ءداستۇرلى ءانشى، ونەرتانۋشى ەرلان تولەۋتاي قازىرگى قوعامداعى، مەملەكەتتەگى باستى پروبلەمەلاردى اتادى. سونىڭ ءبىرى - ءدىن ماسەلەسى، - دەپ حابارلايدى Dalanews.kz.
"ءبىر ادام بايىسا، مولدالار وزىنە قاراتىپ الادى. بيزنەسمەندەردىڭ سوڭىنا ءتۇسىپ الادى. سوسىن و دۇنيەمەن قورقىتىپ، "ەرتەڭ ولگەندە توزاقتا جاناسىڭ" (دەيدى - ەسك.). ءتۇبى اۋىلدان شىققاندار بىردەن سوعان قۇلاپ قالادى، ويتكەنى و دۇنيەدەن قورقادى. ءسويتىپ ءقازىر بۇكىل قازاقتىڭ داۋلەتى ءدىن ىسىنە باعىتتالعان. باسقا شارۋا جوق"، - دەيدى ول ASSYLTAS TV-عا بەرگەن سۇحباتىندا.
ءداستۇرلى ءانشى مۇنى "اۋعانستانعا اينالۋدىڭ از-اق الدىندا تۇرمىز" دەپ سيپاتتادى. ونىڭ سوزىنشە، كەيبىر تۇستا اسىپ كەتكەن جەرلەرىمىز دە بار.
"جەمقورلىق اسقىنىپ بارا جاتىر، ناركومانيا اسقىنىپ جاتىر، ءدىني پروبلەمالار اسقىنىپ بارا جاتىر.
اۋعانستانعا اينالۋدىڭ الدىندا تۇرمىز. ءتىپتى كەيبىر تۇستا اۋعانستاننان اسىپ كەتتىك. اناۋ كۇنى كىشكەنتاي قىزداردىڭ ايتىپ جاتقانىن كوردىڭىز عوي. "پايعامباردىڭ ءناجىسىمىن جەيمىن، ءزارىن ىشەمىن" دەيدى. قازاق ونداي دەڭگەيگە اناۋ زاماندا تۇسكەن جوق. قازاق ارام مەن ادالدى ايىراتىن حالىق قوي.
بىرنەشە جىل بولىپ كەتتى، پايعامباردىڭ ساقالىن الىپ كەلدى. ءبىر كەمپىر مەنىڭ ءۇيىمدى ساقتالعان دەپ الىپ شىقتى ما، وعان پاتەر بەردى. ول دا ءبىر جىمىسقى ساياسات قوي. سۇمدىق قوي. سوعان دەيىن جەتتىك. قوعامنىڭ نادانداۋى عوي. "ءبىلىم ءومىر شىراعى" دەيدى. ءبىلىم جوق، شىراق جوق. تۇنەككە كىرىپ بارا جاتىرمىز. ءبىزدىڭ قوعام ءارتۇرلى سوققىلار الىپ جاتىر.
وتىز جىل بويى سۇمدىق سىرتقى كۇشتەر ارقىلى قازاقتىڭ ساناسىنا سوققىلار بەرىلدى. سونى كوتەرە الماي ەسەڭگىرەپ قالدىق. ءبىز نازاربايەۆپەن كەتسىن، كەتتى عوي دەپ ويلاعانبىز. ونىڭ جاڭا فورمالارى پايدا بولىپ جاتىر"، - دەيدى ول.
ەرلان تولەۋتاي كادر ماسەلەسىنە دە توقتالدى. ونىڭ ايتۋىنشا، بيلىك ار-ۇياتى بيىك ادامدارعا مۇقتاج.
"ءقازىر نازاربايەۆتىڭ كادرلارى كەلىپ جاتىر. ولاردا ۇجدان جوق. تەك ىلدىم-جىلدىم. تۇك بىلمەيتىن ستاندارت ادامدار. نە ءوندىرىستى بىلمەيدى، نە كىسىلىك قارىم-قاتىناس جوق. باسقارۋدى بىلمەيدى، ۇيىمداستىرۋشىلىق قابىلەتى جوق.
...ءقازىر ىلدىم-جىلدىمدار، كوز ويناعاندار، جىرپىلداعاندار، وتىرىك سويلەيتىندەر - سولار كەلىپ جاتىر. كادر ساياساتى دا وتە قيىن جاعدايدا. ويتكەنى نازاربايەۆقا ەلىكتەپ وسكەن بۋىن سول سياقتى سويلەيدى، جۇرەدى، سول سياقتى كوزىن الاقتاتادى، سول سياقتى ەكىلەنىپ سويلەيدى.
وسى تۇرعىدان كەلگەندە وزگەرىس جوق. بيلىككە ۇجداندى ادامدار كەلۋى كەرەك"، - دەيدى قازاق ونەرىنىڭ جاناشىرى ASSYLTAS TV-عا بەرگەن سۇحباتىندا.
