– تاۋەلسىزدىك جىلدارى رۋحانياتىمىزدىڭ وزەگى قايتا جانداندى. ءداستۇرلى ءدىنىمىز دارىپتەلىپ، اياسى كەڭەيىپ كەلەدى. سونىڭ جارقىن كورىنىسىنىڭ ءبىرى – بۇگىن ىرگەتاسى قالانىپ جاتقان ەركىنقالا اۋىلىندا بوي تۇزەيتىن 500 ورىندىق مەشىت. اللا ءۇيى ءارقاشان جاقسىلىق پەن ىزگىلىكتىڭ التىن ۇياسى. جاماعاتتىڭ جارىسا جەتىپ، جانىنا رۋھ الاتىن جايماشۋاق مەكەنى. مەيىرىمدىلىك، كىشىپەيىلدىلىك پەن جومارتتىق سىندى يگى قاسيەتتەرگە شاقىراتىن بىرەگەي ورىن. باستاما قۇتتى بولسى! حالىقتىڭ يگىلىگىنە جاراپ، يماندىلىقتىڭ ورداسىنا اينالسىن! رۋحانياتىمىز كەمەلدەنىپ، ەلىمىزدىڭ ىنتىماعى مەن بىرلىك-بەرەكەسى ارتا بەرسىن! – دەدى ماحامبەت دوسمۇحامبەتوۆ.
ال، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى «اللانىڭ ءۇيى تەك عيبادات ورنى ەمەس، بۇل – ءسالت-داستۇرىمىزدى ەلدىڭ بىرلىگىن، ىنتىماعىن ناسيحاتتايتىن قاسيەتتى ورىن. مەشىت تەك ءدىندى ناسيحاتتايتىن عانا ەمەس، سونىمەن قوسا قايىرىمدىلىق جاسايتىن ورتالىققا اينالعانى بەلگىلى. سوندىقتان، بۇل مەشىت تە حالىققا زور پايداسى تيەر ورىن بولادى دەگەن سەنىمدەمىز. قازاقتا «ازانى بار ەل ازبايدى» دەگەن ءسوز بار، ەندەشە بەس ۋاقىت ازان ايتىلىپ تۇراتىن، اللاعا قۇلشىلىق ەتەتىن حالىقتىڭ ىنتىماعىن ناسيحاتتايتىن ورىننىڭ جۇمىسىنا ساتتىلىك بەرسىن!» دەپ باتاسىن بەردى.
مەشىت اۋىل تۇرعىندارىنىڭ وتىنىشىنە ساي، جەرگىلىكتى كاسىپكەرلەردىڭ قاراجاتىمەن سالىنادى. جوسپار بويىنشا ءبىر جىلدا قۇرىلىس جۇمىستارى اياقتالىپ، پايدالانۋعا بەرىلمەك.
مەشىتتىڭ ىشىندە قۇران وقۋ بولمەسى، ەرلەر جانە ايەلدەرگە ارنالعان ناماز وقۋ زالدارى مەن ءدارىسحانالار بولادى، سونداي-اق جانىنان اسحانا مەن يمامنىڭ ءۇيى سالىنادى دەپ جوسپارلانۋدا.
ەسكە سالا كەتسەك، بۇگىنگى تاڭدا اتىراۋ وبلىسىندا 34 مەشىت جۇمىس ىستەۋدە.
