اتىراۋ وبلىسىنداعى اۋىلدان ءبىر وتباسىنىڭ جوعالىپ كەتۋى بىرنەشە ايدان بەرى الەۋمەتتىك جەلىلەردە قىزۋ تالقىلانىپ كەلەدى. جاڭا مالىمەتتەرگە سايكەس، قايىن اتاسى مەن قايىن ەنەسىن ءولتىردى دەگەن كۇدىككە ىلىنگەن ەر ادامنىڭ كامەلەتكە تولماعان بەس بالاسى ۋاقىتشا مەملەكەت قورعاۋىنا الىنعان، دەپ حابارلايدى Dalanews.kz.
اتىراۋ وبلىستىق ءبىلىم باسقارماسىنىڭ حابارلاۋىنشا، 2 اقپاندا پوليسيادان اكىمدىككە شۇعىل شارا قابىلداۋ جونىندە حات تۇسكەن. وندا كۇدىكتىنىڭ بەس بالاسىن ۋاقىتشا ءقاۋىپسىز جەرگە ورنالاستىرۋ قاجەت ەكەنى كورسەتىلگەن.
ۆەدومستۆو مالىمەتىنشە، ماحامبەت اۋدانىنىڭ كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى اۋداندىق كوميسسياسى ءۇش بالانى اتىراۋ وبلىسى ءبىلىم باسقارماسىنا قاراستى كامەلەتكە تولماعانداردى بەيىمدەۋ ورتالىعىنا ورنالاستىرعان. ال جاسى 1 جانە 3-تەگى ەكى ءسابي مامانداندىرىلعان سابيلەر ۇيىنە جىبەرىلگەن.
باسقارمانىڭ باسپا ءسوز قىزمەتى بالالاردىڭ جاعدايى تۇراقتى باقىلاۋدا ەكەنىن، ولاردىڭ قاۋىپسىزدىگى تولىق قامتاماسىز ەتىلىپ جاتقانىن اتاپ ءوتتى.
