Dástúrli ánshi, ónertanýshy Erlan Tóleýtai qazirgi qoǵamdaǵy, memlekettegi basty problemelardy atady. Sonyń biri - din máselesi, - dep habarlaidy Dalanews.kz.
"Bir adam baiysa, moldalar ózine qaratyp alady. Biznesmenderdiń sońyna túsip alady. Sosyn o dúniemen qorqytyp, "erteń ólgende tozaqta janasyń" (deidi - esk.). Túbi aýyldan shyqqandar birden soǵan qulap qalady, óitkeni o dúnieden qorqady. Sóitip qazir búkil qazaqtyń dáýleti din isine baǵyttalǵan. Basqa sharýa joq", - deidi ol ASSYLTAS TV-ǵa bergen suhbatynda.
Dástúrli ánshi muny "Aýǵanstanǵa ainalýdyń az-aq aldynda turmyz" dep sipattady. Onyń sózinshe, keibir tusta asyp ketken jerlerimiz de bar.
"Jemqorlyq asqynyp bara jatyr, narkomaniia asqynyp jatyr, dini problemalar asqynyp bara jatyr.
Aýǵanstanǵa ainalýdyń aldynda turmyz. Tipti keibir tusta Aýǵanstannan asyp kettik. Anaý kúni kishkentai qyzdardyń aityp jatqanyn kórdińiz ǵoi. "Paiǵambardyń nájisimin jeimin, zárin ishemin" deidi. Qazaq ondai deńgeige anaý zamanda túsken joq. Qazaq aram men adaldy aiyratyn halyq qoi.
Birneshe jyl bolyp ketti, Paiǵambardyń saqalyn alyp keldi. Bir kempir meniń úiimdi saqtalǵan dep alyp shyqty ma, oǵan páter berdi. Ol da bir jymysqy saiasat qoi. Sumdyq qoi. Soǵan deiin jettik. Qoǵamnyń nadandaýy ǵoi. "Bilim ómir shyraǵy" deidi. Bilim joq, shyraq joq. Túnekke kirip bara jatyrmyz. Bizdiń qoǵam ártúrli soqqylar alyp jatyr.
Otyz jyl boiy sumdyq syrtqy kúshter arqyly qazaqtyń sanasyna soqqylar berildi. Sony kótere almai eseńgirep qaldyq. Biz Nazarbaevpen ketsin, ketti ǵoi dep oilaǵanbyz. Onyń jańa formalary paida bolyp jatyr", - deidi ol.
Erlan Tóleýtai kadr máselesine de toqtaldy. Onyń aitýynsha, bilik ar-uiaty biik adamdarǵa muqtaj.
"Qazir Nazarbaevtyń kadrlary kelip jatyr. Olarda ujdan joq. Tek yldym-jyldym. Túk bilmeitin standart adamdar. Ne óndiristi bilmeidi, ne kisilik qarym-qatynas joq. Basqarýdy bilmeidi, uiymdastyrýshylyq qabileti joq.
...Qazir yldym-jyldymdar, kóz oinaǵandar, jyrpyldaǵandar, ótirik sóileitinder - solar kelip jatyr. Kadr saiasaty da óte qiyn jaǵdaida. Óitkeni Nazarbaevqa eliktep ósken býyn sol siiaqty sóileidi, júredi, sol siiaqty kózin alaqtatady, sol siiaqty ekilenip sóileidi.
Osy turǵydan kelgende ózgeris joq. Bilikke ujdandy adamdar kelýi kerek", - deidi qazaq óneriniń janashyry ASSYLTAS TV-ǵa bergen suhbatynda.
