ، سپورت سالاسىندا لەگيونەرلەرگە بيۋدجەت جانە كۆازيمەملەكەتتىك سەكتور قاراجاتىنىڭ جۇمسالۋىنا توسقاۋىل قويۋ باعىتىنداعى وزگەرىستەر جايلى ايتىلدى.
جيىننىڭ كۇن تارتىبىنە سايكەس، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى تەمىر قىرىقبايەۆ ءسوز الىپ، «AMANAT» پارتياسىنىڭ فراكسياسى VIII شاقىرىلىمنىڭ سەسسياسى اياسىندا پرەزيدەنت جولداۋلارى مەن پارتيانىڭ سايلاۋالدى باعدارلاماسىن جۇزەگە اسىرۋ بويىنشا جۇيەلى جانە ناتيجەلى جۇمىس جۇرگىزىپ جاتقانىن مالىمدەدى. فراكسيا بارلىق زاڭ جوباسىنىڭ 82 پايىزىنان استامىنا باستاماشىلىق ەتىپ، تۇرعىندارمەن 4 مىڭنان استام كەزدەسۋ وتكىزگەنىن جانە ازاماتتاردىڭ ومىرىندە ورىن العان ناقتى وزگەرىستەرگە قول جەتكىزگەنىن اتاپ ءوتتى. ءماجىلىس دەپۋتاتتارى 158 زاڭ جوباسىن قاراستىرىپ، ونىڭ 89-نا مەملەكەت باسشىسى قول قويعان. پارلامەنت قابىرعاسىندا جاڭا بيۋدجەت كودەكسى جان-جاقتى قاراستىرىلىپ، جۇرتشىلىقتان تۇسكەن كوپتەگەن ۇسىنىستار سارالانعانىن، جاڭا نورماتيۆتەر اۋىل اكىمدەرىنىڭ قىزمەتى ءۇشىن اسا ماڭىزدى ەكەنىن ايتتى. مەملەكەتتىك باسقارۋدى جەتىلدىرۋ، حالىقتى الەۋمەتتىك قولداۋ، وڭىرلەردىڭ ينفراقۇرىلىمدىق احۋالىن جاقسارتۋ، مەديسينا سالاسى، مىندەتتى الەۋمەتتىك مەديسينالىق ساقتاندىرۋ جۇيەسىنىڭ تيىمدىلىگىن ارتتىرۋدا جاڭا قۇقىقتىق نورمالار قاراستىرىلعانىن ءتۇسىندىردى.
اتاپ ءوتۋىمىز كەرەك، پارلامەنت ماجىلىسىندەگى «AMANAT» فراكسياسى 62 زاڭ جوباسىنا باستاماشىلىق ەتكەن زاڭ جوبالارىنا 5322 تۇزەتۋ ەنگىزگەن. كۇن تارتىبىندەگى اكتۋالدى دەگەن ماسەلەلەر بويىنشا 626 دەپۋتاتتىق ساۋال جولداپ، قايتالانعان ساپارلاردى قوسا ەسەپتەگەندە 2099 ەلدى مەكەنگە شىعىپ، تۇرعىندار كوتەرگەن پروبلەمالىق ماسەلەلەردىڭ شەشىلۋىن دەپۋتاتتىق قاداعالاۋعا العان. فراكسيا وكىلدەرى ازاماتتارمەن 4209 كەزدەسۋ وتكىزىپ، 128 مىڭ ادام قامتىلعان. دەپۋتاتتاردىڭ ىقپال ەتۋىمەن 527 ماسەلە دەر كەزىندە شەشىمدەرىن تاپقان. جاڭا سالىق كودەكسى، بيۋدجەت كودەكسى، سۋ كودەكسى قابىلداۋ بويىنشا ىرگەلى قادامدار جاسالىپ، مىندەتتى الەۋمەتتىك ساقتاندىرۋ، «كەلەشەك» جۇيەسى، مادەنيەت، تالىمگەرلىك جانە ءبىلىم بەرۋ، دەنساۋلىقتى قورعاۋ جانە لۋدومانياعا قارسى، بايلانىس، كولىك، مەملەكەتتىك قىزمەتتەر جانە پوشتا، تاۋاردىڭ شىعۋ تەگى، ەسىرتكى قىلمىسىنا قارسى كۇرەس تۋرالى زاڭدار قابىلدانعان.
وبلىستىق ءماسليحات دەپۋتاتتارىنىڭ اۋىل اكىمدەرىمەن ىقپالداستىعى ماسەلەسىن ايتقان تۇركىستان وبلىستىق ءماسليحاتىنىڭ ءتوراعاسى نۇرالى ءابىشوۆ، ءوڭىرىمىز ءۇشىن اۋىلداردىڭ احۋالىن تۇزەۋ – ستراتەگيالىق باسىمدىق دەپ باعالادى. ويتكەنى، تۇركىستان وبلىسىنداعى 2،2 ملن. حالىقتىڭ 1،6 ميلليونى – اۋىل تۇرعىندارى ەكەنىنە نازار اۋدارىپ، جەرگىلىكتى اتقارۋشى بيلىك جۇيەسىندە اۋىل اكىمدەرىنىڭ ءرولى ماڭىزدى دەدى. تۇرعىنداردىڭ تابىسىن ارتتىرۋدا ينۆەستيسيا تارتۋدىڭ وزەكتىلىگىنە توقتالدى. پارلامەنت، ءماسليحات، اكىمدىك جانە پارتيا بولىپ بىرلەسىپ، اۋىل اكىمدىكتەرىنىڭ عيمارات ماسەلەسىن شەشۋ، اۋىل اكىمدەرىن قىزمەتتىك كولىكپەن قامتۋ، اۋىل اكىمدىكتەرىنىڭ قىزمەتتىك رەسۋرسىن نىعايتۋ، اۋىلداردا پوليسيا تىرەك پۋنكتتارىن اشۋ، اۋىلداردى كورىكتى مەكەنگە اينالدىرۋدا ارنايى تەحنيكالار ءبولۋ ماسەلەسىندە جان-جاقتى ىنتىماقتاستىق كەرەك دەپ بايىپتادى.
وبلىستىق پارتيا فيليالى اتقارۋشى حاتشىسىنىڭ ورىنباسارى پولات تۇرسىنبايەۆ اۋىل اكىمدەرىنە پارتيالىق قىزمەت تۋرالى ماعلۇمات بەرىپ، اۋىل تۇرعىندارىن تولعاندىراتىن نەگىزگى ماسەلەلەرگە توقتالدى. پارتيانىڭ قوعامدىق قابىلداۋ بولمەلەرىنىڭ قىزمەتى، شالعاي ەلدى مەكەندەردە وتكىزىلىپ جاتقان ءموبيلدى كوشپەلى قوعامدىق قابىلداۋلار، فراكسيا وتىرىستارىنىڭ بارىسى، كەڭەستەردىڭ ماجىلىستەرىندە كوتەرىلگەن وزەكتى ماسەلەلەر، پارتيا قابىلداعان سايلاۋالدى باعدارلامانىڭ ورىندالۋى تۋرالى پايدالى اقپاراتتاردى ۇسىندى. سايلاۋشىلارمەن جۇمىس جۇرگىزۋ، قوعام سۇرانىستارى مەن تۇرعىندار كوتەرگەن ماسەلەلەردىڭ شەشىم تابۋىندا پارتيامەن ىقپالداستىق ماسەلەلەرى تۋرالى حابارلاما جاسادى.
فورۋم الاڭىندا اۋىل اكىمدەرى ءۇشىن وزەكتى دەگەن ساۋالدار بويىنشا وبلىستىق باسقارمالارعا، دەپارتامەنتتەرگە تىكەلەي جۇگىنۋگە مۇمكىندىك جاسالدى. اشىق پىكىر الماسۋ فورماتىندا وتكەن جيىندا اۋىل اكىمدەرىنە پايدالى كوپتەگەن اقپاراتتار ايتىلدى. اۋىلداردا مەملەكەتتىك باعدارلامالاردىڭ ورىندالۋى جانە ولاردى جۇزەگە اسىرۋدا كەزدەسىپ جاتقان وزەكتى ماسەلەلەر تۋرالى ساۋران اۋدانىنىڭ اكىمى ماقسات تاڭاتاروۆ، اۋىل تۇرعىندارىنىڭ تابىسىن ارتتىرۋعا، اۋىلدىق جەرلەردە جۇمىس ورىندارىن اشۋعا سەپتىگى ءتيىپ جاتقان «اۋىل اماناتى» جوباسىنىڭ ىسكە اسىرىلۋى، باعدارلاماعا ەنگىزىلگەن جاڭا تالاپتار جونىندە تۇركىستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى الىبەك پلالوۆ اقپارات بەردى. جيىن بارىسىندا اۋىل شارۋاشىلىعى سالاسىندا كەزەك كۇتتىرمەيتىن ماسەلەلەر بار ەكەنىنە باسا ءمان بەرىلىپ، وبلىس تۇرعىندارى ءۇشىن نەگىزگى كۇنكورىس كوزى بولىپ تابىلاتىن سالانىڭ وزەكتى ماسەلەلەرىن تۇبەگەيلى شەشۋدە وبلىستىق باسقارما اۋىل اكىمدەرىمەن تىعىز بايلانىستا جۇمىس ىستەۋى قاجەت ەكەنى ايتىلدى.
اۋىلداردىڭ ينفراقۇرىلىمدىق احۋالىن جاقسارتۋ، اۋىز سۋ، تابيعي گاز جۇيەلەرىنىڭ تارتىلۋى، ەلەكتر قۋاتىنىڭ ساپالى بولۋى ماسەلەلەرى تۇركىستان وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى روزا سارييەۆانىڭ حابارلاماسىندا ايتىلسا، اۋىل تۇرعىندارىنىڭ الەۋمەتتىك سۇرانىستارى، حالىقتىڭ جۇمىسپەن قامتىلۋى، مەملەكەتتىك الەۋمەتتىك قولداۋلاردىڭ كورسەتىلۋى تۋرالى تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ مىندەتىن ۋاقىتشا اتقارۋشى الماس ءابدىقادىروۆتىڭ بايانداماسىندا قامتىلدى. وبلىستىق جەر قاتىناستارى باسقارماسىنىڭ باسشىسى ەرعالي تىلەگەن «جەر اماناتى» جوباسىنىڭ ورىندالۋى، جايىلىمدىق جەرلەردى ورتاق يگىلىككە قايتارۋ بويىنشا قابىلدانعان جوسپاردىڭ ىسكە اسىرىلۋى تۋرالى اقپارات ۇسىندى. ال تۇركىستان وبلىسى بويىنشا مەملەكەتتىك كىرىستەر دەپارتامەنتىنىڭ وندىرىستىك ەمەس تولەمدەر باسقارماسىنىڭ باسشىسى مەيرامبەك كوكەنوۆ سالىق تولەمدەرىنىڭ ورىندالۋى بويىنشا اۋىل اكىمدەرىنىڭ قىزمەتتىك فۋنكسياسى جونىندە تۇسىنىك بەرىپ، پايدالى ماعلۇماتتار بەردى.
ايرىقشا اتاپ ءوتۋىمىز قاجەت، «قارىزسىز قوعام» جوباسىنىڭ ورىندالۋىنا وبلىستىق قارجى باسقارماسى تىكەلەي جاۋاپتى بولعانىمەن، ونى ءتيىستى دەڭگەيدە اتقارۋداعى جاۋاپكەرشىلىك اۋدان جانە اۋىل اكىمدەرىنە جۇكتەلگەنى ايتىلدى. پارتيا بۇل باعىتتاعى جۇمىستاردى ۇيلەستىرىپ، ساپالى ورىندالۋىنا قوعامدىق باقىلاۋ جۇرگىزەدى. «قارىزسىز قوعام» جوباسى بويىنشا بيىلدىڭ وزىندە 8102 ادام وقىتىلدى. ونىڭ ىشىندە بانك الدىنداعى نەسيە قارىزدارى 90 كۇننەن اسقان قارىزى بار ازاماتتار ساناتىنان 1785 ادام – وفلاين، 317 ادام – ونلاين وقۋ كۋرستارىنان ءوتتى. بۇل باعىتتاعى جۇمىستار جۇيەلى جالعاسىن تابۋى قاجەت ەكەنى ايتىلدى. جوبانى ىسكە اسىرۋدىڭ ناتيجەلەرى مەن وزەكتى ماسەلەلەرى تۋرالى تۇركىستان وبلىسى بويىنشا «قارىزسىز قوعام» جوباسىنىڭ جەتەكشىسى ەرجان كانگەلدييەۆ بايانداما جاسادى. جيىن بارىسىندا نەسيە قارىزدارى بويىنشا بەرەشەگى بار ازاماتتاردىڭ ەسەپشوتتارىن بۇعاتتاۋدان شىعارۋ، وسى ساناتتاعى ازاماتتارعا زاڭگەرلىك كومەك كورسەتۋ، نەسيە قارىزدارى بار ازاماتتارعا قارىزدارىن وتەۋگە جەڭىلدىكتەر بەرۋ ماسەلەسى جونىندە قاجەتتى كەڭەستەر بەرىلدى. تۇتىنۋشى نەسيەسىن راسىمدەۋدە ازاماتتاردىڭ جاس مولشەرىن 18-دەن 21-گە دەيىن ۇلعايتۋدى زاڭ جۇزىندە بەلگىلەۋ، كوللەكتورلىق ۇيىمداردىڭ قىزمەتىن قۇقىقتىق رەتتەۋ بويىنشا شارالار قابىلدانىپ جاتقانى ايتىلدى.
ال تۇركىستان وبلىستىق ءماسليحاتىنىڭ دەپۋتاتى، وبلىستىق پارتيا فيليالى جانىنداعى وڭىرلىك دامۋ كەڭەسىنىڭ جەتەكشىسى باقىتجان سەرمانيزوۆ شاردارا سۋ قويماسىندا سۋ دەڭگەيىنىڭ كۇرت ءتۇسىپ كەتكەنىنە الاڭداۋشىلىق ءبىلدىرىپ، بۇل احۋال تۇرعىندار ءۇشىن قولايسىز بوپ جاتقانىن جەتكىزدى. ەكولوگيا، ەنەرگەتيكا جانە حالىق تۇتىناتىن اۋىز سۋعا تىكەلەي قاتىسى بار بۇل ماسەلەنى پارلامەنت دەپۋتاتتارىنان ۇكىمەت الدىندا كوتەرىپ، ورتالىق مەملەكەتتىك ورگانداردىڭ قاتىسۋىمەن ارنايى قاراۋدى ۇسىندى.
«AMANAT» پارتياسىنىڭ تۇركىستان وبلىستىق فيليالى اشىپ بەرگەن الاڭنىڭ پراكتيكالىق تۇرعىدا پايدالى جيىن بولعانىن قازىعۇرت اۋدانى، قىزىلقيا اۋىلدىق وكرۋگىنىڭ اكىمى ءبىرجان ماحسۋتوۆ پەن بايدىبەك اۋدانى، مىڭبۇلاق اۋىلدىق وكرۋگىنىڭ اكىمى عالىمجان اماناتاي ۇلى ايتىپ، پارتياعا ريزاشىلىقتارىن ءبىلدىردى. پارتيا اتىنان سايلانعان اۋىل اكىمدەرى سايلاۋالدى باعدارلامانىڭ ورىندالۋى، پارتيالىق جوبالاردىڭ جۇزەگە اسۋى تۋرالى تاجىريبەلەرىمەن ءبولىستى.
اۋىلدىق دەڭگەيدەگى باسقارۋ جۇيەسىنىڭ وزەكتى ماسەلەلەرى اشىق تالقىلانعان، ءوزارا تاجىريبە الماسۋعا سەپ بولعان، ورتاق شەشىمدەر قابىلداۋعا مۇمكىندىك اشقان جيىننىڭ قورىتىندىسىندا، اۋىل ازاماتتارىنىڭ سۇرانىسىن ءدوپ باسقان، ولاردىڭ قولداۋىنا يە بولعان «اۋىل اماناتى»، «جەر اماناتى»، «قارىزسىز قوعام»، تاعى باسقا پارتيا جوبالارىن ناقتىلى ىسكە اسىرۋ، اۋىل-ايماقتاردىڭ تازالىعىن ساقتاۋ، ەلدىڭ ىشكى بىرلىگىن بەكەمدەۋ ماسەلەلەرى بويىنشا ماڭىزدى شەشىمدەر قابىلدانىپ، ولاردىڭ ورىندالۋى پارتيالىق باقىلاۋعا الىندى.
فورۋم جۇمىسىنىڭ قورىندىسىمەن مەملەكەتكە ادال ەڭبەگى سىڭگەن، وبلىستىڭ قوعامدىق-ساياسي ومىرىنە بەلسەنە ارالاسىپ، ەلىمىزدىڭ وركەندەۋىنە ۇلەسىن قوسقان جانە «AMANAT» پارتياسىنىڭ ستراتەگيالىق باعىتىن قولداپ، ونىڭ باعدارلامالىق مىندەتتەرى مەن جوبالارىن ىسكە اسىرۋعا تاباندىلىق تانىتقان ءبىرقاتار اۋىل اكىمدەرى تۇركىستان وبلىستىق ءماسليحاتىنىڭ جانە «AMANAT» پارتياسى تۇركىستان وبلىستىق فيليالىنىڭ العىس حاتتارىمەن ماراپاتتالدى.
