بۇگىن تاڭەرتەڭ ماماندار وقيعا ورنىنا بارىپ، قاجەتتى تەكسەرىستەر جۇرگىزدى. ءقازىر جوسپارلى جۇمىستار اتقارىلىپ جاتىر. سوگرا اۋدانىنداعى مەكتەپ وقۋشىلارى قاشىقتان وقۋعا اۋىستىرىلدى، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.  

قازگيدرومەت جەلدىڭ بولماۋىنا بايلانىستى II دارەجەلى قولايسىز مەتەوجاعداي تىركەلگەنىن حابارلادى.

2025 جىلدىڭ 19 مامىردا شامامەن ساعات 16:00-دە «وسكەمەن تيتان-ماگنيي كومبيناتى» اۋماعىندا بەلگىسىز زاتتىڭ اۋاعا تاراعانى بايقالدى. بۇل جاعدايعا بايلانىستى وقيعا ورنىنا بىردەن جەرگىلىكتى بيلىك، توتەنشە جاعدايلار دەپارتامەنتى، ەكولوگيا جانە سانيتارلىق-ەپيدەميولوگيالىق باقىلاۋ ماماندارى بارىپ، تەكسەرىس جۇرگىزدى.

كومبينات بەرگەن مالىمەتكە قاراعاندا، ءدال سول كۇنى №3 حلورلاۋ قوندىرعىسىندا كۇتپەگەن تەحنيكالىق قىزمەت كورسەتۋ جۇمىستارى ءجۇرىپ جاتقان. سول كەزدە ءبىر بولشەك قۇلاپ، ءتۇتىن جۇرەتىن قۇبىر بىتەلىپ قالعان.

كاسىپورىن زەرتحاناسى سانيتارلىق-قورعاۋ ايماعى شەگىندەگى اۋانى تەكسەرىپ، اۋا قۇرامىنداعى حلور شەكتى دەڭگەيدەن اسپاعانىن مالىمدەدى.

ساعات 17:00 شاماسىندا الەۋمەتتىك جەلىلەر مەن جەرگىلىكتى باق-تا كوزگە كورىنەتىن قويۋ ءتۇتىننىڭ ۆيدەولارى جاريالانعان سوڭ، وبلىستىق ەكولوگيا دەپارتامەنتىنىڭ ماماندارى باقىلاۋ نۇكتەلەرىنە بارىپ، كەشكى ساعات 23:00-گە دەيىن ولشەۋلەر جۇرگىزدى. ناتيجەسىندە، اۋا قۇرامىندا نورمادان اساتىن زياندى زاتتار انىقتالعان جوق. بارلىق تەكسەرۋلەر زاڭناماعا ساي جۇرگىزىلگەن.

سول كۇنى ساعات 18:21-دە توتەنشە جاعدايلار دەپارتامەنتىنە سارى ءتۇستى زاتتىڭ تاراعانى تۋرالى حابارلاما ءتۇستى. وسىعان بايلانىستى وقيعا ورنىنا سانيتارلىق-ەپيدەميولوگيالىق باقىلاۋ باسقارماسى مەن ۇلتتىق ساراپتاما ورتالىعىنىڭ وبلىستىق فيليالىنىڭ ماماندارى جىبەرىلدى.

ساراپشىلار بارلىعى 8 جەردەن 144 اۋا ۇلگىسىن الدى. ولار:

جاڭا سوگرا اۋماعى، بوبروۆكا اۋىلىنا بۇرىلىس؛

2ء-شى كوتەرگىش؛

ازس-تەن كەيىنگى بۇرىلىس (ۋلبا باعىتىنا)؛

تارحانكا مەن ەگوروۆا كوشەسى اراسىنداعى جول؛

وحوتسكايا كوشەسى، 126 (سانيتارلىق-قورعاۋ ايماعى)؛

وزوتسكايا كوشەسى، 94ا (سانيتارلىق-قورعاۋ ايماعى)؛

كورشۋنوۆا ستانسياسى؛

سوگرينسك جەو كۇل ءۇيىندىسى.

اتالعان ۇلگىلەرگە 18 ءتۇرلى زات بويىنشا ساراپتاما جاسالدى. ولاردىڭ ىشىندە حلور، تۇز قىشقىلى، كۇكىرت ديوكسيدى، فورمالدەگيد، اممياك، قورعاسىن سەكىلدى زياندى ەلەمەنتتەر بولدى. ساعات 21:44-كە دەيىن جۇرگىزىلگەن زەرتتەۋ ناتيجەسىندە، بىردە-بىر زات شەكتى مولشەردەن اسپاعان. بۇل مالىمەتتەر وبلىستىق ەكولوگيا دەپارتامەنتىنە جولداندى.

كومبينات تاراپىنان بۇل جاعداي بويىنشا رەسمي تۇردە توتەنشە وقيعا تىركەلمەگەنى ايتىلدى. سونىمەن قاتار، تۇرعىندار تاراپىنان دەنساۋلىعىنا شاعىمدانىپ، دارىگەرگە جۇگىنگەندەر بولماعان.

ايتا كەتەيىك، ءدال سول كۇنى ونەركاسىپتىك قاۋىپسىزدىك باسقارماسى زاۋىتتا جوسپارلى تەكسەرۋ جۇرگىزىپ جاتقان بولاتىن. ينسپەكتورلار ساعات 10:00-دەن 16:00-گە دەيىن زاۋىت اۋماعىندا بولعان. سول ۋاقىت ارالىعىندا ەشقانداي كۇدىكتى بەلگى بايقالماعان. قازىرگى جاعداي دا وسى تەكسەرىس اياسىندا قارالادى.

20 مامىردا ۇلتتىق ساراپتاما ورتالىعى كومبيناتقا جاقىن ەلدى مەكەندەردە قوسىمشا زەرتتەۋ جۇرگىزۋدى جوسپارلاپ وتىر. ونىڭ ناتيجەسى كەيىنىرەك جاريا ەتىلەدى.

جاعدايعا بايلانىستى وبلىس اكىمدىگى شۇعىل شتاب وتىرىسىن وتكىزدى. وندا ءوڭىر باسشىلىعى، قۇقىق قورعاۋ ورگاندارى، باقىلاۋشى جانە باسقا دا جاۋاپتى مەكەمەلەردىڭ وكىلدەرى قاتىسىپ، مونيتورينگتى كۇشەيتۋ تۋرالى تاپسىرمالار بەرىلدى.

تۇرعىندارعا جالعان اقپاراتقا سەنبەي، تەك رەسمي دەرەككوزدەرگە جۇگىنۋ سۇرالادى.