اتوم ەنەرگەتيكاسى سالاسىنداعى كادر تاپشىلىعى ماسەلەسىن شەشۋ ماقساتىندا قازاقستاندا اۋقىمدى جۇمىس باستالدى،-دەپ حابارلايدى Dalanews.kz
اەس سالۋ جوباسى ءۇشىن كونسورسيۋم جەتەكشىسى تاڭدالىپ، جوسپارلاۋ كەزەڭىنەن ناقتى ىسكە كوشۋ باستالدى.
«روساتوم» مەملەكەتتىك كورپوراسياسىمەن ارىپتەستىك اياسىندا قازاقستان بىردەن ءبىلىم بەرۋ ستاندارتتارى مەن نورماتيۆتىك قۇجاتتاردىڭ ءبىرىڭعاي جۇيەسىن ەنگىزۋ مۇمكىندىگىنە يە بولدى. بۇل بولاشاق مامانداردىڭ ەڭبەك پروسەسىنە كەدەرگىسىز قوسىلۋىن قامتاماسىز ەتىپ، قوسىمشا دايارلىققا كەتەتىن شىعىنداردى ازايتادى.
"كادرلار – يدەيالاردى شىندىققا اينالدىراتىن، اتوم سالاسىنىڭ دامۋ ۆەكتورىن ايقىندايتىن باستى رەسۋرس. اتوم ەنەرگەتيكاسىنىڭ تابىستى دامۋى ەڭ الدىمەن ساپالى كادرلىق بازاعا بايلانىستى. بۇگىن ءبىز وسى ىرگەتاستى قالاپ وتىرمىز"، - دەيدى يادرولىق فيزيكا ينستيتۋتىنىڭ باس ديرەكتورى سايابەك ساحييەۆ.
قازىرگى تاڭدا فيزيكا، ەنەرگەتيكا، ەلەكتروتەحنيكا جانە تاۋ-كەن ينجينيرينگى باعىتتارى بويىنشا 18 ءبىلىم بەرۋ باعدارلاماسى جۇزەگە اسىرىلىپ جاتىر. مامان دايارلاۋمەن قازاقستانداعى جەتەكشى جوعارى وقۋ ورىندارى — د. سەرىكبايەۆ اتىنداعى شقتۋ، ل. ن. گۋميليەۆ اتىنداعى ەۇۋ، ءال-فارابي اتىنداعى قازۇۋ، ع. داۋكەيەۆ اتىنداعى اەبۋ، سونداي-اق شەتەلدىك سەرىكتەس ۋنيۆەرسيتەتتەر اينالىسۋدا.
بۇدان بولەك، يادرولىق فيزيكا مەن ينجەنەريا، تەوريالىق يادرولىق فيزيكا جانە اتوم ەنەرگەتيكاسى باعىتتارىندا قوس ديپلوم باعدارلامالارى ەنگىزىلگەن.
2024–2025 وقۋ جىلىنا وسى سالا بويىنشا 5 000-نان استام گرانت ءبولىندى. سالىستىرۋ ءۇشىن: 2023–2024 جىلدارى بۇل ماماندىقتارعا بار بولعانى 250-گە جۋىق ستۋدەنت وقۋعا تۇسكەن، ال 2011–2023 جىلدار ارالىعىندا وتاندىق وقۋ ورىندارى 1 600-دەن استام مامان دايىنداعان.
سونداي-اق، قازاقستاندا جوعارى بىلىكتى كادرلار جۇمىس ىستەيتىن ەكى ءىرى عىلىمي-زەرتتەۋ ۇيىمى – يادرولىق فيزيكا ينستيتۋتى مەن ۇلتتىق يادرولىق ورتالىق بار. يادرولىق فيزيكا ينستيتۋتىنىڭ بازاسىندا بۇگىنگە دەيىن 5 000-نان استام مامان دايارلانعان.
ەسكە سالايىق، بۇگىن ەلدەگى تۇڭعىش اەس-تىڭ باس مەردىگەرى رەتىندە «روساتوم» تاڭدالعانى بەلگىلى بولدى. سەبەبى، رەسەيلىك كومپانيانىڭ ۇسىنىستارى ەڭ وڭتايلى جانە ءتيىمدى بولدى. بۇل ىرىكتەۋگە «روساتومنان» بولەك جۇڭگو، فرانسيا جانە وڭتۇستىك كورەيا كومپانيالارى دا قاتىستى. ەندى رەسەي ەسەبىنەن مەملەكەتتىك ەكسپورتتىق قارجىلاندىرۋدى تارتۋ بويىنشا پىسىقتاۋ جۇمىسى باستالدى.
